ស្នេហាមួយរឹងមាំ មិនមែនមនុស្ស២នាក់ដូចគ្នាគ្រប់យ៉ាងទេ តែជាការទទួលយក និងសម្របខ្លួន

2018-08-16 08:12:20
ចំនួនមតិ 0 | ចំនួនចែករំលែក 0

ខ្ញុំបានបាក់ចិត្តលង់ស្រឡាញ់មនុស្សស្រីម្នាក់នៅអាយុ ២០ ក្រាស់ដែរ។ អារម្មណ៍ដំបូងពេលដែលខ្ញុំបានជួបនាងនោះគឺពិបាកនឹងពណ៌នាណាស់ គឺគ្រាន់តែដឹងថាពួកយើងអាចកាន់ដៃគ្នាដើរលើផ្លូវដ៏វែងអន្លាយជាមួយគ្នា ស្ដាប់ចម្រៀងដ៏រ៉ូមែនទិចជាមួយគ្នា ញ៉ាំអាហារដែលនាងធ្វើដោយផ្ទាល់ដៃ និងស្ដាប់រាល់អ្វីដែលនាងនិយាយរាល់យប់ ហើយធ្វើរឿងដែលយើងចូលចិត្តជាមួយគ្នា។

រួូបតំណាង

នេះជាអារម្មណ៍ដែលខ្ញុំមានចំពោះស្នេហានេះ ហើយវាក៏ជាក្ដីប្រាថ្នាមួយដែលខ្ញុំសង្ឃឹមក្រោយខ្ញុំអាចរៀបការជាមួយនាង។

ក្រោយពេលពួកយើងបានមើលចិត្តគ្នាមួយរយៈធំ ខ្ញុំបានរៀបការជាមួយនាង។ ខ្ញុំពិតជាសប្បាយចិត្តព្រោះខ្ញុំអាចរកមនុស្សម្នាក់ដែលត្រូវចិត្តខ្ញុំ និងមនុស្សស្រីដែលខ្ញុំប្រាថ្នាសម្រាប់ជីវិតមួយនេះ។

ប៉ុន្តែក្រោយពីពួកយើងរៀបការជាមួយគ្នាបានមួយរយៈមកខ្ញុំចាប់ផ្ដើមមានអារម្មណ៍មិនល្អ ព្រោះសុភមង្គលដែលខ្ញុំធ្លាប់ស្រមៃនោះមិនអាចកើតមានឡើង។

ខ្ញុំចាប់ផ្ដើមមានអារម្មណ៍ថាពួកយើងគឺមានចំណុចផ្ទុយគ្នាច្រើន ហើយខ្ញុំចាប់ផ្ដើមអន់ចិត្តថាហេតុអីនាងមិនអាចជាមនុស្សដែលមានចំណុចដូចខ្ញុំអីចឹង?

នាងចូលចិត្តនិយាយច្រើន ខណៈដែលខ្ញុំចូលចិត្តភាពស្ងប់ស្ងាត់

រូបតំណាង

នាងចូលចិត្តប្រើខ្ញុំឲ្យបោកខោអាវ ខណៈខ្ញុំចង់ជួយនាងធ្វើម្ហូបជាមួយគ្នា

នាងចូលចិត្តឲ្យខ្ញុំជូននាងទៅផ្សារ ខណៈខ្ញុំស្អប់ការដើរផ្សារជាទីបំផុត

ខ្ញុំចូលចិត្តការហែលទឹក ខណៈនាងស្អប់ទឹកជាទីបំផុត

នាងចូលចិត្តញ៉ាំហិល ហើយខ្ញុំមិនចេះញ៉ាំហិល

ខ្ញុំចង់នេះ នាងចង់ទៅនោះ មិនដែលចិត្តដូចគ្នាយ៉ាងម៉េច

ខ្ញុំចាប់ផ្ដើមស្អប់នូវជីវិតប្ដីប្រពន្ធមួយនេះ ព្រោះនាងមិនមែនជាមនុស្សស្រីដែលមានចរិត និងចំណង់ចំណូលចិត្តដូចខ្ញុំ។

នាងគួរតែជាមនុស្សដែលដូចខ្ញុំ តែបើនាងបែបនេះជីវិតគ្រួសារនេះនឹងមានតែភាពខ្វែងគ្នា ទាស់គ្នា។

តែរហូតដល់ថ្ងៃមួយ យើងបានអង្គុយញ៉ាំបាយល្ងាចជាមួយគ្នាយ៉ាងសាមញ្ញ។ ខ្ញុំក៏បានឃើញម្ហូបនៅលើតុមួយចាន នោះគឺសម្លកកូរ។ ខ្ញុំសម្លឹងមើលសម្លនោះមួយសន្ទុះ ទើបខ្ញុំដឹងថាការពិត ចង់បានសម្លដ៏ឆ្ងាញ់មួយចាន ត្រូវមានគ្រឿងផ្សំផ្សេងៗគ្នា ហើយស្លបញ្ចូលគ្នា។ មិនខ្វល់ថាបន្លែនោះយ៉ាងម៉េចទេ វាត្រូវតែបំប្លែងខ្លួនចូលជាមួយបន្លែដទៃទៀតទើបអាចជួយឲ្យសម្លនោះមានរសជាតិឆ្ងាញ់។ ពេលនោះទើបខ្ញុំគិតយល់ថាទំនាក់ទំនងដ៏រឹងមាំមួយ ដ៏ល្អឥតខ្ចោះមួយមិនមែន ជាការដែលអាចរកមនុស្សម្នាក់ដូចយើងនោះទេ តែជាការទទួលយក និងសម្របខ្លួនឲ្យមនុស្ស ២នាក់រស់នៅជាមួយគ្នាបាន។

តាំងពីថ្ងៃនោះមកពួកយើងក៏ចាប់ផ្ដើមមានអារម្មណ៍ល្អជាមួយគ្នាឡើងវិញ ដោយខ្ញុំព្យាយាមចំណាយពេលស្ដាប់នាងនិយាយដោយភាពស្ងៀមស្ងាត់។