ទម្លាប់ល្អ៥យ៉ាង នារីសម័យថ្មីតែងមានជាប់ខ្លួន

2018-11-05 02:28:08
ចំនួនមតិ 0 | ចំនួនចែករំលែក 0

មនុស្សស្រីណាក៏ចេះយំ ទន់ខ្សោយម្តងម្កាល ប៉ុន្តែនាងនៅតែមានវិធីសម្រាប់ជួយខ្លួនឯង ដោយពុំចាំបាច់ពឹងលើមនុស្សប្រុសឡើយ ព្រោះនាងគឺជានារីសម័យថ្មី។ វាជាយុគសម័យមួយ ដែលនារីមានជំហររឹងមាំ ស្រស់ស្អាត និងមានភាពជឿជាក់ មានទំនុកចិត្តខ្ពស់។ នាងថែមទាំងប្រកាន់ខ្ជាប់នូវ ទម្លាប់ល្អៗ៥យ៉ាងនៅជាប់ខ្លួនជានិច្ច។

១. មិនខឹងច្រឡោត គ្មានហេតុផល

ពេលមានបញ្ហាអ្វីមួយកើតឡើង នាងមានតិចនិកវ័យឆ្លាត ចេះស្វែងរកហេតុផលមួយច្បាស់លាស់ ដើម្បីធ្វើជាដំណោះស្រាយ ដោយមិនប្រើកំហឹង។

២. ឆ្លាតវៃតែមិនក្អេងក្អាង

មនុស្សស្រី ពុំចាំបាច់ត្រូវខំប្រឹងឲ្យល្អឥតខ្ចោះពេកក៏បាន បើអ្នកតាំងខ្លួនម៉ឺងម៉ាត់ក្អេងក្អាងហួសហេតុ នោះភាពវៃឆ្លាតនឹងក្លាយជាអសារបង់ ដោយសារបាត់បង់ទំនាក់ទំនងល្អជាមួយមនុស្សនៅជុំវិញខ្លួន។ ចេះលេងសើចខ្លះ ទើបគេឯងមិនខ្លាចនឹងនិយាយជាមួយ។

៣. ហ៊ាននិយាយចំត្រង់ៗ មិនបញ្ឆិតបញ្ឆៀងក្រោយខ្នង

នាងចូលចិត្តនិយាយចំត្រង់ៗ ទោះពេលខ្លះស្តាប់សម្តីមើលទៅ ហាក់បីដូចជាកាចឆ្នាសឆ្នើមបន្តិចមែន ក៏នាងមិនដែលធ្វើខ្លួនជាផ្លែល្វា ផ្អែមតែនៅនឹងមុខ ហើយនិយាយអាក្រក់ពីក្រោយខ្នងដែរ។

៤. មិនរស់នៅជាមួយភាពឈឺចាប់

ពេលជីវិតធ្លាក់ដល់កម្រិតមួយ ដែលអាចធ្វើឲ្យទឹកភ្នែកស្រក់ហូរដោយមិនដឹងខ្លួន នារីក្នុងយុគសម័យថ្មីតែងតែ ទន្ទិញឃ្លាដ៏មានតម្លៃមួយគឺ "ទឹកភ្នែកមិនអាចជួយអ្វីបាន ក្រៅពីខូចសម្រស់និងកាន់តែទន់ខ្សោយ ខ្ញុំត្រូវតែជូតវាចេញ ហើយងើបឈរឡើងវិញ”។

៥. មានសមត្ថភាពរកលុយបានដោយខ្លួនឯង

សម័យនេះទៅហើយ ខ្លួនទីពឹងខ្លួន ចេះចាយវាយ ក៏ចេះរកលុយដូចគ្នា។ ការប្រើប្រាស់សមត្ថភាពពិត អ្នកនឹងអាចស្វែងរកសុភមង្គលពិតមកឲ្យខ្លួនឯង ដោយមិនចាំបាច់ត្រូវពឹងលើកម្លាំងអ្នកដទៃនោះទេ ៕