ខំធ្វើការទាន់ខ្លួននៅក្មេងពេញកម្លាំង ប្រសើរជាងខំនៅពេលខ្លួនចាស់រកកម្លាំងឈរមិននឹង

2019-01-15 05:00:00
ចំនួនមតិ 0 | ចំនួនចែករំលែក 0

យុវវ័យមិនអាចមាន២ដងឡើយក្នុងមួយជីវិត វានឹងរសាត់ទៅតាមពេលវេលា។ កុំជ្រើសរើសដើរផ្លូវខុស ឬក៏ខ្ជះខ្ជាយពេលឥតប្រយោជន៍នៅចន្លោះវ័យដែលអ្នករឹងមាំ វ័យដែលអ្នកពេញកម្លាំង ខួរក្បាលរហ័សរហួន ព្រោះវ័យនេះជាវ័យដែលអ្នកអាចប្រឈមមុខនឹងរឿងគ្រប់យ៉ាងបានដោយជោគជ័យ។ ការឈឺចាប់ ការលំបាក និងការក្រេបយកបទពិសោធន៍ ជួយជ្រោមជ្រែងជីវិតអ្នកទៅថ្ងៃអនាគតក៏ត្រូវមើលលើអ្វីដែលអ្នកខំប្រឹងនៅពេលអ្នកនៅជាយុវវ័យដែរ។

មានពាក្យមួយឃ្លាគេនិយាយថា«ជីវិតកាន់តែលំបាក អ្នកកាន់តែរឹងមាំ» នេះគឺចង់ដាស់តឿនឲ្យអ្នកខំប្រឹងលើជីវិតរបស់អ្នក។ អ្នកកាន់តែជួបរឿងលំបាក អ្នកកាន់តែស្គាល់ពីខ្លួនឯង អ្នកកាន់តែរកផ្លូវដើម្បីជួយខ្លួនឯងឲ្យចេញពីភាពឈឺចាប់ទាំងអស់នោះ។

១០ ឆ្នាំមិនមានច្រើនដងទេ ដូច្នេះអ្នកមិនគួរបណ្ដោយឲ្យវាកន្លងហួសទៅទាំងគ្មានអ្វីសោះសម្រាប់ជីវិតខ្លួនឯងឡើយ។ ៣ ឆ្នាំសម្រាប់ជីវិតវិទ្យាល័យ ៤ ឆ្នាំសម្រាប់ជីវិតមហាវិទ្យាល័យសូមអ្នកក្ដាប់វាឲ្យជាប់ និងធ្វើវាឲ្យក្លាយជាជោគជ័យមួយសម្រាប់វ័យរបស់អ្នក។

វ័យ ២០ ឆ្នាំឡើងទៅជាវ័យដែលអ្នកស្គាល់ពីជីវិតកាន់តែច្រើន ហើយអ្នកក៏ត្រូវបញ្ចេញកម្លាំងឲ្យខ្លាំងដូចគ្នា ព្រោះបើអ្នកប្រឹងនៅចន្លោះពេល ១០ ឆ្នាំនេះ ដល់វ័យ ៣០ ឆ្នាំឡើង អ្នកនឹងមើលឃើញពីសមិទ្ធផលជីវិតដែលអ្នកបានប្រឹងប្រែងកាលពីនៅវ័យ ២០ ឆ្នាំនោះ។ ខំធ្វើការទាន់នៅក្មេងពេញកម្លាំង ប្រសើរជាងខំនៅពេលខ្លួនចាស់ទាំងខ្លួនឈរមិននឹង។ វ័យដែលពេញដណ្ដើមយកជោគជ័យ វ័យដែលពេញសប្បាយ វ័យដែលពេញទៅដោយសក្ដានុពល អ្នកត្រូវធ្វើវាឲ្យបានល្អបំផុត។

ស្វែងរកតម្លៃនៃជីវិត ស្វែងរកភាពជោគជ័យ នោះសុទ្ធតែអ្វីដែលយុវវ័យត្រូវមាននៅក្នុងដៃ។ ធ្វើការ ដើរលេងមើលពិភពលោកឲ្យកាន់តែធំ ពង្រឹងសមត្ថភាពឲ្យកាន់តែរឹងមាំ នោះនោះនៅពេលចាស់អ្នកនឹងមិនហត់ មិនស្ដាយក្រោយឡើយ៕

ចុចអាន៖បទពិសោធន៍ ១០យ៉ាងដែលខ្ញុំទទួលបានបន្ទាប់ពីឆ្លងផុតវ័យ ២០ឆ្នាំ

អត្ថបទ៖ ផេង ផលធិតា