មនុស្សស្រីលើលោកមិនចាំបាច់ត្រូវតែមានគូគ្រប់គ្នា បើមានហើយជីវិតកាន់តែវេទនា នៅលីវល្អជាង
- 2018-11-25 08:10:52
- ចំនួនមតិ 0 | ចំនួនចែករំលែក 0
មនុស្សស្រីលើលោកមិនចាំបាច់ត្រូវតែមានគូគ្រប់គ្នា បើមានហើយជីវិតកាន់តែវេទនា នៅលីវល្អជាង
បើមានគូហើយ ជីវិតកាន់តែយ៉ាប់យ៉ឺន សុខចិត្តនៅលីវប្រសើរជាង។ រកមនុស្សល្អមិនបាន សុខចិត្តអត់។
ការសិក្សាមួយនាពេលថ្មីៗបានបង្ហាញថា នារីៗនៅអាស៊ីដែលជ្រើសរើសជីវិតនៅលីវមានការកើនឡើងរៀងរាល់ឆ្នាំ។ ហេតុផលជាច្រើនកើតឡើងដោយសារភាពមិនស្មោះត្រង់ អំពើហិង្សា និងការមិនទទួលខុសត្រូវលើតួនាទីរបស់ដៃគូ។
វិទ្យាស្ថានស្រាវជ្រាវប្រជាករនិងសង្គមរបស់ប្រទេសថៃបានធ្វើការស្រាវជ្រាវ និងរកឃើញថា មនុស្សស្រីមួយចំនួនបានជ្រើសរើសការរស់នៅម្នាក់ឯង (រៀបការនៅអាយុច្រើន នៅលីវបន្ត លែងលះស្វាមី និងមិនយកកូន) ដោយសារមូលហេតុមួយដែលអាចមកពីភាពជាអ្នកដឹកនាំរបស់មនុស្សប្រុសមានការថយចុះ មនុស្សប្រុសធ្វើខ្លួនកាន់តែទន់ជ្រាយ និងខ្វះទំនួលខុសត្រូវចំពោះគ្រួសារ។
មានរឿងនិទានមួយដំណាលថា
នៅលើស្ពានឈើតូចមួយមានគេសរសេរផ្លាកថា “ចូរដើរឲ្យដល់ត្រើយដោយបិទភ្នែក”។ បើអ្នកណាអាចដើរផុតស្ពានដោយមិនធ្លាក់ អ្នកនិងគូស្នេហ៍របស់អ្នកនឹងអាចក្លាយជាគូព្រេងនឹងគ្នាជារៀងរហូត។ ដូច្នេះហើយទើបមនុស្សជាច្រើនព្យាយាមមកដើរលើស្ពាននេះ ម្ដងហើយម្ដងទៀត ប៉ុន្តែក៏នៅតែធ្លាក់គ្រប់ពេល។ អ្នកខ្លះដល់ថ្នាក់គិតថា ខ្ញុំប្រហែលគ្មានគូព្រេងនឹងគេទេជាតិនេះ ប៉ុន្តែទីបំផុតក៏មានមនុស្សម្នាក់អាចឆ្លងផុតដល់គោលដៅ ដោយមិនធ្លាក់។
អ្នកគ្រប់គ្នាក៏ចម្លែកចិត្តហើយសួរថា តើដើរបែបណាទើបមិនធ្លាក់។
ចម្លើយដែលបានឮ ធ្វើឲ្យគ្រប់គ្នាស្ងាត់មាត់ឈឹង។
អ្នកឆ្លងផុតនោះបានប្រាប់ថា “ខ្ញុំលួចបើកភ្នែក”។
សាកគិតលមើល ដើម្បីសេចក្ដីស្នេហា មនុស្សគ្រប់គ្នាសុខចិត្តប្រថុយបិទភ្នែកឆ្លងស្ពាន សុខចិត្តបិទភ្នែក និងធ្វើជាមិនឃើញការពិតនានា ដែលចូលមក។ គេប្រាប់ឲ្យយើងបិទភ្នែកយើងក៏បិទ គេប្រាប់ថាស្រលាញ់ យើងក៏ជឿ ដោយមិនមើលឲ្យច្បាស់ថាអ្វីជាការពិត។
វាមិនអាចទៅគោលដៅបានទេ បើមើលមិនឃើញផ្លូវនោះ។ នៅពេលដែលយើងស្រលាញ់គ្នាដោយបិទភ្នែកបិទត្រចៀកជិតឈឹងនោះ វានឹងក្លាយជាស្នេហាឆោតល្ងង់ និងខ្វះសតិ។
ដូច្នេះហើយនៅពេលមានស្នេហា សូមសាកល្បងបើកភ្នែកសម្លឹងមើលឲ្យបានវែងឆ្ងាយ កុំបណ្ដោយឲ្យស្នេហាធ្វើឲ្យភ្នែកយើងខ្វាក់។ ទោះបីយើងបើកភ្នែកដើរហើយធ្លាក់ ក៏វាមិនឈឺចាប់ស្មើការធ្លាក់មកទាំងបិទភ្នែកដែរ “ព្រោះយើងដឹងថា ធ្លាក់មកយ៉ាងម៉េច ទើបឈឺតិចបំផុត”។
ការបិទបេះដូងមិនស្រលាញ់អ្នកណាសោះ មិនមែនជាការដោះស្រាយបញ្ហា ប៉ុន្តែការមានស្នេហាដោយមានភាពវៃឆ្លាត និងមានសតិគ្រប់គ្រាន់ គឺជាការដោះស្រាយបញ្ហាដែលត្រឹមត្រូវ ៕
ចុចអានបន្ត៖