បុរសល្អជាបុរសដែលអាចធ្វើឲ្យមនុស្សស្រីញញឹមច្រើនជាងយំ ហើយថែរក្សានាងបានយូរ

2018-10-16 07:23:45
ចំនួនមតិ 0 | ចំនួនចែករំលែក 0

មនុស្សប្រុសបែបណាទៅដែលអាចហៅបានថាជាមនុស្សប្រុសល្អនោះ? ពាក្យថា«ល្អ» សម្រាប់អ្នកផ្សេងប្រហែលត្រូវមានលក្ខណៈសម្បត្តិច្រើន ប៉ុន្តែចំពោះខ្ញុំ មនុស្សប្រុសល្អម្នាក់គឺជាមនុស្សប្រុសដែលអាចធ្វើឲ្យមនុស្សស្រីម្នាក់ញញឹមច្រើនជាងយំ ហើយគេអាចថែរក្សានាងបានយូរអង្វែងតទៅ។

ទោះមនុស្សប្រុសនោះមានទ្រព្យប៉ុណ្ណា សង្ហាប៉ុណ្ណា មានកិត្តិយស បុណ្យស័ក្ដិ ចំណេះដឹងប៉ុណ្ណា ចរិតមាយាទបានប៉ុណ្ណាក៏ដោយ តែចំពោះរឿងស្នេហាបើមនុស្សប្រុសម្នាក់នោះមិនអាចធ្វើឲ្យមនុស្សស្រីម្នាក់សប្បាយចិត្តបាននោះ គេនៅតែជាមនុស្សប្រុសអាក្រក់សម្រាប់ខ្ញុំ។

មនុស្សប្រុសដែលធ្វើឲ្យមនុស្សស្រីយំ គឺជាមនុស្សប្រុសម្នាក់ដែលអន់ ព្រោះគ្រាន់តែស្នាមញញឹមសោះក៏គេមិនអាចរកឲ្យមនុស្សស្រីម្នាក់នោះ គេមិនសមជាមនុស្សប្រុសល្អឡើយ ហើយរឹតតែគ្មានសមត្ថភាពធ្វើជាមេគ្រួសារដែលខ្ញុំត្រូវទទួលយកមកបង្កើតវិថីជីវិតជាមួយគ្នា។

សុភមង្គលសម្រាប់មនុស្សស្រីមិនមែនគ្រាន់តែអាចរកមនុស្សប្រុសអ្នកមានម្នាក់មកដេកស៊ី ចាយវាយតាមតែចិត្តនោះទេ តែវាជាជីវិតមួយដែលនាងអាចរកឃើញមនុស្សប្រុសម្នាក់ដែលអាចធ្វើឲ្យជីវិតនាងពោរពេញដោយស្នាមញញឹមបាន។

បើគ្រាន់តែយកមនុស្សប្រុសសម្រាប់តែផ្គត់ផ្គង់រឿងលុយកាក់ ខ្ញុំមិនចាំបាច់មានក៏បានដែរ ព្រោះខ្ញុំអាចផ្គត់ផ្គង់ខ្លួនឯងបាន។ បើយកមនុស្សប្រុសម្នាក់គ្រាន់តែកុំឲ្យខ្ញុំជាប់ឈ្មោះ ក្រមុំចាស់នោះ ខ្ញុំសុខចិត្តនៅក្រមុំចាស់ ក៏គ្រាន់បើជាងឲ្យខ្ញុំរៀបការជាមួយមនុស្សដែលមិនបានធ្វើឲ្យជីវិតខ្ញុំរីករាយ។

មនុស្ស ២នាក់អាចជួបគ្នាបាន ហើយអាចស្រឡាញ់គ្នាបាន មិនមែនជារឿងចៃដន្យនោះទេ តែវាសុទ្ធតែជានិស្ស័យ បុណ្យវាសនាដែលបានធ្វើរួមគ្នាពីអតីតជាតិ។ បើអ្នកបើជួបមនុស្សស្រីល្អម្នាក់ហើយ ចូរកុំធ្វើបាបនាងអី ហើយសុំអ្នកថែរក្សានាងមួយទល់នឹងមួយរហូតទៅផង ព្រោះពេលខ្លះបុណ្យវាសនាក៏មិនអាចជួយអ្នកបានដែរ បើអ្នកមិនចេះថែរក្សារបស់ល្អហើយ។