កុំឲ្យជីវិតប្ដីប្រពន្ធ ឬសង្សារមានភាពរកាំរកូស រឿងមិនចេះចប់ គួរមើលចំណុចនេះ

2018-08-13 02:31:24
ចំនួនមតិ 0 | ចំនួនចែករំលែក 0

ប្រហែលអាចស្រឡាញ់គ្នាដំបូងៗ ឬក៏រៀបការថ្មីថ្មោង គូស្នេហ៍មួយចំនួនមិនសូវជាមានបញ្ហានោះទេ តែកន្លងផុតមួយរយៈ ជីវិតគូមិនខុសគ្នាអីជាមួយចាន និងស្លាបព្រា។ យ៉ាងណាក៏ដោយបើសិនជាអ្នកប្រាថ្នាមិនចង់ឲ្យស្នេហាអ្នកជួបរឿងឈឺចាប់ ហើយរឿងរ៉ាវមិនចេះចប់មិនចេះហើយនោះ អ្នកគួរតែព្យាយាមអនុវត្តនូវវិធីខាងក្រោមនេះ ៖

១. កុំគេងទាំងខឹង ឬឈ្លោះគ្នា

មិនគួរណាធ្វើឲ្យដំណេករបស់យើងពោរពេញ ដោយកំហឹង និងរឿងមិនសប្បាយចិត្តនោះទេ។ បើមានរឿងអីគួរតែដោះស្រាយគ្នាហើយសឹមចូលគេង កុំព្យាយាមដើរចេញហើយមកសម្ងំយំរឿងខ្លួននោះ។ មានរឿងអីគួរនិយាយឲ្យបានដឹងច្បាស់មុនពេលគេង ព្រោះបើមិនអីចឹងទេមួយយប់ដែលកន្លងទៅនឹងក្លាយជាយប់ដ៏អាក្រក់បំផុត ហើយវាអាចបន្តមកដល់ពេលព្រឹកទៀត។

២. ប្រើពាក្យល្អៗជាមួយគ្នា

មនុស្សរស់នៅជាមួយគ្នាមិនគួរប្រើពាក្យសម្ដីអាក្រក់ មិនល្អនោះទេ គួរតែនិយាយឲ្យបានពីរោះ ស្រទន់ ដើម្បីកុំឲ្យមានអារម្មណ៍មិនល្អដាក់គ្នា។ ពេលខ្លះទៀតមនុស្សកំពុងតែមានបញ្ហា បើអ្នកនិយាយមិនល្អទៀតនោះរឿងកាន់តែធំ។

៣. មិនកាត់ផ្ដាច់ទំនាក់ទំនង

ការជជែកគ្នា ការពិភាក្សាគ្នា នៅតែជារឿងសំខាន់មួយដែលគូស្នេហ៍មិនអាចខ្វះបាន ព្រោះបើអ្នកនៅស្ងៀមរៀងខ្លួន ភាពសោះកក្រោះនៅកើតឡើងជាមិនខាន ដូច្នេះអ្នកត្រូវតែចេះនិយាយគ្នា សួរពីគ្នាទៅវិញទៅមកកុំឲ្យខាន។

រូបតំណាង

៤.រក្សាភាពផ្អែមល្ហែម

ទោះបីជារស់នៅជាមួយគ្នារាល់ថ្ងៃក៏ដោយក៏ជីវិតស្នេហានៅតែត្រូវការភាពផ្អែមល្ហែម ការរំភើប និងការរស់នៅដោយការផ្ដល់តម្លៃលើស្នេហាទៅវិញទៅមក។ អ្នកមិនគួរព្រងើយកន្តើយជាមួយគ្នាឡើយ ទោះបីពេលខ្លះអ្នកមានអារម្មណ៍ថាចង់នៅម្នាក់ឯងក៏ដោយ ក៏អ្នកគួរតែប្រាប់គ្នាមុន ដើម្បីកុំឲ្យម្នាក់ទៀតគិតច្រើន។

៥. បន្ថយការគិតអ្វីតែឯង

រឿងខ្លះមិនបាននឹងកើតឡើងផងតែអ្នកបែរជាគិតអីតែម្នាក់ឯង មិនបានទាំងសួរម្នាក់ទៀតឲ្យបានច្បាស់ ហើយក៏មិនសប្បាយចិត្តរហូតដល់មានរឿងឈ្លោះគ្នាកើតឡើង ដូច្នេះបើមានអីមិនច្បាស់គួរតែនិយាយគ្នាមិនគួរគិតអីផ្ដេសផ្ដាសតែខ្លួនឯងនោះទេ។

ជីវិតគូមិនថារៀបការហើយ ឬនៅជាសង្សារនឹងគ្នាចៀសមិនផុតពីជម្លោះនោះទេ គ្រាន់តែថាធំ ឬក៏តូចតែប៉ុណ្ណោះ ដូច្នេះហើយម្នាក់ៗត្រូវមានដំណោះស្រាយឲ្យគ្នា មិនមែនដើរចេញនោះទេ៕

ចុចអាន៖ទោះស្រឡាញ់គេខ្លាំងប៉ុណ្ណា ក៏កុំបណ្ដោយខ្លួនឲ្យធ្លាក់ចូលកំហុស ៥យ៉ាងនេះ

អត្ថបទ៖ ផេង ផលធិតា