ប្រាក់ខែមិនសូវច្រើន ក៏ធ្វើការយ៉ាងសប្បាយដោយគន្លឹះ៥យ៉ាងនេះ

2019-01-01 05:10:00
ចំនួនមតិ 0 | ចំនួនចែករំលែក 0

មានមនុស្សមិនតិចទេ ឲ្យតែនឹកឃើញដល់កន្លែងការងារម្តងៗ តែងមានអារម្មណ៍ថា ធុញ ខ្ជិល ចង់ធ្វើអ្វីផ្សេងក្រៅពីទៅធ្វើការឲ្យគេ។ ពេលខ្លះស្មុគស្មាញ មិនសប្បាយជាមួយការងារ ចៅហ្វាយ ឬអ្នកធ្វើការជាមួយជាដើម។ និយាយរួមទៅ បរិយាកាសនៅជុំវិញខ្លួន ដូចជាមិនអំណោយផលទាល់តែសោះ។ ទោះមិនចង់ ក៏វាជាកាតព្វកិច្ចទៅហើយ ដូច្នេះបើចង់ធ្វើកិច្ចការអ្វីមួយរលូនជោគជ័យ លុះត្រាតែអ្នកពេញចិត្តនឹងធ្វើវា។ ដើម្បីដឹងថា ធ្វើការបែបណាទើបអាចសប្បាយចិត្តហើយគ្មានសម្ពាធ គួរដឹងគន្លឹះ៥យ៉ាងខាងក្រោមនេះសិន។

១. ស្រលាញ់ឲ្យតម្លៃការងារដែលអ្នកកំពុងធ្វើ

ប្រសិនបើអ្នកចេះស្រលាញ់ឲ្យតម្លៃការងារដែលអ្នកកំពុងធ្វើ អ្នកនឹងមានកម្លាំងចិត្តតស៊ូបន្តទៅមុខទៀត ចំណែកឯលទ្ធផលនៃការងារវិញក៏ល្អប្រសើរគួរឲ្យស្ញប់ស្ញែង។ កាលណាអ្នកធ្វើវាដោយបង្ខំចិត្ត សម្ពាធនឹងកាន់កើនឡើងតែខ្ពស់ ការងារមិនរីកចម្រើន ថែមទាំងមានអារម្មណ៍ហត់នឿយចង់បោះបង់ចោល។

២. ផ្លាស់ប្តូរការគិត

ព្រឹកឡើងបើកភ្នែកភ្លាម ដាច់ខាតកុំយករឿងសៅហ្មងដាក់ខ្លួន។ កុំប្រកាន់គំនិតថា ធ្វើការស៊ីប្រាក់ខែគេ មិនដឹងថ្ងៃណាទើបមាន ប៉ុន្តែត្រូវគិតថា អ្នកមានសមត្ថភាព អាចរកលុយដោយខ្លួនឯង ហើយអ្នកក៏បានបទពិសោធន៍ថ្មីៗជាច្រើន ទុកសម្រាប់អភិវឌ្ឍខ្លួនទៅថ្ងៃមុខផងដែរ។

៣. ព្យាយាមអភិវឌ្ឍខ្លួនជារៀងរាល់ថ្ងៃ

ស្វះស្វែងរៀនអ្វីថ្មីៗ សួរនាំត្រង់ចំណុចណាដែលអ្នកមិនយល់ ឬគិតថាចង់ដឹងបន្ថែម។ ការខំប្រឹងព្យាយាមអភិវឌ្ឍខ្លួនជារៀងរាល់ថ្ងៃ ធ្វើឲ្យអ្នកមិនធុញទ្រាន់នឹងការងារ ព្រោះអ្នកអាចរៀនសូត្រពីអ្វីដែលអ្នកពុំធ្លាប់ដឹងពីមុនមក។

៤. មិននិយាយដើមគ្នានៅកន្លែងធ្វើការ

ចង់ចេះចង់ដឹងពីការងារ តែមិនបាច់ចង់ដឹងពីរឿងផ្ទាល់ខ្លួនរបស់អ្នកនៅកន្លែងធ្វើការក៏បានដែរ ព្រោះជីវិតមនុស្សម្នាក់ៗមានភាពខុសៗគ្នា មានរឿងរ៉ាវកើតឡើងផ្សេងៗគ្នា ដូច្នោះរវល់ខ្វាយខ្វល់ពីរឿងផ្ទាល់ខ្លួន ប្រសើរជាងយកបញ្ហាអ្នកដទៃមកវិភាគវែងឆ្ងាយ។

៥. ធ្វើការដោយមានកំណត់គោលដៅ

អ្នកមិនមែនធ្វើការតែមួយថ្ងៃទេ ត្រូវអត់? ហេតុនេះហើយ ត្រូវចេះកំណត់គោលដៅ ដឹងថាត្រូវសន្សំប្រាក់ខែដោយរបៀបណា ទើបអាចបំពេញតម្រូវការដែលអ្នកចង់បាន ឬអាចយកទៅលៃលកធ្វើអ្វីផ្សេងនាថ្ងៃអនាគត នោះអ្នកនឹងអាចរីករាយជាមួយការងារដែលកំពុងធ្វើ និងខិតខំដើម្បីទទួលបានលទ្ធផល៕

ចុចអានបន្ត៖ ១១ច្បាប់សម្រាប់មនុស្សមានមារយាទល្អ ថ្លៃថ្នូរក្នុងសង្គម

អត្ថបទ៖ ដេត ឈុនអ៉ី