លទ្ធផលដែលខ្ញុំទទួលបានក្រោយរៀបការតាមឪពុកម្ដាយ ជាមួយមនុស្សដែលខ្ញុំមិនស្រឡាញ់

2018-08-29 10:02:29
ចំនួនមតិ 0 | ចំនួនចែករំលែក 0

ខ្ញុំចាំថាពេលដែលខ្ញុំរៀនឆ្នាំទី២នៅសាកលវិទ្យាល័យ RULE ប៉ាម៉ាក់ខ្ញុំបានទទូចឲ្យខ្ញុំរៀបការជាមួយកូនប្រុសមិត្តភ័ក្ដិរបស់គាត់ ទាំងដែលខ្ញុំមានមនុស្សដែលខ្ញុំស្រឡាញ់ហើយ។ ខ្ញុំបានព្យាយាមប្រកែកជាមួយពួកគាត់មិនដឹងជាប៉ុន្មានដងហើយ ប៉ុន្តែពួកគាត់នៅតែបង្ខំឲ្យខ្ញុំធ្វើតាមការរៀបចំរបស់គាត់ដោយធានាអះអាងថាគាត់មើលមនុស្សមិនខុស ហើយមិនឲ្យខ្ញុំលំបាកនោះទេ។

ដោយអំណាចនៃការស្រឡាញ់របស់ខ្ញុំនិងសង្សារខ្ញុំជាង៣ឆ្នាំ ខ្ញុំបានឈ្លោះគ្នាជាមួយពួកគាត់រហូតដល់ខ្ញុំមិននិយាយរកគាត់ទាំងពីរ។ ប្រហែលជា២ខែក្រោយមកម៉ាក់របស់ខ្ញុំបានធ្លាក់ខ្លួនឈឺដោយសារតែគាត់ពិបាកចិត្ត សម្រាន្តមិនបាន បាយទឹកក៏មិនសូវបាន គាត់តែងនិយាយថាខ្ញុំអកតញ្ញូ មិនស្ដាប់តាមអ្នកមានគុណ សុខចិត្តឈ្លោះគ្នាជាមួយគាត់ដោយសារសង្សារខ្ញុំ។ គ្រាន់តែឭពាក្យនេះទឹកភ្នែកខ្ញុំហូរ និយាយអ្វីមិនចេញទាំងអស់។ ខ្ញុំបានចូលសម្ងំក្នុងបន្ទប់អស់១ថ្ងៃដោយមិនចេញទៅណាទាំងអស់ ទឹកភ្នែកស្រក់ចុះដូចគេចាក់ទឹក ពេលដែលនឹកឃើញសម្ដីដែលម៉ាក់និយាយមកកាន់ខ្ញុំម្ដងៗ។

ខ្ញុំសួរខ្លួនឯងថា៖ « តើខ្ញុំពិតជាធ្វើខុសជាមួយពួកគាត់មែនទេ ដែលក្នុងនាមជាកូនម្នាក់បែរជាធ្វើឲ្យពួកគាត់មិនសប្បាយចិត្ត? ខ្ញុំជាកូនអកតញ្ញូ ជាកូនមិនល្អ។» តែឲ្យតែពេលដែលខ្ញុំនឹកឃើញថាកូនកំឡោះដែលខ្ញុំត្រូវរៀបការជាមួយមិនមែនជាមនុស្សដែលខ្ញុំស្រឡាញ់ខ្ញុំរឹតតែឈឺចាប់។ «ហេតុអ្វីពួកគាត់មិនយល់ពីអារម្មណ៍ខ្ញុំបែបនេះ? ខ្ញុំគួរតែធ្វើយ៉ាងណាទើបល្អទៅព្រះអើយ?»

[…..]កន្លងបានបីបួនថ្ងៃ ខ្ញុំក៏សម្រេចចិត្តព្រមតាមការរៀបចំរបស់ពួកគាត់ ព្រោះតែម៉ាក់នៅតែចង់ឲ្យខ្ញុំធ្វើតាមការរៀបចំរបស់គាត់។ ប្រហែលជាម៉ោង២ រសៀលខ្ញុំបានទៅជួបសង្សាររបស់ខ្ញុំហើយនិយាយរឿងទាំងអស់ប្រាប់គាត់ តែគាត់ពិតជាទទួលយកមិនបានទេ មនុស្សប្រុសដែលធ្លាប់តែរឹងមាំបែរជាយំនៅមុខខ្ញុំដោយមិនក្រែង។ ឃើញបែបនេះខ្ញុំឈឺចាប់ជាងគាត់ទៀត តែខ្ញុំមិនដឹងថាត្រូវធ្វើយ៉ាងណាទេ ពួកយើងក៏យំឱបគ្នា ទាំងដែលពួកយើងព្យាយាមកាន់ដៃគ្នាអស់ជាងបីឆ្នាំ។ គាត់ល្អពេកហើយ គាត់មិនត្រឹមតែមិនបន្ទោសខ្ញុំទេ គាត់រឹតតែអាណិតខ្ញុំ ហើយលួងលោមខ្ញុំកុំឲ្យគិតច្រើនទៀតផង។

តាំងពីពេលនោះមកពួកយើងនៅតែរាប់អានគ្នាដូចជាបងប្អូនអីចឹង។ គាត់តែងតែជួយលួងលោមខ្ញុំពេលដែលខ្ញុំមិនសប្បាយចិត្ត។ មួយខែក្រោយមកខ្ញុំក៏បានភ្ជាប់ពាក្យជាមួយមនុស្សដែលម៉ាក់រៀបចំឲ្យ ទាំងដែលខ្ញុំមិនស្គាល់សោះ។ មិនបានប៉ុន្មានថ្ងៃមង្គលការរបស់ខ្ញុំក៏បានមកដល់ ទាំងដែលខ្ញុំមិនចង់សូម្បីតែបន្តិច ហើយអ្វីដែលខ្ញុំអាណិតជាងគេគឺសង្សារចាស់ខ្ញុំ គឺគាត់សុខចិត្តមកចូលរួមទាំងតែពីព្រឹក អារម្មណ៍ដែលគាត់ឈរមើលខ្ញុំក្លាយជាប្រពន្ធអ្នកផ្សេង តើឈឺចាប់ប៉ុណ្ណាទៅ។ អ្វីៗក៏កន្លងផុតទៅ ខ្ញុំក៏មានឈ្មោះជាប្រពន្ធម្នាក់។

[….] តាំងពីខ្ញុំរៀបការហើយទំនាក់ទំនងខ្ញុំរវាងសង្សារចាស់ក៏ស្ទើរតែកាត់ផ្ដាច់ទាំងស្រុង ព្រោះគាត់ក៏មិនចង់ឲ្យប្ដីរបស់ខ្ញុំយល់ច្រឡំ ចំណែកខ្ញុំក៏ដូចគ្នា ខ្ញុំមិនចង់ឲ្យប្ដីរបស់ខ្ញុំមិនសប្បាយចិត្តនិងគិតអ្វីដែលមិនល្អ ព្រោះមិនចង់ឲ្យជីវិតគ្រួសារមានរឿងនោះទេ ហើយខ្ញុំក៏ព្យាយាមធ្វើជាប្រពន្ធល្អម្នាក់ដែរ។ តែមិនដូចអ្វីដែលខ្ញុំគិតនោះទេ ប្ដីរបស់ខ្ញុំចិត្តមិនទូលាយនោះទេ គាត់តែងយករឿងខ្ញុំមានសង្សារមកនិយាយពេលដែលគាត់មិនសប្បាយចិត្ត ហើយពួកយើងមិនសូវចុះសម្រុងនឹងគ្នានោះទេ ព្រោះតែខ្ញុំធ្វើអ្វីក៏មិនដែលត្រូវចិត្តគាត់ដែរ។

ដោយសារតែពួកយើងមិនដែលទាក់ទងគ្នាមកពីមុនទើបខ្ញុំមិនសូវដឹងពីចំណង់ចំណូលចិត្តគាត់ ហើយគាត់តែងតែស្ដីថាឲ្យខ្ញុំដោយសារតែខ្ញុំមិនសូវនិយាយជាមួយគាត់ មិនសូវយល់ចិត្តគាត់។ ពីមួយថ្ងៃទៅមួយថ្ងៃគាត់កាន់តែរករឿងខ្ញុំ ហើយខ្ញុំកាន់តែធុញទ្រាន់ក្នុងជីវិតប្ដីប្រពន្ធនេះ គាត់កាន់តែធ្វើបាបខ្ញុំ ខ្ញុំកាន់តែលែងចង់បន្ត។ ថ្ងៃមួយ ពេលគាត់មកពីធ្វើការវិញម៉ោងជិត១២យប់ ទាំងស្រវឹងស្រា ហើយឲ្យខ្ញុំជួយធ្វើម្ហូបឲ្យគាត់តាមតែនឹកឃើញ ចំណែកឯម្ហូបដែលខ្ញុំធ្វើទុកគាត់ច្រានចោលទាំងកំហឹង។ ដោយសារតែខ្ញុំមិនស្រួលខ្លួនផង ខ្ញុំក៏ដើរចេញដោយមិនរវល់ជាមួយគាត់ព្រោះខ្ញុំងងុយគេង និងអស់កម្លាំងមកពីកន្លែងធ្វើការ។ គាត់មិនយល់បែរជាហក់ទះកំផ្លៀងខ្ញុំមួយទំហឹង ដោយគ្មានខ្លាចខ្ញុំឈឺចាប់ឡើយ។ ខ្ញុំស្រក់ទឹកភ្នែកយំយកៗ ហើយរត់ចូលក្នុងបន្ទប់ចាក់សោជាប់មិនឲ្យគាត់ចូលបាន រួចសម្ងំយំរហូតដល់មេឃភ្លឺ។

[….]ព្រឹកព្រហាមខ្ញុំបានរើអីវ៉ាន់ដាក់ក្នុងវ៉ាលីដើម្បីទៅផ្ទះប៉ាម៉ាក់ខ្ញុំវិញ ដោយគ្មាននិយាយអ្វីទាំងអស់។ មកដល់ផ្ទះប៉ាម៉ាក់ខ្ញុំស្រឡាំងកាំង ហើយសួរខ្ញុំថា៖

«ម៉េចមកពីព្រឹក ហើយមិនប្រាប់ម៉ាក់មុនអីចឹងកូន?»

ទឹកភ្នែកខ្ញុំស្រក់ ហើយខ្ញុំងាកមុខឲ្យគាត់មើល រួចនិយាយថា៖

«នេះហើយជាអ្វីដែលម៉ាក់ធានាចំពោះខ្ញុំ។ ម៉ាក់យកសុភមង្គលខ្ញុំមកជាន់ឈ្លី ពេលនេះម៉ាក់យកអីមកសងខ្ញុំវិញទៅ?»

«ប្ដីប្រពន្ធតែងតែមានឈ្លោះគ្នាខ្លះហើយកូន ធ្វើជាប្រពន្ធគេត្រូវតែទ្រាំណាកូន» ម៉ាក់និយាយមកកាន់ខ្ញុំទាំងទន់ភ្លន់

«ខ្ញុំសុំអង្វរម៉ាក់ទៅចុះ ម៉ាក់ឲ្យខ្ញុំទ្រាំរហូតដល់ខ្ញុំស្លាប់មែនទេ ជិតមួយឆ្នាំហើយដែលខ្ញុំមិនដែលស្គាល់ពាក្យថាសុភមង្គលយ៉ាងម៉េច? បើម៉ាក់នៅស្រឡាញ់ខ្ញុំ ម៉ាក់ឲ្យខ្ញុំលែងលះជាមួយគេទៅ។»

ប៉ារបស់ខ្ញុំគ្រាន់តែឃើញស្នាមម្រាមដៃនៅលើថ្ពាល់ខ្ញុំ គាត់ខឹងខ្លាំងណាស់ ហើយក៏ស្រែកខ្លាំងៗថា

«កូនអញៗអត់ដែលហ៊ានវ៉ៃវាទេ តែវាមកធ្វើអីចឹងដាក់កូនអញៗ វាជ្រុលពេកហើយ។ កុំថាឡើយឈ្មោះកូនប្រសា មុខវាក៏អញអត់ចង់ឃើញដែរ។»

ម៉ាក់គ្រាន់តែឮបែបនេះអ្វីក៏មិនហ៊ាននិយាយមានតែយកដៃមកអង្អែលក្បាលខ្ញុំដែលកំពុងយំសស្រាក់។

មិនយូរប៉ុន្មានប៉ាម៉ាក់ខ្ញុំក៏ទៅនិយាយជាមួយគ្រួសាររបស់ប្ដីខ្ញុំ ហើយក៏ព្រមព្រៀងគ្នាឲ្យខ្ញុំលែងលះគ្នា ដោយសារតែខ្ញុំមិនព្រមត្រូវរ៉ូវគ្នាវិញឡើយទោះមានការអង្វរបែបណាក៏ដោយ។

[...]ចុងក្រោយខ្ញុំសល់ត្រឹមឈ្មោះជាស្រីមេម៉ាយតែប៉ុណ្ណោះ ដោយសារតែចង់ធ្វើជាកូនកតញ្ញូ ព្រមតាមការរៀបចំរបស់គាត់។ ចំណែកឯប៉ាម៉ាក់របស់ខ្ញុំគាត់មានតែការសោកស្ដាយដែលគាត់បានបង្ខំខ្ញុំរៀបការជាមួយមនុស្សដែលខ្ញុំមិនស្រឡាញ់។ ពេលនេះក្រៅពីការងារនិងបន្តការសិក្សា ខ្ញុំរស់នៅជាមួយគ្រួសារខ្ញុំ រីឯសង្សារចាស់របស់ខ្ញុំ ពួកយើងនៅតែរាប់អានគ្នាដូចធម្មតា តែរឿងស្នេហាពួកយើងមិនបានបន្តទៀតនោះទេ។ ខ្ញុំសង្ឃឹមថាឪពុកម្ដាយផ្សេងៗទៀតនឹងមិនបង្ខំកូនចំពោះរឿងមង្គលការទៀតនោះទេ បើកូនជួបមនុស្សល្អមិនអីទេតែបើមិនល្អមានតែទឹកភ្នែកតែប៉ុណ្ណោះ៕

ចុចអាន៖បើស្រលាញ់គ្នាពិត កុំយកហេតុផលគ្រួសារជំទាស់មកធ្វើជាលេសបែកគ្នា

អត្ថបទ៖ ផេង ផលធិតា