៧កំហុសធំៗនៅកន្លែងធ្វើការដែលមនុស្សភាគច្រើនប្រព្រឹត្តដោយមិនដឹងខ្លួន

2018-10-01 07:08:50
ចំនួនមតិ 0 | ចំនួនចែករំលែក 0

ប្រសិនបើអ្នកគិតថាទំនាក់ទំនងរវាងមិត្តរួមការងារគ្មានអ្វីសំខាន់ វាជាការយល់ខុស។ ការងារអាចរលូនទៅមុខបាន កាលណាអ្នកមានទំនាក់ទំនងល្អជាមួយមនុស្សដែលធ្វើការឃើញមុខគ្នារៀងរាល់ថ្ងៃ។ ពេលខ្លះអ្នកបានប្រព្រឹត្តកំហុសមួយចំនួនដោយមិនដឹងខ្លួន ដូច្នេះដើម្បីការពារបញ្ហាទាំងនោះកុំឲ្យកើតមានឡើង មានចំណុចសំខាន់ៗជាច្រើនដែលអ្នកគួរជៀសវាង។

១. មិនចាំឈ្មោះ

ទើបតែចូលធ្វើការនៅកន្លែងថ្មី ត្រូវព្យាយាមចាំឈ្មោះ ព្រោះការហៅឈ្មោះរបស់មិត្តរួមការងារ នៅពេលណាដែលជួបគ្នាដោយចៃដន្យ អាចសបញ្ជាក់ពីការគោរពរបស់អ្នកទៅកាន់ម្នាក់នោះ។

២. មិនចែករំលែករបស់ឆ្ងាញ់ជាមួយគ្នា

ការចេះចែករំលែករបស់ឆ្ងាញ់ជាមួយគ្នា បង្ហាញពីទឹកចិត្តរបស់អ្នក។ មិនចាំបាច់ចំណាយលុយច្រើនពេក ត្រឹមនំធម្មតាៗ ក៏អាចឆ្អែតនិងបង្កើនបរិយាកាសដល់ក្រុមការងារទាំងមូលបានដែរ។

៣. មិនហ៊ានAdd អ្នកធ្វើការនៅក្រុមហ៊ុនជាមួយគ្នា ក្នុងបណ្តាញសង្គម

បើអ្នកចង់រៀនសូត្រដឹងពីក្រុមហ៊ុនកាន់តែច្បាស់ គួរបង្កើតមិត្តក្នុងក្រុមហ៊ុនតាមរយៈបណ្តាញសង្គម ដើម្បីដឹងពីព័ត៌មាននិងសមិទ្ធផលនានា ដែលពួកគេធ្លាប់ទទួលបាន។ យ៉ាងណាអ្នកត្រូវដឹងថាអ្វីគួរ និយាយនិងអ្វីមិនគួរ។

៤. ព្យាយាមមានទំនាក់ទំនងជ្រុលហួសហេតុពេក

ពិតណាស់ ការជជែកគ្នាលេងធ្វើឲ្យអ្នកកាន់តែមានភាពស្និទ្ធស្នាលជាងមុន ប៉ុន្តែគួរកំណត់បែបបទនៃការសន្ទនាឲ្យបានសមរម្យ ព្រោះអ្នកខ្លះមិនចូលចិត្តនិយាយច្រើននោះទេ។ មិនត្រូវប្រញាប់ប្រញាល់ ធ្វើជាស្គាល់គេលឿនជ្រុលពេក ជាពិសេសហាមដាច់ខាតសួរពីរឿងផ្ទាល់ខ្លួន។

៥. មិននិយាយសរសើរ

មានចិត្តទូលាយ ដោយចេះសរសើរពេលឃើញគេល្អ ប៉ុន្តែមិនមែនជាការបញ្ជោរ។ ត្រូវសរសើរដោយស្មោះត្រង់ មានហេតុផល និយាយអ្វីដែលជាការពិតមិនពន្លើស។

៦. មិនឈរនៅកណ្តាល

ប្រសិនបើឃើញនរណាម្នាក់កំពុងតែមានគំនិតខ្វែងគ្នា មិនត្រូវលម្អៀងទៅម្ខាងៗឡើយ ព្រោះបើអ្នកមិនឈរនៅកណ្តាល នោះរឿងរ៉ាវនឹងកាន់តែអាក្រក់ជាងមុន។

៧. មិនប្រយ័ត្នប្រយែងចំពោះកាយវិការពេលសន្ទនា

កាយវិការពិតជាសំខាន់ណាស់ពេលនិយាយសន្ទនាជាមួយអ្នកដទៃ ជាពិសេសត្រូវមានទឹកមុខរួសរាយ និងចេះប្រើសំឡេងឲ្យបានសមរម្យ។ ពេលនិយាយហាមយករបស់កាន់នៅដៃ ទៅចង្អុលនេះចង្អុលនោះ។