អរគុណសម្រាប់ការបដិសេធស្នេហ៍មួយនេះ ហើយបន្សល់ត្រឹមពាក្យ«មិត្តភាព»

2018-11-01 07:35:55
ចំនួនមតិ 0 | ចំនួនចែករំលែក 0

ការរង់ចាំគឺជាភាពអត់ធ្មត់មួយដែលខ្ញុំតែងតែប្រាប់ខ្លួនឯង ប៉ុន្តែបន្ទាប់ពីថ្ងៃនោះមកខ្ញុំមិនមែនជាអ្នកដែលត្រូវរង់ចាំអ្នកណាទៀតនោះទេ។ ខ្ញុំបានដឹងថាខ្ញុំចំពោះអ្នកគឺគ្រាន់តែជាមិត្តភាពមួយ ហើយវានឹងបន្តទៅជារៀងរហូត។

មនុស្សជាច្រើននិយាយថា ពេលខ្លះពួកគេចូលចិត្តទីក្រុង ដោយសារទីក្រុងមានមនុស្សដែលគេស្រឡាញ់ តែវាប្រហែលជាការពិតសម្រាប់ខ្ញុំ។ ខ្ញុំមិនចូលចិត្តទីក្រុងទេ វាគឺស្មុគស្មាញ រញ៉េរញ៉ៃ និងគួរឲ្យធុញបំផុត ប៉ុន្តែចាប់តាំងពីថ្ងៃដំបូងដែលខ្ញុំបានជួបអ្នក ខ្ញុំក៏ចាប់ផ្ដើមចង់នៅទីក្រុង ដោយមិនចេះធុញទ្រាន់។ នោះមកពីខ្ញុំមានមនុស្សក្នុងចិត្តម្នាក់ដែលខ្ញុំអាចជួបគ្នានៅទីក្រុងនេះ។

ខ្ញុំនឹកឃើញស្នាមញញឹមអ្នក ពេលដែលអ្នកសើចគឺជាពេលដែលស្អាត និងគួរឲ្យស្រឡាញ់បំផុត។ អារម្មណ៍ស្រឡាញ់មនុស្សម្នាក់ គឺមានឥទ្ធិពលខ្លាំងណាស់ ប៉ុន្តែសម្រាប់មនុស្សធំ គឺយើងដឹងពីរបៀបយកមនុស្សម្នាក់មកទុកក្នុងបេះដូង។ ស្នេហាមិនអាចបង្ខំបានឡើយ ទោះចង់មិនចង់ អ្នកត្រូវតែរង់ចាំមើលពីលទ្ធផលរបស់វា។

មួយរយៈដែលពួកយើងទាក់ទងគ្នា ខ្ញុំដឹងថាខ្ញុំស្រឡាញ់អ្នកខ្លាំង តែអ្នកក៏បាននិយាយត្រង់ៗថាអ្នកគ្រាន់តែចាត់ទុកខ្ញុំក្នុងឋានៈជាមិត្តតែប៉ុណ្ណោះ។ តើខ្ញុំអាចធ្វើអ្វីបន្តទៅ?

ការខូចចិត្ត ភាពឯកា និងការបាត់បង់ជំនឿចិត្តក៏ចាប់ផ្ដើមមានចំពោះខ្ញុំ ប៉ុន្តែអ្នកនៅតែបន្តធ្វើល្អដាក់ខ្ញុំក្នុងនាមជាមិត្តល្អម្នាក់។ អ្នកបានជ្រើសយកជម្រើសមួយដើម្បីកុំឲ្យមិត្តភាពល្អប្រេះឆា គឺបញ្ឈប់អារម្មណ៍ស្រឡាញ់របស់ខ្ញុំចំពោះអ្នក។

ការពិតបែបនេះក៏ល្អដែរ យ៉ាងហោចណាស់អ្នកមិនបានបោកទឹកចិត្តខ្ញុំ គឺអ្នកបានប្រាប់ខ្ញុំត្រង់ៗតែម្ដង។ កន្លងមួយរយៈមកខ្ញុំក៏យល់ថាមិត្តភាពបែបនេះគឺល្អបំផុតសម្រាប់ពួកយើង ព្រោះមិត្តភាពអាចរស់បានយូរ ជាងស្នេហា។ យ៉ាងហោចណាស់ពួកយើងមិនបានក្លាយជាអ្នកដទៃ។

មិត្តភាពគឺជាជំហានទៅកាន់ការស្រឡាញ់ តែវាមិនអាចក្លាយជាមិត្តភាពវិញបានឡើយ។

ខ្ញុំមិនត្រូវការលាក់បាំងអារម្មណ៍ខ្ញុំទៀតឡើយ ខ្ញុំនៅតែអាចញញឹមយ៉ាងស្រស់ស្អាតពេលនៅជាមួយអ្នក។ ខ្ញុំអាចឈរពីក្រោយអ្នក ហើយអបអរអ្នកនៅពេលអ្នកអាចរកមនុស្សដែលអ្នកស្រឡាញ់បាន។ យើងយល់គ្នាច្រើន ហើយខ្ញុំដឹងថាអ្នកស្រឡាញ់ខ្ញុំ តែវាក្នុងឋានៈផ្សេង ដួច្នេះពួកយើងសុទ្ធតែសំខាន់សម្រាប់គ្នា។

ប្រាកដណាស់ខ្ញុំរីករាយនៅពេលដែលឃើញអ្នករីករាយ យ៉ាងហោចណាស់ពួកយើងមិនស្ដាយក្រោយ ព្រោះពួកយើងបានបង្ហាញការពិតចំពោះគ្នា។

អរគុណដែលអ្នកបានបដិសេធន៍ខ្ញុំត្រង់ៗ ព្រោះវាអាចធ្វើឲ្យពួកយើងលែងយល់ច្រឡំលើគ្នាទៀត ហើយពួកយើងអាចបើកផ្លូវឲ្យខ្លួនឯង និងលែងរង់ចាំអ្នកណាម្នាក់ទៀត។ សង្ឃឹមថាមិត្តភាពនេះអាចបន្តបានយូរ និងរហូតទៅ៕

ចុចអាន៖៤ មូលហេតុធ្វើឲ្យអ្នករើសមនុស្សខុសម្ដងហើយម្ដងទៀត

អត្ថបទ៖ ផេង ផលធិតា