រឿងសំខាន់ ៨ យ៉ាង ឆ្នាំចាស់ធ្វើមិនបាន ចូលដល់ឆ្នាំថ្មីចាំធ្វើក៏មិនហួសពេលដែរ!

2018-12-27 08:30:03
ចំនួនមតិ 0 | ចំនួនចែករំលែក 0

ពេលវេលាដើរលឿនណាស់ នៅមិនយូរទេ សល់តែប៉ុន្មានថ្ងៃទៀត ឆ្នាំថ្មី២០១៩ នឹងចូលមកដល់។ ទោះឆ្នាំចាស់កន្លងទៅរាប់មិនអស់ ប៉ុន្តែជីវិតមនុស្សនៅតែមមាញឹក និងមានទំនួលខុសត្រូវជាច្រើនមិនទាន់បានបំពេញនៅឡើយ។ មិនថ្វីទេ ឲ្យតែដង្ហើមនិងការតាំងចិត្តនៅមាន ចាប់ផ្តើមធ្វើរឿងសំខាន់ដែលអ្នកចង់ធ្វើ ចាប់ពីឥលូវនេះទៅក៏មិនទាន់ហួសពេលដែរ។

១. ចង់ផ្លាស់ប្តូរជីវិត ត្រូវផ្លាស់ប្តូរទម្លាប់អាក្រក់ប្រចាំថ្ងៃជាមុនសិន។ ឆាប់ចូលគេង ហើយឆាប់ភ្ញាក់ឡើងវិញ ជាមួយនឹងគំនិតថ្មីល្អៗ ដែលអាចជួយឲ្យអ្នកប្រសើរឡើង និងបំភ្លេចរឿងមិនបានការចេញពីក្នុងខួរក្បាលឲ្យអស់។

២. ឈោងចាប់ក្តីស្រមៃដែលអ្នកប្រាថ្នាទុកមកជាយូរ កុំអស់សង្ឃឹម ខំខែនេះ ឆ្នាំនេះមិនបានសម្រេច ត្រូវបន្តភាពជឿជាក់លើខ្លួនឯង មិនរាថយដាច់ខាត។

៣. រក្សាទំនាក់ទំនងល្អជាមួយមនុស្សជុំវិញខ្លួន មិនថាគ្រួសារ ស្នេហា មិត្តភ័ក្តិ បងប្អូន សុទ្ធតែសំខាន់ទាំងអស់។ ចំណែកឯមនុស្សណាពិសពុល គួរទុកដាក់នៅកន្លែងមួយឆ្ងាយពីខ្លួន ដើម្បីកុំឲ្យចង្អៀតនិងហត់ចិត្ត។

៤. បើដើរទៅមុខលែងរូច ត្រូវផ្លាស់ប្តូរផ្លូវថ្មី កុំធ្វើខ្លួនដូចជាជាប់នៅក្នុងអណ្ដូង ឬប្រអប់គ្មានឃើញពន្លឺអ្វីទាល់តែសោះ។ ត្រូវចាំថា រាល់បញ្ហាតែងតែមានដំណោះស្រាយ។

៥. លើកទឹកចិត្តខ្លួនឯងគ្រប់ពេល ទើបមានសង្ឃឹម។ ពេលមានសង្ឃឹម ទើបធ្វើរឿងផ្សេងទៀតបាន។

៦. ជឿលើព្រហ្មលិខិតខ្លះ ក៏មិនខុសអីដែរ ព្រោះរឿងណាដែលមិនសមបំណង ក្រៅពីការបន្ទោសខ្លួនឯង គួរទម្លាក់កំហុសលើព្រហ្មលិខិត ក្រែងលោមិនសូវឈឺខ្លាំង។

៧. អត់អោនឲ្យមនុស្សដែលធ្វើឲ្យអ្នកឈឺចាប់។ ប្រសិនបើអ្នកនៅតែយករឿងឥតប្រយោជន៍មកគិត អ្នកអោបភ្លើងគឺជាអ្នក ហើយអ្នកឆេះរោលរាលក៏ជាអ្នក។ មិនថាជាកំហុសដោយចេតនាអចេតនា ត្រូវអធ្យាស្រ័យ អហោសិកម្មឲ្យទៅល្អជាង។

៨. រៀនអ្វីដែលថ្មី អ្វីដែលគិតថាខ្លួនចង់ចេះចង់ដឹងបន្ថែម ហើយកុំភ្លេចធ្វើជាគំរូល្អដល់អ្នកដទៃផង។ ចេះលើកទឹកចិត្តមនុស្សគ្រប់គ្នា ហើយបើអ្នកចូលចិត្តនិយាយចំៗ ត្រូវច្បាស់ថាវាមិនប៉ះពាល់អារម្មណ៍ បំបាក់ទឹកចិត្តអ្នកដទៃដែរ។