កុំលើកលែងឲ្យមនុស្សដែលធ្លាប់មើលងាយមនោសញ្ចេតនារបស់អ្នកឲ្យសោះ

2018-10-16 03:00:00
ចំនួនមតិ 0 | ចំនួនចែករំលែក 0

មនុស្សស្រីដែលត្រូវគេក្បត់ត្រូវចងចាំថា៖ កុំលើកលែងឲ្យអ្នកដែលមិនឲ្យតម្លៃយុវភាព និងមនោសញ្ចេតនារបស់អ្នកឲ្យសោះ ព្រោះគេមិនស័ក្ដិសមនឹងទទួលការលើកលែងនេះឡើយ។

រូបតំណាង

តាំងពីដើមមក គេតែងថា៖ មនុស្សប្រុសប្រៀបដូចមាសទឹកដប់ ឯមនុស្សស្រីប្រៀបដូចកន្សែងស មានន័យថាទោះបីជាមានស្រីប៉ុណ្ណាក៏មិនអស់តម្លៃដែរ តែមនុស្សស្រីបើឆ្លងកាត់តែបុរសម្នាក់ គឺស្ទើរតែខូចឈ្មោះទៅហើយ។ អាស្រ័យហេតុនេះ ពេលខ្លះមនុស្សស្រីដឹងថាសង្សារខ្លួនសាវាហើយនៅតែទ្រាំ។ ទ្រាំដោយមូលហេតុច្រើន ព្រោះមិនចង់ឲ្យបាត់បង់គេគឺមួយ តែមួយវិញទៀតនោះគឺខ្លាចខូចឈ្មោះ។

សម្រាប់នារីមានប្ដីវិញ ពេលខ្លះកេរ្តិ៍ឈ្មោះក៏លែងខ្លាចខូចដែរ តែមិនហ៊ានលែងលះឡើយ ព្រោះខ្លាចកូនកំព្រាឪពុក។ ប៉ុន្តែគួរឲ្យអស់សំណើចដែរ ព្រោះមានករណីខ្លះ ប្ដីលែងត្រូវការប្រពន្ធ កូន មិនខ្ចីនឹកដល់ផ្ទះសម្បែងដែលខំកសាងឡើងទៀត តែប្រពន្ធនៅតែប្រឹងអូសទាញ។ ទង្វើនេះកំពុងតែបន្ទាបតម្លៃខ្លួនឯងហើយ។ ឧទាហរណ៍ថាលើកលែងឲ្យគេលើកនេះចុះ មានអ្នកណាទៅធានាថាគេមិនទៅតាមទម្លាប់ចាស់ទៀត។ ត្រូវចាំថា មិនត្រូវជឿពាក្យស្បថសស្បែរបស់មនុស្សក្បត់ឡើយ គេស្បថជាមួយយើងបាន គេក៏ស្បថជាមួយស្រី១០០នាក់ទៀតដែរ។ សាវាគឺជាចរិតនៅក្នុងឈាមគេទៅហើយ មានមួយដង នឹងមានពីរដង។ ឈឺម្ដងពីរដងគឺគ្រប់គ្រាន់ហើយ កុំទុកដល់ថ្នាក់អស់ទឹកភ្នែកហើយទើបដឹងខ្លួននោះ ពេលនោះយឺតពេលខ្លាំងណាស់។

បើបុរសម្នាក់ជាន់ឈ្លី និងមើលងាយមនោសញ្ចេតនា និងសេចក្ដីទុកចិត្តរបស់អ្នកនោះ គេត្រូវតែទទួលនូវអ្វីដែលគេបានសាង។ វាគឺជាការមើលងាយមនោសញ្ចេតនារបស់គេ មិនឲ្យតម្លៃគេ។ នៅពេលនេះ ភារកិច្ចរបស់មនុស្សស្រីគឺដោះគេចេញពីចិត្ត ហើយមិនលើកលែងឲ្យគេជាលើកទី២ដាច់ខាត៕