ឈ្លោះគ្នាយ៉ាងណាក៏មិនបែកបាក់ ឲ្យតែចេះដំណោះស្រាយទាំងនេះ

2018-08-15 08:51:28
ចំនួនមតិ 0 | ចំនួនចែករំលែក 0

វាជារឿងធម្មតាទៅហើយ ដែលគូស្នេហ៍មានជម្លោះនឹងគ្នា។ ស្រលាញ់គ្នាប៉ុនណា អត់ធ្មត់យ៉ាងណា ភាពទាស់ទែងជៀសមិនផុតឡើយ។ ទន្ទឹមគ្នានឹងពេលដែលអ្នក បានឈ្លោះប្រកែកជាមួយដៃគូ អ្នកក៏គួរដឹងពីវិធីនិងដំណោះស្រាយត្រឹមត្រូវបំផុត ដើម្បីរក្សាចំណងស្នេហ៍កុំឲ្យឈានចូលដល់ការបែកបាក់។

១. មិនត្រូវធ្វើហីដូចជាគ្មានរឿងអ្វីកើតឡើង

ពេលឈ្លោះគ្នាហើយ បើអ្នកទាំងពីរធ្វើហីៗមិននិយាយរកគ្នា ដូចជាគ្មានរឿងអ្វីកើតឡើង នោះអ្នកទាំងពីរនឹងអាចមានគម្លាតកាន់តែខ្លាំងពីមួយថ្ងៃទៅមួយថ្ងៃ និងមិនអាចស្វែងរកមូលហេតុពិតនៅពីក្រោយនេះជម្លោះនេះបានឡើយ។ ទៅថ្ងៃមុខ បញ្ហានឹងអាចកើតមានដដែលៗសារជាថ្មី ប្រសិនបើពុំរកដំណោះស្រាយឲ្យទាន់ពេលវេលា។

២. កុំបង្ហោះលើបណ្ដាញសង្គម ពីរឿងរ៉ាវដែលអ្នកទាំងពីរបានឈ្លោះគ្នា

មានមនុស្សមួយចំនួនទប់ចិត្តមិនបង្ហោះមិនបានទេ ឲ្យតែពេលឈ្លោះគ្នាម្តងៗ ព្រោះចង់ឲ្យមនុស្សគ្រប់គ្នាបានដឹង ប៉ុន្តែត្រូវចាំថា វាជារឿងផ្ទៃក្នុងដែលមិនគួរបញ្ចេញជាសាធារណៈនោះទេ។ ធ្វើបែបនេះ គ្មានបានប្រយោជន៍អីផ្សេង ក្រៅពីអ្នកដទៃវាយតម្លៃ និងនិយាយដើមមិនសំចៃមាត់ពីស្នេហារបស់អ្នក។ ហេតុនេះហើយ មានរឿងចាំបាច់ ចង់សុំយោបល់ពីអ្នកផ្សេង គួររកនរណាម្នាក់ ដែលអាចទុកចិត្តបានជាងគេ។

៣. កុំរឹងរូស មិនព្រមទទួលពាក្យសុំទោសពីដៃគូ

កុំងរខឹងរឹងរូសយូរពេក បើមានភាគីខាងណាមួយ និយាយសុំទោស ដឹងពីកំហុសហើយ គួរចេះទទួលយក និងអត់ឱនអធ្យាស្រ័យឲ្យគ្នាទៅ។ បើសុំទោសហើយ នៅមិនអាចកែប្រែ ឬអាចជួយឲ្យអ្នកទុកគ្នាវិញបាន ត្រូវទៅរកជំនួយពីអ្នកដែលអាចប្រឹក្សាយោបល់ល្អ ដូចជាម៉ាក់ប៉ាជាដើម ដើម្បីជួយសម្រួលដល់ទំនាក់ទំនងអ្នកទាំងពីរ។

៤. កុំមានបញ្ហាតិចតួច ទៅរំលឹកដល់រឿងចាស់

រឿងចាស់វាកើតឡើងរួចហើយ កុំលើកយកមកម្តងទៀត ដោយសារតែចង់វាយប្រហារដៃគូ។ ចង់ឈ្នះចាញ់គ្នាធ្វើអីទៅ? អត់មានបានអ្វីត្រលប់មកវិញផងហ្នឹង។ បើគ្រាន់តែជាបញ្ហាតិចតួចកើតឡើងក្នុងបច្ចុប្បន្នកាល ត្រូវព្យាយាមដោះស្រាយ ដោយមិនយករឿងអតីតកាលមកលាយឡំ នាំឲ្យបញ្ហាកាន់តែធំលើសដើមនោះទេ។

៥. មិននិយាយឌឺដង ដើម្បីបញ្ឈឺគ្នា

ពេលមានគំនិតខ្វែងគ្នា និងប្រកែកគ្នារួចហើយ មិនត្រូវព្យាយាមនិយាយពាក្យឌឺដងឡើយ ព្រោះវាអាចធ្វើឲ្យម្នាក់ៗមានការឈឺចាប់កាន់តែខ្លាំង។ នៅពេលអារម្មណ៍ខឹងហើយ ពិបាកហាមចិត្តខ្លួនឯង មិនឲ្យតឹងសរសៃកដាក់គ្នាណាស់មែនអត់? ហេតុអ្វីមិនសាកគិតពីខ្លួនឯងវិញម្តងមើល ចំណេះវិជ្ជាក៏មាន ភាពធំដឹងក្តីក៏មាន ស្នេហាផ្អែមល្ហែមពីដំបូងក៏មាន អីចឹងហេតុផលអីដែលថានិយាយដោះស្រាយគ្នាតាមសម្រួលមិនបាននោះ?

ឲ្យតែអ្នកមានចិត្តអត់ធ្មត់ ការតាំងចិត្តខ្ពស់ និងព្យាយាមរកដំណោះស្រាយល្អៗ សមហេតុផល នោះរឿងធំនឹងប្រែក្លាយជារឿងតូច ឯរឿងតូចប្រែក្លាយជាសាមញ្ញធម្មតា ដូចជាគ្មានរឿង ហើយចំណងស្នេហ៍របស់អ្នកក៏មិនអាចបែកបាក់គ្នា ដោយសារតែជម្លោះឥតបានការកែ ៕

ចុចអានបន្ត៖