ដំណាក់កាលស្នេហាទាំង៥ មនុស្សភាគច្រើនឆ្លងមិនផុតដំណាក់កាលទី៣

2018-10-24 00:06:00
ចំនួនមតិ 0 | ចំនួនចែករំលែក 0

«គាត់/នាង មិនសមនឹងខ្ញុំទេ» គឺជាពាក្យ ដែលយើងតែងស្តាប់លឺ នៅពេលដែលនរណាម្នាក់បែកបាក់ស្នេហា។ ជួនកាល អ្នកប្រហែលជាអាចនិយាយពាក្យនេះ ប្រាប់ខ្លួនឯងក៏ថាបាន។ មនុស្សជាច្រើន តែងមានការងឿងឆ្ងល់ថា ហេតុអ្វីស្នេហាពិត អាចប្រែក្លាយជាប្រេះស្រាំបន្តិចម្តងៗ រហូតដល់ការបាក់បែកគ្នាទៅវិញ។

ចម្ងល់ទាំងនេះ ត្រូវបានស្រាយបំភ្លឺ ដោយចិត្តវិទូដ៏ល្បីល្បាញ គឺលោក Jed Diamond ដែលបានឈានដល់ការសន្និដ្ឋាន បន្ទាប់ពីធ្វើការសិក្សាស្រាវជ្រាវ អស់រយៈពេល ៤០ឆ្នាំ។ បញ្ហានោះគឺដោយសារតែ ពួកគេមិនអាចឆ្លងផុតដំណាក់កាលស្នេហា ទាំង៥ ដោយមនុស្សភាគច្រើន ឆ្លងមិនផុតដំណាក់កាលស្នេហាទី៣។

តើដំណាក់កាលស្នេហា ទាំង៥នោះ មានអ្វីខ្លះ? ហើយមានអត្ថន័យយ៉ាងណា?

១) ធ្លាក់ក្នុងអន្លង់ស្នេហ៍

ការធ្លាក់ក្នុងអន្លង់ស្នេហ៍ គឺជាដំណាក់កាលដំបូង នៅពេលដែលអ្នកកំពុងរស់ក្នុងក្តីស្រមៃ ដែលពោរពេញដោយសុភមង្គល។ ដៃគូរបស់អ្នក បានប្រែយ៉ាងឆាប់រហ័ស ក្លាយជាមនុស្សម្នាក់ ដែលល្អបំផុតសម្រាប់អ្នក។ គេមិនមានគុណវិបត្តិអ្វីទាំងអស់នៅក្នុងកែវភ្នែកអ្នក។ អ្នកជឿជាក់ថា គេអាចនឹងបំពេញរាល់បំណងរបស់អ្នក ហើយជឿជាក់រាល់ពាក្យសម្ដី ដែលគេបាននិយាយ។ អ្នកបានជឿជាក់យ៉ាងខ្លាំង លើអំណាចនៃសេចក្តីស្រលាញ់ ដោយគ្មានការសង្ស័យណាមួយ អាចធ្វើឲ្យអ្នកឈប់ និងគិតដោយប្រុងប្រយ័ត្នបន្តិចឡើយ។

រូបតំណាង

**២) ក្លាយជាគូស្នេហ៍**

នៅក្នុងដំណាក់កាលនេះ សេចក្តីស្រលាញ់បានកើនឡើងយ៉ាងខ្លាំង។ អ្នកបានស្គាល់ចិត្តគ្នាច្រើនជាងមុន ហើយវត្តមានរបស់អ្នក ចាប់ផ្តើមមានឥទ្ធិពលលើគ្រប់ទិដ្ឋភាពទាំងអស់ នៃជីវិតរបស់ដៃគូអ្នក។ វាគឺជាពេលវេលា នៃការរួបរួមគ្នា និងសប្បាយរីករាយ។ បន្ទាប់ពីឆ្លងកាត់បានច្រើនខែ ឬឆ្នាំ អ្នកជឿជាក់ថា អ្នកបានរកឃើញមនុស្សពិតប្រាកដម្នាក់ ដែលអាចដើរលើផ្លូវជីវិតជាមួយអ្នកបានហើយ។

រូបតំណាង

៣) ស្គាល់ចិត្តគ្នាច្បាស់

វាគឺជាអំឡុងពេលវេលាមួយ ដែលក្តីសង្ឃឹមរបស់អ្នក ត្រូវបានរសាត់ចេញទៅ។ អ្នកចាប់ផ្ដើមស្គាល់ដៃគូកាន់តែច្បាស់ ដឹងរាល់អត្ថន័យនៃកាយវិការរបស់គេ និងដឹងពីអ្វីដែលគេកំពុងគិត។ ដំណាក់កាលនេះគូស្នេហ៍ភាគច្រើនមិនអាចឆ្លងផុត ព្រោះពួកគេចាប់ផ្ដើមមើលឃើញបញ្ហានានាដែលធ្វើឲ្យពួកគេលែងមានអារម្មណ៍ជាមួយគ្នា និងរស់នៅជាមួយគ្នាតទៀតលែងបាន។

រូបតំណាង

៤) បង្កើតស្នេហាពិត និងយូរអង្វែង

ប្រសិនបើអ្នកខិតខំព្យាយាម និងពុះពាររាល់ឧបសគ្គ បើទោះបីជាមានការស្ទាក់ស្ទើរ នោះអ្នកអាចនឹងឆ្លងផុត ពីដំណាក់កាលទី៣។ នៅក្នុងដំណាក់កាលទី៤ នេះ ចិត្តរបស់អ្នកត្រូវបានដោះលែង ចេញពីរូបភាពបំភាន់ភ្នែក និងអារម្មណ៍រវើរវាយទាំងនោះ។ ដៃគូរបស់អ្នក មិនមែនជាមនុស្សដែលអ្នកបានស្រមៃនោះទេ ប៉ុន្តែគឺជាមនុស្សពិតប្រាកដម្នាក់ ដែលអាចដើរលើផ្លូវជីវិត ជាមួយអ្នកបាន ហើយវាក៏ជាពេលវេលា សម្រាប់ព្យាបាលរបួសស្នាម និងបន្តដំណើរទៅដំណាក់កាលចុងក្រោយ ផងដែរ។

រូបតំណាង

៥) ប្រើថាមពលស្នេហាដើម្បីផ្លាស់ប្តូរពិភពលោក

នៅក្នុងដំណាក់កាលទី៥ នេះ អ្នកដឹងថា អ្នកបានរៀនពីការពុះពារ និងជំនះលើការខ្វែងគំនិតគ្នា ហើយរកឃើញ ទំនាក់ទំនងដ៏ជ្រាលជ្រៅ ខ្លាំងក្លា និងយូរអង្វែងមួយ។ អ្នកអាចសន្និដ្ឋានថា ថាមពលស្នេហារវាងអ្នកទាំង២ អាចនឹងផ្លាស់ប្តូរអ្វីមួយ នៅក្នុងពិភពលោកនេះ។ ពេលនោះ អ្នកអាចនឹងខិតខំពុះពារ ឆ្លងកាត់អ្វីមួយជាមួយគ្នា រហូតដល់ទីបញ្ចប់ ហើយនិយាយថា «គាត់/នាង សក្ដិសមនឹងដើរលើផ្លូវនេះជាមួយខ្ញុំ»៕