មេរៀនជីវិតដែលខ្ញុំទទួលបានពីឆ្នាំ២០១៨ និងឆ្នាំកន្លងទៅ

2019-01-09 07:24:35
ចំនួនមតិ 0 | ចំនួនចែករំលែក 0

ឆ្លងកាត់ឆ្នាំ២០១៨ និងឆ្នាំកន្លងផុតទៅ ខ្ញុំបានទទួលមេរៀនជីវិតជាច្រើន៖

១. អាយុកាន់តែច្រើន មិត្តភ័ក្ដិ សាច់ញាតិ ឬអ្នកដែលធ្លាប់តែស្គាល់គ្នាពីមុនមកប្រែកាន់តែតិចទៅៗ ហើយមនុស្សដែលអាចចែករំលែករឿងក្នុងចិត្តជាមួយក៏មានកាន់តែតិចឡើងៗ

២. ខ្ញុំរៀនចេះបណ្ដោយរឿងឱ្យទៅតាមពេលវេលា រៀនយល់ពីរឿងរ៉ាវឱ្យបានលម្អិតជាងមុន មិនថារឿងគួរឱ្យខឹងប៉ុណ្ណា រឿងគួរឱ្យអាណិតប៉ុណ្ណា គឺសុទ្ធតែមានដើមហេតុដើមទងរបស់វារៀងខ្លួន

៣. ខ្ញុំរៀនចេះដាស់តឿនខ្លួនថា ធ្វើល្អតែចំពោះអ្នកដែលគួរទទួលអំពើល្អបានហើយ ព្រោះអំពើល្អខ្លះនឹងប្រែទៅជាទោសមកវិញតាមរយៈពាក្យបកប្រែដ៏ស្ទាត់ជំនាញរបស់អ្នកណាម្នាក់

៤. ពេលវេលាច្រើនឆ្នាំបានបង្ហាញឱ្យខ្ញុំឃើញសន្ដានពិតរបស់មនុស្សដែលពីមុនមិនធ្លាប់គិតដល់សោះ

៥. មកដល់វ័យនេះទើបខ្ញុំដឹងថា មានតែប៉ាម៉ាក់ប៉ុណ្ណោះ! លោកទាំងពីរគឺជាអ្នកដែលផ្ដល់ក្ដីស្រឡាញ់ដ៏បរិសុទ្ធ និងហ៊ានលះបង់ដើម្បីខ្ញុំបាន មិនថាក្នុងកាលៈទេសៈណាក៏ដោយ

៦. ខ្ញុំចេះភ្ញាក់រលឹកថា ការធ្វេសប្រហែសគឺអាចនាំទុក្ខទោសដល់ខ្លួនដោយស្មានមិនដល់

៧. ច្រើនឆ្នាំមកនេះ យើងម្នាក់ៗផ្លាស់ប្ដូរច្រើនណាស់ ពេលខ្លះក៏ចេះអត់ធ្មត់ ពេលខ្លះក៏ឆេវឆាវ ពេលខ្លះក៏អស់សង្ឃឹម ពេលខ្លះទៀតក៏សើចសប្បាយ! នេះហើយជីវិត កាលណាយើងជួបរឿងច្រើន យើងនឹងដឹងថាខ្លួនឯងអាចរស់នៅរឹងមាំកម្រិតណា!

៨. ជីវិតបានបង្រៀនខ្ញុំថា មិនមែនមនុស្សគ្រប់គ្នាសុទ្ធតែអាចគាំទ្រនូវអ្វីដែលយើងធ្វើទាំងអស់នោះទេ

៩. ច្រើនឆ្នាំកន្លងមកនេះបានបង្រៀនខ្ញុំថា កុំឱ្យទៅបៀតបៀនជីវិតអ្នកដទៃ ព្រោះសូម្បីតែខ្លួនយើងក៏ចង់បានជីវិតរបស់ខ្លួនឯងដែរ

១០. របស់ដែលជារបស់យើងគង់តែធ្លាក់ក្នុងដៃយើង តែរបស់ដែលមិនមែនជារបស់យើង ទោះខំយ៉ាងណាក៏នៅតែមិនអាចបាន ឬទោះបានក៏មិនសុខដែរ។

ទឹកទន្លេហូរទៅហើយមិនដែលវិលត្រឡប់ក្រោយទេ។ ជីវិតយើងក៏ដូចគ្នា គ្មានថ្ងៃវិលមករកម្សិលមិញទេ ដូច្នេះគួរសាទរអ្វីសម្រាប់ថ្ងៃនេះ និងត្រៀមខ្លួនទទួលអ្វីដែលថ្មីនៅថ្ងៃស្អែកទាំងអស់គ្នា!

អត្ថបទ៖ សរ សុគន្ធី