៤ មូលហេតុធ្វើឲ្យអ្នករើសមនុស្សខុសម្ដងហើយម្ដងទៀត

2018-10-26 09:46:52
ចំនួនមតិ 0 | ចំនួនចែករំលែក 0

អ្នកជួបបុរសម្នាក់ គ្រប់យ៉ាងកំពុងដំណើរការទៅរលូន ប៉ុន្តែសុខៗគេក៏ផ្លាស់ប្ដូរខ្លាំង រហូតធ្វើឲ្យអ្នកសង្ស័យថាខ្លួនឯងបានស្គាល់គេច្បាស់ឬក៏អត់។ មែនហើយ ចិត្តមនុស្សគ្មានអ្នកណាស្មានត្រូវរហូតទេ មិនអីចឹងមិនមែនមនុស្សម្នាក់ៗត្រូវឆ្លងកាត់ស្នេហាច្រើនទម្រាំរកឃើញមនុស្សពិតប្រាកដសម្រាប់ខ្លួនឯងឡើយ។ យ៉ាងណាក៏ដោយបើអ្នកបរាជ័យស្នេហាម្ដងហើយម្ដងទៀត អ្នកក៏គួរតែរៀនសូត្រពីវាខ្លះដែរដើម្បីកុំឲ្យជួបកំហុសដដែលៗ។ ខាងក្រោមនេះនឹងបង្ហាញពី ៤មូលហេតុដែលគួរពិចារណាថាហេតុអីបានជាអ្នកជ្រើសរើសមនុស្សខុសជានិច្ច៖

រូបតំណាង

**១. អ្នកលង់ស្នេហ៍លើរូបរាង និងអ្វីដែលគេសម្ដែងច្រើនជាងចរិតពិតរបស់គេ**

ឧបមាថាអ្នកបានណាត់ជួបជាមួយបុរសម្នាក់។ គេព្យាយាមធ្វើឲ្យអ្នកចាប់អារម្មណ៍ដោយការនិយាយពាក្យផ្អែមល្ហែម ហើយធ្វើឲ្យអ្នកសើចសប្បាយ ហើយអ្នកក៏លង់ស្រលាញ់គេ ដោយមិនបានចាប់អារម្មណ៍ថា ការពិតអត្តចរិតពិតរបស់គេទៅវិញទេដែលអ្នកគួរចាប់អារម្មណ៍ ពិសេសគឺភាពស្មោះត្រង់។

២. អ្នកមើលរំលងទង្វើអាក្រក់របស់គេ

អ្នកអាចនឹងត្រូវចំណាយពេលវេលាយូរដើម្បីមើលចិត្តមនុស្ស ប៉ុន្តែសញ្ញាតឿនគ្រោះថ្នាក់ផ្សេងៗក៏ជាអ្វីដែលអ្នកគួរចាប់អារម្មណ៍ដែរ ដូចជាពាក្យសម្ដី ឬទង្វើនានារបស់គេ ដែលធ្វើឲ្យអ្នកមានអារម្មណ៍ថាគេមិនបានស្រលាញ់អ្នកពិត។ ចូរស្មោះត្រង់នឹងខ្លួនឯងជាជាងមើលរំលងរឿងទាំងនោះ ទើបអ្នកមិនស្ដាយក្រោយនៅពេលក្រោយ។

រូបតំណាង

៣. អ្នកជឿថាអ្នកថាផ្លាស់ប្ដូរគេបាន

នៅពេលមានស្នេហា យើងក៏ជឿថាភាគីម្ខាងទៀតនឹងព្រមផ្លាស់ប្ដូរខ្លួនគេដើម្បីយើង ប៉ុន្តែតាមការពិត មនុស្សម្នាក់អាចផ្លាស់ប្ដូរបានគឺនៅពេលដែលគេចង់ផ្លាស់ប្ដូរតែប៉ុណ្ណោះ កុំយល់ច្រឡំថាគេផ្លាស់ប្ដូរដើម្បីយើងអី។ មិនមែនមានន័យថាគេមិនអាចផ្លាស់ប្ដូរសោះនោះទេ វាអាចត្រឹមរឿងតូចតាច តែសម្រាប់សន្ដាន និងធម្មជាតិរបស់គេគឺប្រាកដជាមិនអាចផ្លាស់ប្ដូរបានឡើយ។

៤. អ្នករំពឹងខ្ពស់

អ្នកអាចនឹងកំពុងសម្លឹងរកមនុស្សប្រុសដែលមានទឹកចិត្តអធ្យាស្រ័យ មនុស្សប្រុសដែលមានផ្ទះជារបស់ខ្លួនឯង មនុស្សប្រុសពូកែធ្វើម្ហូប ...។ ការកំណត់គុណសម្បត្តិមនុស្សដែលខ្លួនស្រលាញ់បែបនេះ គឺជាការចាប់ផ្ដើមល្អ ប៉ុន្តែពេលខ្លះវាក៏ធ្វើឲ្យយើងផ្ដោតទៅលើគុណសម្បត្តិទាំងនេះខ្លាំងពេក និងមើលរំលងឱកាសដែលធំជាងនោះ។ សាកល្បងបើកចិត្តឲ្យទូលាយ អ្នកនឹងអាចរកឃើញថាមនុស្សប្រុសដែលមិនមានគុណសម្បត្តិគ្រប់គ្រាន់តាមដែលអ្នកចង់បាន អាចធ្វើឲ្យអ្នកភ្ញាក់ផ្អើលបំផុតក៏ថាបាន ៕

ចុចអានបន្ត៖

ប្រភព៖ issue247 ប្រែសម្រួល៖ ស្វាយ វ៉ាន់ថន