១៣សំណួរចម្លើយពីជីវិត ចំណាយពេលអាន៣នាទី ចំណេញប្រយោជន៍មួយជីវិត

2018-10-02 08:43:07
ចំនួនមតិ 0 | ចំនួនចែករំលែក 0

១. ខ្លាចកូនបែកឆ្វេងក្នុងវ័យសិក្សា?

បើមិនចង់ឲ្យវាកើត ត្រូវបណ្ដុះឲ្យកូនមានប្រាជ្ញា។ ឲ្យលុយកូនតិចតួច ប៉ុន្តែត្រូវឲ្យគំនិត និងចំណេះឲ្យច្រើន ជេរកូនតិចតួច ប៉ុន្តែត្រូវផ្ដល់ការទូន្មានឲ្យកូនឲ្យច្រើន។

២. ពេលថ្វាយបង្គំព្រះគួរសុំពរអ្វីល្អ?

(១) សូមកុំឲ្យក្លាយជាមនុស្សលោភរហូតមោហ៍បាំង

(២) សូមកុំឲ្យខឹងខ្លាំងរហូតធ្វើបាបខ្លួនឯង

(៣) សូមកុំឲ្យវង្វេងរហូតលែងដឹងអ្វីល្អអ្វីអាក្រក់

(៤) សូមកុំឲ្យស្លាប់ក្នុងសង្គ្រាម... រវាងសាច់ឈាម/ជាតិសាសន៍ឯង

រូបតំណាង

**៣. ហត់នឿយនឹងបញ្ហាជីវិតច្រើនគួរធ្វើយ៉ាងណា?**

ត្រីដែលនៅរស់ សុទ្ធតែត្រូវរៀនហែលបញ្ច្រាសទឹក ចំណែកត្រីដែលងាប់ ច្រើនហែលតាមទឹកហូរ។ បញ្ហាធ្វើឲ្យមនុស្សធម្មតាចុះចាញ់ ប៉ុន្តែវាធ្វើឲ្យមនុស្សមានប្រាជ្ញាក្រោកឡើងមកដោះស្រាយ។

៤. ឈ្លោះជាមួយគូស្នេហ៍រហូតលែងមានសមាធិសម្រាប់ការងារ?

ការងារគឺការងារ ស្នេហាគឺស្នេហា។ ត្រូវចេះចែករំលែកពេលវេលាឲ្យការងារ ហើយក៏ត្រូវចេះបែងចែកពេលវេលាឲ្យគូស្នេហ៍របស់ខ្លួនដែរ។ កុំបោះបង់ការងារព្រោះស្នេហា កុំបោះបង់ស្នេហាព្រោះការងារ។

៥. ខឹងមិត្តនិយាយដើម?

បុរាណពោលថា គ្មាននរណាទៅទាត់ឆ្កែងាប់នោះទេ។ បើអ្នកត្រូវគេនិយាយដើម គឺមានន័យថាអ្នកនៅមានន័យ... អ្នកគឺជាមនុស្សមានសំណាង ដែលនៅសុខៗក៏មានកញ្ចក់ពិសេសសម្រាប់ឆ្លុះឃើញចំណុចមិនល្អរបស់ខ្លួនឯង។

៦. ចាប់បានថាគូស្នេហ៍មានសហាយស្មន់គួរធ្វើយ៉ាងណា?

(១) សួរខ្លួនឯងថាបានធ្វើល្អជាមួយគេគ្រប់គ្រាន់ឬនៅ

(២) រវាងយើងនិងសហាយរបស់គេ មានចំណុចល្អ និងមិនល្អខុសគ្នាបែបណា

(៣) សួរគូស្នេហ៍របស់យើងថា គេរើសយកអ្នកណា ហើយរើសឲ្យប្រញាប់។ បើគេមិនស្រលាញ់យើង កុំធ្វើឲ្យយើងខាតពេលទៀត។

រូបតំណាង

៧. ត្រូវមិត្តនៅកន្លែងធ្វើការដណ្ដើមយកមុខយកមាត់ត្រូវធ្វើយ៉ាងណា?

គេដណ្ដើមយើងបានត្រឹមតែមុខមាត់មួយពេលៗប៉ុណ្ណោះ ប៉ុន្តែគេមិនអាចដណ្ដើមចំណេះដឹង និងសមត្ថភាពរបស់យើងទៅបាននោះទេ។

៨. ការងារច្រើនខ្លាំង គួរធ្វើយ៉ាងណាល្អ?

(១) ដឹងថាការងារច្រើន ត្រូវប្រញាប់ធ្វើ

(២) កុំទុកការងារគចោល ឆ្លងខែឆ្លងឆ្នាំ

(៣) រៀបលំដាប់ការងារណាសំខាន់ខ្លាំងធ្វើមុន ការងារណាសំខាន់តិច ទុកធ្វើតាមក្រោយ

៩. ធ្វើការបានល្អ ប៉ុន្តែជួបតែមនុស្សឈ្នានីស?

បុរាណពោលថា ឈើធំតែងមានគេកាប់ មនុស្សលេចធ្លោតែងមានអ្នករិះគន់ មនុស្សមានសមត្ថភាពទើបមានគេចង់ផ្ដួល ដូច្នេះធ្វើការល្អរហូតមានអ្នកតាមឈ្នានីសវាជារឿងធម្មតា។ ធ្វើការពូកែរហូតមានអ្នកឈ្នានីស វាល្អជាងធ្វើការមិនពូកែ ប៉ុន្តែពូកែខាងឈ្នានីស។

១០. ធ្វើការជិតស្លាប់ ប្រាក់ខែចាយមិនគ្រប់គួរធ្វើយ៉ាងណា?

(១) រកការងារថ្មី ដែលអាចផ្ដល់កម្រៃច្រើនជាងមុន ឬសក្ដិសមតាមសមត្ថភាព

(២) កាត់បន្ថយការចំណាយមិនចាំបាច់ រស់នៅជាមួយការពិតឲ្យបានច្រើន

(៣) ហូបម្ហូបអាហារ ឬប្រើរបស់របរដោយគិតពីប្រយោជន៍ កុំគិតតែល្អមើល

(៤) ធ្វើបញ្ជីចំណូលចំណាយ បើចំណូលច្រើនជាងចំណាយគឺល្អ តែបើចំណាយច្រើនជាងចំណូលចាត់ទុកថាមិនល្អ។

១១. ជួបអតិថិជនសាំញ៉ាំគួរធ្វើយ៉ាងណា?

មានអតិថិជនសាំញ៉ាំគ្រាន់បើជាង ពេញមួយថ្ងៃគ្មានអ្នកចូលហាងម្នាក់។ អតិថិជនអាចសាំញ៉ាំបាន ប៉ុន្តែអ្នកត្រូវព្យាយាមធ្វើយ៉ាងណាឲ្យគេពេញចិត្តជានិច្ច។

១២. ថ្ងៃកំណើតគួរប្រាថ្នាអ្វី?

(១) សួរខ្លួនឯងថា យើងកើតមកដើម្បីអ្វី?

(២) សួរខ្លួនឯងថា យើងកើតចេញមកពីអ្នកណា?

(៣) សួរខ្លួនឯងថា យើងកតញ្ញូចំពោះអ្នកដែលផ្ដល់កំណើតឲ្យយើងឬនៅ?

១៣. ស្ថិតក្នុងក្រុមមិត្តភ័ក្ដិដែលចូលចិត្តនិយាយដើមគេ ល្អអត់?

ព្រះពុទ្ធពោលថា អ្នកដែលចូលចិត្តនិយាយដើម ខ្សឹបខ្សៀវរឿងអ្នកដទៃគឺជាអ្នកដែលចូលចិត្តហូបរបស់ស្អុយ។ បើយើងតែងចូលរួមជាមួយពួកគេ នោះបង្ហាញថាយើងក៏ចូលចិត្តរបស់ស្អុយមិនចាញ់គេប៉ុន្មានដែរ ៕

ចុចអាន៖

ប្រភព៖ rugyim ប្រែសម្រួល៖ ស្វាយ វ៉ាន់ថន