៦ឃ្លាជំរុញទឹកចិត្តខ្លាំងចំពោះអ្នកខ្វះការគាំទ្រ និងលើកទឹកចិត្តពីមនុស្សជុំវិញខ្លួន

2018-08-31 09:34:23
ចំនួនមតិ 0 | ចំនួនចែករំលែក 0

ប្រយោគទាំង ៦ខាងក្រោមនេះ នឹងផ្ដល់ឲ្យអ្នកនូវភាពកក់ក្ដៅ ការគាំទ្រ និងភាពជឿជាក់នៅពេលដែលអ្នកមានអារម្មណ៍ថាឯកា ដុនដាប និងគ្មានអ្នកណានៅក្បែរសោះ។ ជីវិតគឺតែងមានឈ្នះមានចាញ់ ដូច្នេះបើពេលមួយដែលអ្នកដួលអ្នកអាចឈប់សម្រាកបាន ប៉ុន្តែកុំបោះបង់អីពេលមានកម្លាំងវិញត្រូវក្រោកឈរបន្តទៅមុខទៀត ព្រោះខ្សែជីវិតមនុស្សយើងគឺត្រូវដើរទៅមុខ មិនអាចទាញពេលវេលាឲ្យត្រឡប់ក្រោយបានទេ។

១. ទេវតាឲ្យឱកាសអ្នកតែ ១០%តែប៉ុណ្ណោះ ៩០%ទៀតគឺជាអ្នកខ្លួនឯង

បើសិនជាអ្នកមានសេចក្ដីសុខ គ្រប់យ៉ាងនឹងល្អស្រស់ស្រាយ តែបើអ្នកកើតទុក្ខវិញ គ្រប់យ៉ាងនឹងអាក្រក់។ បើអ្នកឆាប់ចុះចាញ់ អ្នកនឹងបាត់បង់ឱកាសដែលអាចបានរបស់ដែលអ្នកចង់បាន។ អ្វីដែលអ្នកធ្វើក្នុងជីវិតប្រចាំថ្ងៃរបស់អ្នក នឹងជះឥទ្ធិពលទៅលើអ្វីដែលអ្នកទទួលបាន។ «ជីវិតអ្នកប្រែប្រួល នៅពេលដែលខ្លួនអ្នកប្រែប្រួល» ដូច្នេះចូរគិតអ្វីដែលល្អ ធ្វើអ្វីដែលល្អ ហើយវានឹងជះត្រឡប់មកអ្នកវិញដូចគ្នា។ អ្នកខំច្រើនអ្នកទទួលបានច្រើន អ្នកប្រឹងតិចអ្នកទទួលបានតិច ដូច្នេះអ្នកកុំបន្ទោសអ្នកណា តែអ្នកត្រូវខំខ្លួនឯង ព្រោះក្រៅពីអ្នកគ្មានអ្នកណាអាចជួយអ្នកបានទេ។

២. ៣យ៉ាងដែលអ្នកត្រូវប្រាប់ខ្លួនឯង៖ ១. បង្កើតលុយ ២. អភិវឌ្ឍខ្លួន ៣. ច្នៃប្រឌិត

ពេលវេលាមនុស្សមានច្រើនបើអ្នកធ្វើវាឲ្យមានប្រយោជន៍ តែវានឹងគ្មានន័យបើអ្នកបង្ហិនវាចោលទាំងគ្មានបានការសោះ។ កុំចំណាយពេលខូចចិត្ត ស្មុគស្មាញ និងដេកគិតរឿងអីអត់ប្រយោជន៍អី តែអ្នកគួរតែប្រឹងហ្វឹកហាត់ខ្លួនឲ្យមាន ៣ចំណុចដូចខាងលើនេះ ទើបជីវិតមិនដើរដល់ផ្លូវទាល់។

៣. ដើម្បីទទួលបានជោគជ័យអ្នកត្រូវជឿជាក់លើខ្លួនឯង

ត្រូវចាំណា អ្នកមិនអាចធ្វើអ្វីបានល្អនោះទេ បើអ្នកមិនទុកចិត្តលើខ្លួនឯង។ អ្នកដែលឈ្នះ គឺជាមនុស្សម្នាក់ដែលតែងតែជឿលើខ្លួនគេ ថាគេមានសមត្ថភាពអាចធ្វើវាបានដោយជោគជ័យ។ បើអ្នកស្ទាក់ស្ទើរនោះ អ្នកនឹងក្លាយជាអ្នកចាញ់។

៤. គ្មានអ្វីមិនអាចទៅរួចទេចំពោះមនុស្សដែលតស៊ូ

មនុស្សដែលតស៊ូមិនដែលនិយាយថាគេគ្មានឱកាសនោះទេ មានតែមនុស្សមិនចេះតស៊ូតែប៉ុណ្ណោះដែលគិតថាគ្មានឱកាស។ ទោះបីពេលខ្លះគេហត់ គេដួល គេចាញ់តែគេនៅតែក្រោកឡើងសម្រាប់ឱកាសថ្មី។

៥. អនុវត្តម្ដងហើយម្ដងទៀតបើអ្នកមិនដែលឈ្នះ ហើយធ្វើសកម្មភាពបន្តបើអ្នកមិនដែលចាញ់

បើអ្នកមិនដែលទទួលជោគជ័យអីសោះ ចូរកុំចំណាយពេលបន្ទោសខ្លួនឯងយូរពេកអី តែត្រូវចំណាយពេលនោះហ្វឹកហាត់ខ្លួនឯងម្ដងហើយម្ដងទៀតរហូតបានជោគជ័យ។ ម្យ៉ាងទៀតបើអ្នកតែងធ្វើបានល្អហើយអ្នកក៏ត្រូវប្រាប់ខ្លួនឯងឲ្យល្អជាងនេះបន្តទៀត កុំនៅដដែល។

៦. គ្មានអ្នកណាគាំទ្រអ្នកក៏មិនអីដែរ ឲ្យតែអ្នកមានខ្លួនឯង

ទទួលស្គាល់ថាបើមានការលើកទឹកចិត្តពីមនុស្សជុំវិញខ្លួន គឺអាចឲ្យអ្នកមានកម្លាំងចិត្តកាន់តែខ្លាំង ប៉ុន្តែបើគ្មានទេនោះ វាក៏មិនអីដែរឲ្យតែអ្នកអាចលើកទឹកចិត្តខ្លួនឯង។ ត្រូវចាំណាគ្មានអ្នកណាម្នាក់អាចស្រឡាញ់អ្នកជាងអ្នកខ្លួនឯងទេ ដូច្នេះអ្វីដែលសំខាន់អ្នកមិនអាចបោះបង់ខ្លួនឯងចោលនោះទេ៕