ប្ដី៨ប្រភេទ ទោះបីជាមានលុយគរដូចភ្នំក៏មិនគួយក ប្រយ័ត្នគ្រាំទុក្ខ

2018-10-13 03:30:00
ចំនួនមតិ 0 | ចំនួនចែករំលែក 0

រឿងយកប្ដីប្រៀបដួចជាល្បែងភ្នាល់ដាក់ជីវិតដែរ បើភ្នាល់ត្រូវ នឹងសោយសុខមួយជីវិត បើភ្នាល់ខុសនឹងរងទុក្ខពេញមួយជីវិត។ នៅលើលោកនេះគ្មានអ្នកណាដែលថាល្អឥតខ្ចោះនោះឡើយ រមែងតែងមានចន្លោះខ្វះខាតគ្រប់ៗគ្នា។ រើសប្ដីក៏ដូចគ្នា បើយើងទាមទារប្ដីឲ្យល្អគ្រប់១០ប្រាកដជាគ្មានឡើយ។ យ៉ាងណាក្ដី ក៏មិនអាចរើសដោយមិនគិតគូរម៉ត់ចត់បានឡើយ ត្បិតប្ដីគឺជាសសរដែលយើងពឹងពាក់ពេញមួយជីវិត។ គំរូប្ដីខាងក្រោមគឺជាប្រភេទមនុស្សដែលមិនគួរយកធ្វើជាគូយូអង្វែងសោះ ព្រោះអាចនាំទុក្ខមកច្រើនជាសុខ។

១. បុរសពូកែផ្លែផ្កា

មិនវាយតម្លៃទាំងអស់ឡើយ តែមនុស្សប្រុសពូកែសម្ដី តែភ្ជាប់មកជាមួយចិត្តសាវា។ កុំរំពឹងថាខ្លួនជាមនុស្សចុងក្រោយរបស់គេឲ្យសោះបើប៉ះបានប្ដីពូកែផ្លែផ្កា។ មនុស្សប្រុសបែបនេះ ទោះនៅតែឯងក៏មានស្រីចោមរោមដែរ។

២. មនុស្សស្អាតខ្លាំងពេក

ប្រុសស្អាតតែងទាក់ទាញនារីៗជាច្រើន។ ដូចនេះមិនខុសពីបុរសផ្លែផ្កានោះទេ ពួកគេមានជម្រើសច្រើនក្នុងរឿងមនោសញ្ចេតនា ដែលងាយធ្វើឲ្យគេធុញទ្រាន់នឹងយើង។ ប្រុសស្អាតបើមានទេពកោសល្យតែបន្តិចទៀតនោះ ស្រីៗប្រាកដជារត់ទៅរកតែម្ដង ដល់ពេលនោះយើងនឹងទៅកន្លៀតមិនខាន។

៣. បុរសនៅក្នុងភ្នែកមានតែការងារ

មនុស្សស្រីតែងត្រូវបានទាក់ទាញដោយបុរសដែលមានការងារល្អ អាជីពភ្លឺស្វាង។ តែជីវិតទាន់សម័យ ទាំងប្រុស និងស្រីត្រូវចែករំលែកការងារផ្ទះគ្នា។ តែបុរសរវល់តែការងារប្រាកដជាប្រគល់ការងារផ្ទះ មើលកូន ដើរផ្សារទៅប្រពន្ធទាំងអស់។ ដូចនេះប្រសិនបើអ្នកអាចពលីធ្វើរឿងនេះបានទាំងអស់ក៏យកប្ដីបែបនេះចុះ។

៤. បុរសហិង្សា

បុរសដែលវាយមនុស្សស្រីមិនត្រឹមតែអាក្រក់នោះទេ ថែមទាំងថោកទៀតផង។ វាយមនុស្សដែលមានកម្លាំងខ្សោយជាងខ្លួនគឺអន់ទៅហើយ តែបើវាយមនុស្សដែលធ្លាប់កម្សត់កម្រនឹងគ្នាទៀតនោះ មនុស្សប្រភេទនេះគឺកែលែងឡើងហើយ។

៥. បុរសកំរិះ

ទោះបីជាក្រ ឬមានក្ដី តែបើគេជាមនុស្សកំរិះ អ្នកគួរបញ្ឈប់ចំណងមនោសញ្ចេតនានេះកាន់តែឆាប់កាន់តែល្អ។ ត្រូវបែងចែករវាង កំរិះ និងសន្សំឲ្យដាច់។ មនុស្សសន្សំសំចៃតែងគិតដិតដល់មុនពេលចាយវាយ តែនឹងចាយសម្រាប់រឿងដែលត្រូវការ។ រីឯមនុស្សកំរិះវិញគឺជាប្រភេទមនុស្សដែលនឹងមិនចាយវាយសោះតែម្ដង ទោះបីជារឿងនោះចាំបាច់ដល់ថ្នាក់ក៏ដោយ។

៦. បុរសខ្មោចល្បែង

គ្មានខ្មោចណាលងសាហាវជាងខ្មោចល្បែងនោះឡើយ ចង់គ្រូអាចារ្យមកពីណាក៏មិនអាចបណ្ដេញចេញបានឡើយ ទាល់តែរលាយរលត់អស់ទ្រព្យពីផ្ទះ និងជំពាក់គេជុំទិសរហូតដល់វណ្ឌកខ្ចីគេលែងបានហើយ ទើបខ្មោចព្រមចេញ។ បើប៉ះចំប្ដីប្រភេទនេះហើយ ប្ដីវិនាស យើងក៏មិនចំរើនដែរ។

៧. បុរសប្រមឹកខួប

ស្រដៀងគ្នានឹងប្ដីលេងល្បែងដែរ ប្ដីដែលត្រូវខ្មោចសុរាចូលហើយ ក៏មិនងាយចេញដូចគ្នា។ យកប្ដីប្រមឹកខួប អាចនឹងត្រូវរងគ្រោះដោយអំពើហិង្សា និងយកឥវ៉ាន់ក្នុងផ្ទះទៅលក់ដើម្បីតែបំពេញចំណង់របស់ខ្លួន។

៨. គម្លាតចំណេះដឹងខុសគ្នាពេក

រឿងចំណេះដឹងគឺមិនអាចមើលស្រាលបានឡើយ ព្រោះបើខុសគ្នាខ្លាំងពេក នោះមិនអាចរស់នៅចុះសម្រុងគ្នាបានឡើយ។ បើយកប្ដីចំណេះដឹងខ្ពស់ជាងយើងខ្លាំងពេក នៅពេលប្រកែកគ្នា គេនឹងនិយាយទ្រឹស្ដីដែលអ្នកមិនអាចយល់បាន។ រីឯបើយកប្ដីចំណេះដឹងទាបពេក គេនឹងមិនយល់ពីគំនិតរបស់អ្នកឡើយ៕