ពិបាកចិត្តយំចុះមិនខុសទេ ព្រោះយំក៏មានអត្ថប្រយោជន៍ច្រើនណាស់ដែរ

2018-12-18 07:30:00
ចំនួនមតិ 0 | ចំនួនចែករំលែក 0

មនុស្សយើងតែងតាំងចិត្តធ្វើខ្លួនឲ្យរឹងមាំគ្រប់ពេល មិនហ៊ានបង្ហាញពីទុក្ខក្រៀមក្រំ មិនហ៊ានបង្ហូរទឹកភ្នែកឲ្យគេឃើញ ព្រោះខ្លាចគេចោទថាជាមនុស្សទន់ខ្សោយ។ ការពិតជាក់ស្តែងនោះ កាន់តែលាក់ គឺកាន់តែបៀមទុក្ខ ថែមទាំងទន់ខ្សោយជាងមុនទៅទៀត។ ឈានដល់ដំណាក់កាលបែកបាក់ស្នេហា ឬខូចចិត្តដោយសាររឿងអ្វីមួយក៏ដោយ បើចង់យំមិនបាច់ទប់នាំស្ទះទ្រូងទេ យំឲ្យអស់ចិត្ត ព្រោះពេលយំទៅក៏មានអត្ថប្រយោជន៍អាចជួយអ្នកបានច្រើនយ៉ាងផងដែរ។

១. អ្នកបានប្រឈមមុខនឹងអារម្មណ៍ពិតរបស់ខ្លួន

ប្រសិនបើអ្នកអាចប្រឈមមុខនឹងអារម្មណ៍ពិតរបស់ខ្លួនឯងបាន មានន័យថាអ្នកកំពុងតែព្យាយាមបន្តដំណើរទៅមុខ ងើបឈរឡើងវិញបន្ទាប់ពីយំអស់ចិត្តហើយ។ ថ្វីត្បិតតែ វាជាអារម្មណ៍មួយដែលមិនគួរបង្ហាញទៅអ្នកដទៃ ប៉ុន្តែអាចបង្ហាញទៅកាន់មនុស្សដែលស្និទ្ធស្នាលជាមួយអ្នកជាងគេ។ បែបនេះ ទើបអ្នកអាចបើកចិត្ត ព្រមទទួលអ្វីដែលល្អថ្មីៗ សម្រាប់ជីវិត។

២. ជំរុញឲ្យបង្កើតគំនិតច្នៃប្រឌិត

ការឆ្លងកាត់ភាពតស៊ូលំបាកកន្លងមក នឹងនាំអ្នកឲ្យមានគំនិតច្នៃប្រឌិតថ្មីប្លែកពីគេ។ តើអ្នកធ្លាប់សង្កេតឃើញទេ ភាគច្រើនអ្នកតាក់តែងនិពន្ធ មិនថាតន្ត្រីឬរឿងភាគឡើយ ពួកគេបានធ្លាប់ជួបរឿងជូរចត់ច្រើន ហើយបានច្នៃប្រឌិតវាទៅជាសាច់រឿង ដើម្បីលើកទឹកចិត្ត មនុស្សគ្រប់គ្នាឲ្យដឹងថា អ្នកមិនឯកានោះទេ ព្រោះលើលោកនេះបញ្ហាមិនមែនកើតឡើងតែចំពោះអ្នក។

៣. បន្សាយជាតិពុលក្នុងខ្លួន

ពេលអ្នកបង្ហូរទឹកភ្នែកដែលកើតចេញពីទុក្ខក្រៀមក្រំឲ្យអស់ វានឹងធ្វើឲ្យអ្នកជៀសផុតពីសារធាតុអាក្រក់ម្យ៉ាងឈ្មោះថា ក័រទីសុល (cortisol) ដែលអាចបណ្តាលឲ្យអ័រម៉ូននៃភាពស្រ្តេសកើនឡើង។

៤. ជំរុញឲ្យមានការផលិតអង់ដូហ្វីន

ធ្លាប់តែឮថាអង់ដូហ្វីនអាចផលិតចេញមកបាន លុះត្រាតែអ្នកធ្វើលំហាត់ប្រាណ។ វាជាសារធាតុម៉្យាងដែលជួយឲ្យមានអារម្មណ៍ល្អ។ យ៉ាងណាមិញ តាមការសិក្សាបានបង្ហាញថា សូម្បីតែយំក៏អាចផលិតអង់ដូហ្វីនបានដែរ។ វាប្រៀបបាននឹងថ្នាំធម្មជាតិ ដែលជួយបំបាត់ភាពឈឺចាប់ ជាពិសេសវាមានប្រសិទ្ធភាពជួយឲ្យអ្នកឆាប់គេងលក់ សម្រាប់អ្នកដែលយំនៅពេលយប់។

មានធ្លាប់អីចឹងដែរអត់?

****យ៉ាងណាក៏ដោយ ទោះបីយំមានអត្ថប្រយោជន៍ច្រើនពិតមែន ប៉ុន្តែមិនមែនមានន័យថា អ្នកត្រូវតែយំនោះទេ។ ក្នុងស្ថានភាពពិបាកចិត្តខ្លាំង យំសិនចុះមិនអីទេ តែប្រញាប់ឈប់ផង ព្រោះមានរឿងល្អៗរាប់មិនអស់កំពុងតែរង់ចាំអ្នក៕**