សំនួរចាក់ដោត៖ ធ្លាប់ស្រលាញ់មនុស្សម្នាក់ខ្លាំង ទោះដឹងគ្មានលទ្ធផលដែរអត់?

2018-11-10 05:44:24
ចំនួនមតិ 0 | ចំនួនចែករំលែក 0

តាមពិតទៅក្នុងចំណោមពួកយើងទាំងអស់ នៅមានច្រើននាក់ណាស់ដែលដាក់ចិត្តដាក់កាយស្រលាញ់គេ ទាំងដឹងថាចំណងមនោសញ្ចេតនាមួយនេះនឹងមិនអាចទៅដល់គោលដៅ។

នៅពេលដែលជ្រុលស្រលាញ់ ដាក់ចិត្តដាក់កាយទៅលើមនោសញ្ចេតនាណាមួយហើយ ជឿជាក់ថាអ្នកទាំងអស់គ្នាតែងស្រមៃចង់បានលទ្ធផលដ៏ល្អមួយសម្រាប់អ្នកទាំង២។ តែស្នេហាគឺមិនមែនយើងខ្លួនឯងជាអ្នកសម្រេចឡើយ គឺស្ថិតលើនិស្ស័យ និងវាសនា។ អ្នកខ្លះសំណាងល្អ មាននិស្ស័យបានជួបគ្នា ឆ្លងកាត់រឿងដែលមិនអាចបំភ្លេចបានជាច្រើន តែនៅតែមិនអាចបន្តជាមួយគ្នារហូត ព្រោះគ្មានវាសនា។ ដល់ពេលនេះ ទោះបីជាស្នេហាជ្រាលជ្រៅដល់កម្រិតណាក៏មិនអាចឃាត់មនុស្សម្នាក់ឲ្យនៅជាមួយយើងបន្តទៀតបានដែរ។

មានប្រភេទស្នេហាជាច្រើនដែលនៅពេលបច្ចុប្បន្ន ភាគីទាំងសងខាងសុទ្ធតែស្រលាញ់គ្នាដកចិត្តមិនរួច តែនៅក្នុងចិត្តដឹងច្បាស់ថា ចំណងស្នេហ៍មួយនេះគឺគ្មានលទ្ធផលឡើយ។ ប្រភេទដែលគេប្រទះច្រើនជាងគេគឺ ខ្លួនឯងជាមនុស្សជំនួស។ មានន័យថា ភាគីម្ខាងទៀតគឺស្រលាញ់យើងពិតមែន តែដោយសារតែយើងស្រដៀងនឹងមនុស្សអតីតរបស់គេ ឬគេអាចទន់ចិត្តនឹងយើងមួយគ្រាពេលឯកាបំផុត។ ឯយើងឯណេះវិញ នៅតែស្រលាញ់គេឡើងផុងខ្លួន តែក្នុងចិត្តដឹងច្បាស់ថា គេមិនអាចបំភ្លេចស្រមោលអ្នកចាស់បាន ហើយទៅថ្ងៃមុខ មនោសញ្ចេតនាមួយនេះ ប្រាកដជាមិនអាចរក្សាបានយូរឡើយ។

ឯអ្នកខ្លះទៀតបានចែករំលែកថា ស្នេហារបស់ពួកគេមិនអាចទៅដល់គោលដៅបានដោយសារតែជាប្រភេទស្នេហាលាក់បាំង មិនហ៊ានឲ្យអ្នកដឹងទាំងអស់។ គ្មានសិទ្ធិហួងហែង ប្រចណ្ឌ ឬចេញមុខអ្វីទាំងអស់់ ព្រោះខ្លាចគេដឹង។ តើឲ្យមានលទ្ធផលនឹងគ្នាយ៉ាងម៉េច បើមិនហ៊ានឲ្យអ្នកណាដឹងផង។ ដល់ពេលគ្រួសារបង្ខំឲ្យមានគូស្រករ ក៏ត្រូវតាមចិត្តគ្រួសារហើយបោះបង់ស្នេហាដែលលាក់ទុកជាយូរ។

រីឯស្នេហាមួយទៀត ដែលពិបាកជៀសផុតពីការបែកគ្នានោះគឺស្នេហាដំបូង។ គេថាអ្នកដែលអាចដើរដល់ទីបញ្ចប់ជាមួយស្នេហាដំបូងរបស់ខ្លួនបាន ទាល់តែជាតិមុនបានធ្វើបុណ្យខ្លាំងណាស់ ទើបជាតិនេះជួបរឿងបែបនេះ។ តែតាមការពិត មានចំនួនភាគរយទាបបំផុត ដែលពួកយើងអាចមានស្នេហាយូរអង្វែងជាមួយមនុស្សដំបូង។ ស្នេហាដំបូងកើតមានឡើងនៅពេលយើងមានវ័យក្មេង ចរិតឆេវឆាវ មិនទាន់ចេះគិតវែងឆ្ងាយ តែបេះដូងស្រលាញ់គ្នា អាចលះបង់គ្រប់បែបយ៉ាងចំពោះគេ។ តែបើសួរថា ប្រាកដថានឹងមានសុភមង្គលដូចនេះរហូតឬអត់ គឺគ្មានអ្នកណាហ៊ានឆ្លើយឡើយ។