គំនិតត្រិះរិះ ៥ ដែលអ្នកត្រូវចងចាំប្រសិនបើជួបថ្ងៃបាក់ទឹកចិត្តបំផុត
- 2018-10-15 05:54:27
- ចំនួនមតិ 0 | ចំនួនចែករំលែក 0
គំនិតត្រិះរិះ ៥ ដែលអ្នកត្រូវចងចាំប្រសិនបើជួបថ្ងៃបាក់ទឹកចិត្តបំផុត
នរណាៗក៏ធ្លាប់ជួបថ្ងៃស៊យ ឬថ្ងៃបាក់ទឹកចិត្តបំផុតដែរ តែយ៉ាងណាក្តីអ្នកត្រូវចេះរៀនពីវិធីជម្រុញខ្លួនឯងឱ្យឆ្លងផុតដំណាក់កាលដ៏អាក្រក់មួយនេះ ព្រោះវាមិនមែនកើតឡើងគ្រប់ពេលរហូតទេ។ ប្រសិនបើអ្នកកំពុងស្ថិតក្នុងស្ថានភាពទាំងនោះមែន គួរគប្បីយកគំនិត ៥យ៉ាងខាងក្រោមនេះ មកពិចារណា វាប្រហែលជាអាចជួយអ្នកឱ្យមានកម្លាំងចិត្តតស៊ូឡើងវិញ។
១. «មួយជំហានបន្ទាប់» ជាអ្វីដែលត្រូវធ្វើ!
នៅពេលអ្នកកំពុងស្ថិតក្នុងស្ថានភាពលំបាកណាមួយ អ្នកច្បាស់ជាមានអារម្មណ៍ដូចដុំថ្មមកសង្កត់ក្បាលអ៊ីចឹង។ មនុស្សភាគច្រើនតែងតែភ្លេចខ្លួន ហើយយករឿងដែលស្មុគស្មាញមកគិត (គិតប្រទាក់ក្រឡាគ្នា) ប៉ុន្តែវាមិនបានប្រយោជន៍អ្វីធំដុំទេគឺមានតែដាក់សម្ពាធមកលើខ្លួនឯងកាន់តែខ្លាំងប៉ុណ្ណោះ។ អ្នកត្រូវគិតនូវអ្វីដែលខ្លួនអាចធ្វើបានជាមុនសិនសម្រាប់មួយជំហានបន្ទាប់ខាងមុខនេះ កុំខ្វល់ខ្វាយពីលទ្ធផលដែលមិនទាន់កើតឡើងខ្លាំងពេក។
**២. «គិតអាក្រក់កម្រិតណា ស្ថានការណ៍នឹងអាក្រក់កម្រិតនោះ»**
អ្នកនឹងកាន់តែបាក់ទឹកចិត្តថែមមួយកម្រិតទៀត ប្រសិនបើអ្នកគិតអ្វីដែលអវិជ្ជមានខ្លាំងពេក។ ត្រូវគិតអ្វីដែលល្អៗហើយជឿជាក់លើសមត្ថភាពខ្លួនឯង។
៣. «រឿងអាក្រក់ពាំនាំមកនូវរឿងល្អ»
វាសនាកំណត់មកឱ្យអ្នកត្រាំត្រែងក្នុងស្ថានភាពលំបាកបែបនេះ គឺដើម្បីហ្វឹកហាត់អ្នកតែប៉ុណ្ណោះ បើអ្នកមិនលំបាកថ្ងៃនេះធ្វើម៉េចថ្ងៃក្រោយអ្នកនឹងសម្រេចបាននូវរឿងល្អៗ។
៤. «វានឹងកន្លងផុតទៅ»
គ្រប់យ៉ាងអាចនឹងមិនល្អរហូតទេតែក៏មិនប្រាកដថាអាក្រក់រហូតដែរ ដរាបណាព្រះអាទិត្យនៅតែរះ អ្នកនៅតែមានសង្ឃឹម។ ផ្តល់កម្លាំងចិត្តឱ្យខ្លួនឯងហើយក្រោកឡើងដើម្បីបន្តដំណើរទៅមុខទៀត។
៥. អ្នកមិនមែនជាជនរងគ្រោះទេ
កុំគិតថាខ្លួនឯងជាជនរងគ្រោះក្នុងស្ថានភាពនេះឱ្យសោះ ហើយក៏កុំឱ្យអ្នកដទៃមកវាយតម្លៃថាអ្នកជាជនរងគ្រោះដែរ។ ពេលខ្លះភាពសោកសៅ និងការអាណិតខ្លួនឯងពេកគឺកាន់តែធ្វើឱ្យខ្លួនឯងទន់ជ្រាយទៅវិញទេ៕
ចុចអាន៖ដល់ពេលផ្ដល់ក្ដីសុខខ្លួនឯងដោយគ្មានល័ក្ខខ័ណ្ឌ មនុស្សគ្រប់គ្នាត្រូវតែធ្វើ