កុំយកលេសថាខ្លួនជាមនុស្សត្រង់ ដើម្បីអាចនិយាយស្ដីអត់មារយាទដាក់អ្នកណាក៏បានអី
- 2018-12-03 06:36:33
- ចំនួនមតិ 0 | ចំនួនចែករំលែក 0
កុំយកលេសថាខ្លួនជាមនុស្សត្រង់ ដើម្បីអាចនិយាយស្ដីអត់មារយាទដាក់អ្នកណាក៏បានអី
ពេលខ្លះ ការនិយាយស្ដីត្រង់ៗ គឺពិតជាល្អ ប៉ុន្តែក៏ត្រូវស្គាល់កាលៈទេសៈដែរ។ កុំប្រើលេសអាងថាខ្លួនជា “មនុស្សត្រង់” ដើម្បីអាចនិយាយ “ពាក្យអាក្រក់ៗ” ដាក់អ្នកណាក៏បាន។ មនុស្សមួយចំនួននៅតែមិនទាន់ចែកដាច់រវាងការជា “មនុស្សត្រង់” ជាមួយ “មនុស្សនិយាយស្ដីឥតមារយាទ”។
ការនិយាយត្រង់ ប៉ុន្តែបំផ្លាញទឹកចិត្តអ្នកដទៃ បែបនេះមិនមែនចាត់ទុកថាមនុស្សត្រង់
អាយុច្រើន ប៉ុន្តែមិនស្ដាប់យោបល់អ្នកអាយុតិច បែបនេះមិនបានហៅថាមនុស្សចាស់ទុំ
ធ្វើអ្វីតាមតែចិត្តខ្លួនឯង ប៉ុន្តែមិនខ្វល់ពីកាលៈទេសៈ កុំនិយាយថាគ្រាន់ចង់ធ្វើជាខ្លួនឯង
ចូលចិត្តគិត ចូលចិត្តរៀបគម្រោង ប៉ុន្តែមិនព្រមធ្វើ ចាត់ទុកថាជាមនុស្សគ្មានសមត្ថភាព
ខ្ញុំផ្ទាល់ មានមិត្តម្នាក់ដែលតែងហៅខ្លួនឯងថាជា “មនុស្សត្រង់ៗ” ដែលភាពត្រង់ៗរបស់គាត់នោះ គឺការចូលចិត្តមើលងាយអ្នកដទៃមិនរើសមុខ ចូលចិត្តយករឿងអាក្រក់អ្នកដទៃមកនិយាយឲ្យមិត្តភ័ក្ដិស្ដាប់។ ដល់សួរគាត់ថា “មានស្គាល់គេនៅ” គាត់ក៏ថា “ចាំបាច់ស្គាល់ដែរ?”។ គឺថាអស់អីនិយាយតែម្ដង។
មុននឹងនិយាយថាខ្លួនយើងជាមនុស្សត្រង់ គួរតែសួរខ្លួនឯងសិនថា យើងជាមនុស្សបែបហ្នឹងមែន ឬក៏អត់ ឬយើងគ្រាន់តែត្រូវការប្រើពាក្យនេះជាលេសដើម្បីនិយាយអាក្រក់ដាក់អ្នកណាក៏បាន មិនឲ្យគេប្រកាន់។ ទោះយ៉ាងណា អ្វីដែលយើងត្រូវចាំនោះគឺ បើការនិយាយនោះវាគ្មានប្រយោជន៍ មិនផ្ដល់ផលល្អ យើងក៏មិនគួរយកលេសថាខ្លួន “ជាមនុស្សត្រង់” មកប្រើដើម្បីនិយាយទេ។
បច្ចុប្បន្ននេះ មនុស្សប្រើពេលគិតមុននិយាយកាន់តែតិច ពេលខ្លះស្ទើរតែមិនបានគិតផងក៏និយាយចេញមក ថែមទាំងនិយាយហើយបង្កការក្ដៅក្រហាយដល់គេឯង តែបែរមិនទទួលខុសត្រូវដោយការនិយាយថា “ជាមនុស្សត្រង់ គិតអីនិយាយហ្នឹង”។ មិនមែនចេះតែនិយាយបែបហ្នឹងបានទេ សូមកុំច្រលំ។ បើអ្វីដែលអ្នកនិយាយមកធ្វើឲ្យកើតបញ្ហាក្ដៅក្រហាយដល់គេឯង នោះគេមិនហៅថាជាមនុស្សត្រង់ៗទេ គេហៅថា “មាត់ឥតមារយាទ” ទើបត្រូវ។
ការរិះគន់អ្នកដទៃក៏ដូចគ្នា បើជាការរិះគន់ដើម្បីឲ្យមានផលប្រយោជន៍ អ្នកអាចនិយាយបានថានោះគឺជាការនិយាយត្រង់ដើម្បីឲ្យគេបានអភិវឌ្ឍខ្លួនឯងឲ្យកាន់តែប្រសើរ។ ប៉ុន្តែបើគ្រាន់តែត្រូវការជេរគេ ចង់គេខូចខាតប៉ុណ្ណាក៏មិនខ្វល់ ឲ្យតែបានជេរ បានបង្ហាញថាខ្លួនមានអំណាចជេរគេបានតាមចិត្ត បានឃើញទុក្ខលំបាកអ្នកដទៃជារឿងសប្បាយ នោះគឺមានន័យថាយើងជាមនុស្សមាត់មិនល្អហើយ។
ការនិយាយស្ដីដើម្បីដាស់តឿនសតិអ្នកដទៃ មិនចាំបាច់ត្រូវតែប្រើពាក្យអាក្រក់ៗ ដាច់សាច់និយាយជាមួយគេឡើយ។ អ្នកអាចនិយាយតាមសម្រួល និយាយដោយការយោគយល់គ្នា យកចិត្តគេមកដាក់ក្នុងចិត្តយើងខ្លះ គិតថាបើគេនិយាយបែបហ្នឹងដាក់យើង យើងចូលចិត្តទេ? ការនិយាយស្ដីចេះគិតគូរត្រឹមត្រូវ មិនត្រឹមតែធ្វើឲ្យអ្នកក្លាយជាមិត្តគួរឲ្យស្រលាញ់ម្នាក់នោះទេ ប៉ុន្តែអ្នកក៏បានបេះដូងរបស់អ្នកស្ដាប់ដែរ ព្រោះអ្នកបានស្ដែងឲ្យឃើញថា អ្នកប្រើបេះដូងក្នុងការនិយាយ មិនមែនប្រើតែមាត់អត់ប្រើខួរក្បាលនោះឡើយ។ ទម្លាប់និយាយល្អឲ្យបានច្រើន ព្រោះនិយាយល្អអាចឲ្យសត្រូវក្លាយជាមិត្ត ប៉ុន្តែបើនិយាយមិនចេះគិត មិត្តក៏អាចក្លាយជាសត្រូវដែរ ៕
ចុចអានបន្ត៖
មានតែអ្នកជួបទុក្ខលំបាកច្រើនទេ ទើបអ្នកយល់ច្បាស់ពីមេរៀនជីវិតទាំងនេះ
៥សញ្ញាបញ្ជាក់ថាអ្នកជាមនុស្សស៊ាំនឹងឧបសគ្គ ទោះយ៉ាប់យ៉ាងណាក៏នៅតែទៅរួច