៥ វិធីធ្វើឲ្យអ្នករីករាយជាមួយជីវិតនៅលីវ ដោយមិនបាច់មានស្នេហា

2018-10-17 06:06:16
ចំនួនមតិ 0 | ចំនួនចែករំលែក 0

គ្មានស្នេហា ពិភពលោកនេះពិបាករស់នៅណាស់មែនទេ? ស្នេហាគ្រាន់តែជាការបន្ថែមរសជាតិឲ្យជីវិតមនុស្សម្នាក់ៗតែប៉ុណ្ណោះ តែក៏មិនមែនឲ្យក្លាយជាផ្នែកទាំងស្រុងនៃជីវិតដែរ។

«ខ្ញុំធ្លាប់ខូចចិត្តលើរឿងស្នេហា ច្រើនជាងអ្នកផ្សេងគិតទៅទៀត តែខ្ញុំនៅតែអាចរស់បាន ហើយរស់បានយ៉ាងសប្បាយចិត្ត» នេះជាមួយឃ្លាដ៏មានន័យបំផុត ដែលនិយាយចេញពីមាត់មនុស្សស្រីម្នាក់។

ការពិតជីវិតនៅ Single មិនមែនឯកា មិនមែនគ្មានន័យនោះទេ តែមកពីយើងជាអ្នកបណ្ដោយជីវិតយើងតែប៉ុណ្ណោះ។ ៥វិធីខាងក្រោមនេះនឹងធ្វើឲ្យអ្នកសប្បាយចិត្តជាមួយជីវិតនៅលីវរបស់ខ្លួនឯង ដោយមិនចាំបាច់មានស្នេហាក៏បាន ៖

១. បង្កើតក្ដីសុខឲ្យខ្លួនឯង

មិនចាំដល់តែមានស្នេហាបានអ្នកអាចមានអារម្មណ៍ល្អ មានក្ដីសុខនោះទេ តែអ្នកអាចធ្វើវាសម្រាប់ខ្លួនឯងបាន។ បង្កើតថ្ងៃថ្មីរបស់អ្នកឲ្យបានល្អ ចំណាយពេលជាមួយអ្វីដែលអ្នកចូលចិត្ត អ្នកចង់ធ្វើ ហើយកុំចំណាយពេលខ្ជះខ្ជាយទៅលើមនុស្សគ្មានបានការទៀត។

២. ទម្លាប់នៅម្នាក់ឯងដោយមិនមានភាពឯកា

មានមនុស្សមួយចំនួនធំ គឺគេចមិនផុតពីអារម្មណ៍ឯកាឡើយ នៅពេលដែលពួកគេនៅតែឯង។ រឿងដែលល្អបំផុតគឺអ្នកអាចទម្លាប់ខ្លួនឲ្យរីករាយជាមួយខ្លួនឯងបាន។ អ្នកអាចចំណាយពេលអង្គុយផឹកកាហ្វេ ជជែកជាមួយមិត្តភក្តិ អ្នកអាចចេញទៅក្រៅថតរូបម្នាក់ឯង អ្នកអាចទៅផ្សារទិញអីវ៉ាន់ម្នាក់ឯង អ្នកអាចធ្វើអីដោយខ្លួនឯង ឬ អាចចំណាយពេលជាមួយគ្រួសារបាន ដោយមិនចាំបាច់យកស្នេហា។

៣. ជីវិតមានសេរីភាពពេញលេញ

មិនបាច់ខ្វល់ច្រើន មិនបាច់ត្រូវគិតថាអ្នកនេះចាំមើលផ្លូវ មិនបាច់ហត់នៅពេលដើរទៅណាម្ដងៗ ដោយសារត្រូវប្រាប់គេ។ ជីវិតមានគូដែលមិនសមប្រកបគឺដូចដាក់គុកខ្លួនឯងអីចឹង គឺគ្មានសេរីភាព គ្មានពេលវេលាសម្រាប់ខ្លួនឯង ដូច្នេះពេលគ្មានវាក៏ល្អ។

៤. មិនឲ្យអ្នកណាមកធ្វើបាបចិត្តអ្នក

បើជួបមនុស្សល្អ នោះវាជាសំណាងអ្នក តែបើមិនល្អវិញអ្នកអាចគ្រាំចិត្តស្លាប់បាន ដូច្នេះបើអ្នកគិតថាមិនចាំបាច់ទេ កុំទទួលអ្នកណាមកទុកក្នុងចិត្តអី។ អ្នកត្រូវស្រឡាញ់ខ្លួនឯង មិនឲ្យអ្នកណាមកធ្វើបាបបេះដូងអ្នកទៀត មិនឲ្យអ្នកណាមកបំផ្លាញទឹកចិត្តអ្នកទៀត នោះទើបជីវិតអ្នកមិនជួបរឿងឈឺចាប់។

៥. ឲ្យអាទិភាពលើរឿងផ្សេងទៀត

មានរឿងច្រើនណាស់ដែលអ្នកត្រូវគិត មិនមែនមានតែរឿងស្នេហាទេ។ ការងារ ការរៀនសូត្រ គ្រួសារ អនាគត និងក្ដីស្រមៃអ្នក នោះទើបជាអ្វីដែលអ្នកត្រូវគិត។ មានមនុស្សខ្លះស្រឡាញ់គេរហូតភ្លេចនូវរឿងទាំងអស់នោះ ហើយទើបតែស្ដាយក្រោយនៅពេលគេបែកបាក់ស្នេហា ដូច្នេះអ្នកមិនគួរណាបំភ្លេចរឿងទាំងនេះចោល ហើយគិតតែពីរឿងមនោសញ្ចេតនាពេកទេ។