មករៀនធ្វើទឹកសម្រស់ Detox Water ដើម្បីសុខភាពល្អផង សម្រស់ស្អាតស្ថិតស្ថេរផង

2018-09-02 05:07:00
ចំនួនមតិ 0 | ចំនួនចែករំលែក 0

ការចិតផ្លែឈើដាក់ក្នុងទឹក ឬហៅថា Detox Water អាចជួយរាងកាយបានយ៉ាងច្រើន។ វាមិនខុសពីទឹកធម្មតាដែលអ្នកញ៉ាំរាល់ថ្ងៃ ប៉ុន្តែសារធាតុបំប៉នរបស់ផ្លែឈើ និងរុក្ខជាតិដែលដាក់លាយជាមួយទឹកនោះ អាចបន្ថែមជីវជាតិដល់រាងកាយបានល្អ និងសម្រួលប្រព័ន្ធធ្វើការក្នុងរាងកាយបានទៀតផង។ វិធីងាយៗ ដោយគ្រាន់តែយកផ្លែឈើដូចខាងក្រោមមកចិតជាចំណិតស្ដើង ឬតូចៗហើយដាក់ចូលក្នុងកែវទឹកដែលត្រូវញ៉ាំរាល់ថ្ងៃជាការស្រេច។

១. ប្រើក្រូចឆ្មារនិងត្រសក់

ផ្លែទាំងពីរមុខនេះគឺជាគ្រឿងផ្សំដ៏សំខាន់សម្រាប់ស្ត្រីមេផ្ទះដើម្បីចម្អិនម្ហូបប្រចាំថ្ងៃ។ ប៉ុន្តែដើម្បីបានទាំងសម្រស់ និងសុខភាព ហើយអ្នកមិនចង់ញ៉ាំវាជាអាហារដែលចម្អិន គួរងាកមកសាកល្បងការយកផ្លែឈើទាំងពីរមកដាក់ក្នុងទឹកញ៉ាំវិញ។

អ្វីដែលអ្នកត្រូវការគឺ ក្រូចឆ្មារកន្លះផ្លែ ត្រសក់កន្លះផ្លែ ជីរអង្កាម៤ ៥សន្លឹក និងទឹកត្រជាក់៣០០ម.ល។ វិធីធ្វើគឺចិតផ្លែទាំងពីរខាងលើជាចំណិតស្ដើងៗ ដាក់ចូលកែវ ចាក់ទឹកត្រជាក់ចូល និងស្លឹកជីរអង្កាម រួចយកទៅដាក់ក្លាសសេបន្ថែមក៏បាន ញ៉ាំភ្លាមក៏បាន។ វិធីនេះអាចធ្វើញ៉ាំជាប្រចាំដើម្បីជំនួយដល់ប្រព័ន្ធរំលាយអាហារ និងបញ្ចុះទម្ងន់។

២. ស្ត្រូបឺរី និងក្រូចឆ្មារ

គ្រឿងផ្សំទាំងពីរអាចជួយអ្នកឱ្យទទួលបានស្បែកស្អាត ម៉ត់រលោង ព្រោះផ្លែត្រកូលបឺរីមានឥទ្ធិពលក្នុងការប្រឆាំងភាពចាស់ និងធ្វើឱ្យស្បែកមានសុខភាពល្អ។ ចិតក្រូចឆ្មារ និងស្ត្រូបឺរី ស្ដើងៗដាក់ចូលកែវដូចវិធីខាងលើដែរ រួចបន្ថែមជីរអង្កាម ហើយអាចញ៉ាំបានតែម្ដង។

៣.ស្ត្រូបឺរី និងគីវី

ដើម្បីប្រឆាំងអុកស៊ីតកម្ម និងបញ្ចុះកូលេស្តេរ៉ូល អ្នកគួរញ៉ាំទឹកដែលដាក់ផ្លែឈើទាំងពីរមុខនេះ។ ក្រៅពីអាចព្យាបាលអាការៈទាំងពីរនេះបាន ផ្លែឈើទាំងពីរអាចជួយផ្ដល់ឱ្យស្បែកនូវសុខភាពល្អ និងសភាពទន់រលោង គួរឱ្យចង់ស្ទាបអង្អែល។ មិនមានអ្វីពិបាកឡើយ គ្រាន់តែធ្វើដូចវិធីខាងលើៗ ហើយកុំភ្លេចដាក់ជីរអង្កាមដើម្បីបន្ថែមក្រអូបប្រហើរគឺជាការស្រេច។

ប៉ុន្តែបើអ្នកពិបាករកផ្លែស្ត្រីបឺរី និងគីវីនេះ អ្នកអាចជំនួសដោយប្រើផ្លែឪឡឹក និងត្រសក់ក៏បាន។

៤. ក្រូច

ផ្លែក្រូចសម្បូរវីតាមីន C ដែលរាងកាយត្រូវការនៅពេលមានអារម្មណ៍មិនស្រួលខ្លួន ឬសម្រាប់ថ្ងៃក្ដៅខ្លាំង និងកាត់បន្ថយភាពនឿយហត់។ ដូច្នេះ ការធ្វើ Detox Water ដោយប្រើផ្លែក្រូចនឹងជួយឱ្យរាងកាយអ្នកទទួលបានថាមពលមកវិញ បន្សុទ្ធសារធាតុពុលក្នុងរាងកាយ បង្កើនភាពធន់ទៅនឹងបរិយាកាស និងជំនួយស្បែកឱ្យនៅតែក្មេងស្រស់ស្អាត។

វិធីធ្វើ៖

ចិតផ្លែឈើទាំងនេះដាក់ក្នុងកែវ ហើយចាក់ទឹកត្រជាក់ចូល
ទុកចោលក្នុងទូរទឹកកក ឬក្លាសេចោល២ទៅ៣ម៉ោង សឹមយកមកញ៉ាំ

ចំណុះដែលត្រូវផឹក៖

មនុស្សវ័យជំទង់ អាចផឹកពី៦-៨កែវ ក្នុងមួយថ្ងៃ
អ្នកត្រូវប្រើកម្លាំងច្រើន ផឹកពី៨ទៅ១២កែវ ក្នុងមួយថ្ងៃ
អ្នកលេងកីឡា ផឹកពី១២ទៅ១៥កែវ

** បើផឹកនៅពេលយប់ គួរពីចន្លោះពី ២ ទៅ៤ម៉ោង មុនចូលគេងទើបមិនធ្វើឱ្យរំខានដល់ដំណេក

ជាទឹកដែលគ្មានជាតិស្ករច្រើនដូចទឹកផ្លែឈើ ឬកាហ្វេដែលអ្នកញ៉ាំរាល់ថ្ងៃ Detox Water អាចផ្ដល់គុណសម្បត្តិជាច្រើនសម្រាប់សុខភាពនិងសម្រស់ ជាពិសេសការប្រឆាំងជំងឺមហារីក។ ដោយសារតែវាដូចទឹកធម្មតាដែលអ្នកញ៉ាំរាល់ថ្ងៃ ដូច្នេះអ្នកអាចធ្វើវា ហើយដាក់តាមខ្លួនសម្រាប់ញ៉ាំបានគ្រប់ទីកន្លែង៕

ចុចអាន៖ អ្នកចូលចិត្តផឹកកាហ្វេ គួរតែដឹងពីគុណសម្បត្តិ និងគុណវិបត្តិទាំងអស់នេះ

ប្រភព៖ modernhoney ប្រែសម្រួល៖ សរ សុគន្ធី