មិនចង់ឱ្យស្បែកជ្រីវជ្រួញ កុំទម្លាប់ធ្វើរឿង៥យ៉ាងនេះ

2018-08-28 01:46:41
ចំនួនមតិ 0 | ចំនួនចែករំលែក 0

អ្នកខ្លះចេះតែឆ្ងល់ហេតុអ្វីបានជាមុខខ្លួនឯងឆាប់ជ្រួញ ហើយចាស់ជាងវ័យ រីឯអ្នកដទៃមិចក៏មើលទៅក្មេងជាងវ័យ? ការពិតគឺមកពីការរស់នៅ របបអាហារ និងការថែរក្សាសម្រស់ដែលធ្វើឱ្យមុខអ្នកឆាប់ជ្រីវជ្រួញ។ ទម្លាប់ប្រចាំថ្ងៃក៏ជាផ្នែកមួយដ៏សំខាន់សម្រាប់សម្រស់ដែរ ហេតុនេះហើយបើមិនចង់មានស្នាមជ្រីវជ្រួញទេ គួរតែឈប់ទម្លាប់ទាំង៥នេះជាបន្ទាន់៖

១. ទំពាអាហារក្នុងមាត់តែម្ខាង

អ្នកជំនាញបានប្រាប់ឱ្យដឹងថា ការទំពាអាហារតែម្ខាងធ្វើឱ្យសាច់ដុំលូតលាស់មិនស្មើគ្នា។ នៅពេលដែលសាច់ដុំលូតលាស់មិនស្មើគ្នា វាអាចធ្វើឱ្យមានស្នាមជ្រីវជ្រួញជាក់ជាមិនខាន។ ដូច្នេះគួរតែទំពាម្តងខាងនេះ ម្តងខាងនោះ។

២. ធ្វើមុខក្រញូវ

នេះជាទម្លាប់អាក្រក់បំផុតហើយ។ ដូចដែលចាស់ៗធ្លាប់ប្រាប់ថា កុំឱ្យធ្វើមុខក្រញូវ ប្រយ័ត្នឆាប់ចាស់។ សូម្បីតែអ្នកជំនាញក៏បានណែនាំដែរថា ការដែលធ្វើមុខបែបនេះធ្វើឱ្យស្បែកថ្ងាសជ្រួញ ដោយសារតែមេតាប៉ូលីស និងការថយចុះនៃចលនាឈាមរត់។

៣. យកដៃច្រត់ចង្កា

ស្ទើរតែគ្រប់គ្នាទៅហើយដែលមានទម្លាប់អង្គុយម្នាក់ឯង អផ្សុក ពេលធ្វើការឬរៀនក៏យកដៃមកទ្រចង្កា។ បើចង់បានមុខ V ឬចង្កាស្អាតនោះ មិនគួរធ្វើបែបនេះទេ ព្រោះវាមានតែធ្វើឱ្យមានស្នាមជ្រួញនៅក្រោមចង្កាតែប៉ុណ្ណោះ។

៤. ងូតទឹកក្ដៅជាប្រចាំ

ការងូតទឹកក្តៅអាចជួយឱ្យអ្នកមានអារម្មណ៍ស្រស់ស្រាយជាងមុន។ ប៉ុន្តែទន្ទឹមនឹងនេះដែរ វាក៏ប៉ះពាល់ដល់ស្បែករបស់អ្នក ធ្វើឱ្យស្បែកក្រិន និងស្ងួត។ ស្បែកអ្នកនឹងចាប់ផ្តើមខូច ពេលខ្លះអាចឈានដល់របកក៏មាន។

៥. ឧស្សាហ៍អង្គុយនៅក្នុងម៉ាស៊ីនត្រជាក់

ម៉ាស៊ីនត្រជាក់ធ្វើឱ្យត្រជាក់ តែមិនបានផ្តល់សំណើមដល់ស្បែកនោះទេ។ ហេតុនេះហើយប្រសិនបើអ្នកឧស្សាហ៍អង្គុយនៅក្នុងម៉ាស៊ីនត្រជាក់នោះ វានឹងធ្វើឱ្យបាត់បង់ជាតិសំណើមពីធម្មជាតិ។ តែបើអ្នកមិនអាចជៀសបានទេនោះគួរតែលាបឡេផ្តល់សំណើមដល់ស្បែកទើបល្អ៕