បែកអ្នកចាស់ ហើយចង់ទទួលអ្នកថ្មី គួរសួរសំណួរនេះទៅខ្លួនឯងសិន

2018-08-03 06:06:56
ចំនួនមតិ 0 | ចំនួនចែករំលែក 0

ទំនាក់ទំនងចាស់ក៏បានបញ្ចប់ មិនយូរប៉ុន្មានអ្នកក៏ជួបមនុស្សម្នាក់ទៀត សំណួរសួរថាតើគួរទទួលគេទេ? ពេលដែលទទួលយកស្នេហាថ្មីអ្នកគួរតែគិតឲ្យច្បាស់ មិនមែនចេះតែទទួលៗតាមតែអារម្មណ៍នោះទេ ព្រោះអ្នកអាចធ្វើបាបចិត្តមនុស្សម្នាក់ដែលគ្មានកំហុសសោះ។ ទាំងនេះជាសំណួរដែលអ្នកគួរតែសួរខ្លួនឯងមុនពេលទទួលយកស្នេហាថ្មី ៖

១.សប្បាយចិត្តនឹងខ្លួនឯងហើយឬនៅ ?

បើអ្នកមិនទាន់រីករាយជាមួយខ្លួនឯងបន្ទាប់ពីបែកបាក់ហើយ អ្នកកុំទាន់យកអ្នកណាមកលំបាកជាមួយអ្នកអី។ អ្នកគួរតែទុកពេលមួយរយៈដើម្បីឲ្យខ្លួនឯងធូរស្រាលសិន សឹមគិតរឿងនេះតាមក្រោយ។ ព្យាយាមធ្វើជីវិតខ្លួនឲ្យរីករាយ នោះអ្នកដែលចូលមកក្នុងជិវិតអ្នកក៏គេរីករាយតាមអ្នកដែរ។

រូបតំណាង

**២. ពេញចិត្តពេលដែលនៅម្នាក់ឯងទេ?**

បើអ្នកទម្លាប់នៅម្នាក់ឯងដោយគ្មានបញ្ហាហើយ នោះមានន័យថាអ្នកទទួលយកអ្នកថ្មីមិនមែនដោយសារភាពឯការបស់អ្នកទេ ហើយក៏មិនមែនទុកគាត់កំដរភាពអផ្សុកអ្នកដែរ។ កុំយកអ្នកណាម្នាក់មកកំដរភាពឯការបស់អ្នក ព្រោះនោះជាកំហុសដ៏ធំមួយ។

៣. បើកទូលាយក្នុងការទំនាក់ទំនងជាមួយគេហើយឬនៅ?

ការប្រាស្រ័យទាក់ទងគឺសំខាន់ណាស់ក្នុងស្នេហា បើអ្នកមិនទាន់ត្រៀមខ្លួនក្នុងការទាក់ទង ចែករំលែករឿងរ៉ាវជាមួយគេទេ នោះវាអាចនឹងពិបាកបន្តិច។ អ្នកគួរតែកុំទទួលយកគេហើយ ទុកគេចោលដូចអ្នកក្រៅនោះ ព្រោះអាចធ្វើឲ្យគេដែលស្រឡាញ់អ្នកនោះ ឈឺចាប់។

៤. ឈប់នឹកនាសង្សារចាស់អ្នកឬនៅ?

បើអ្នកនៅតែមិនទាន់ដាច់ស្រេចជាមួយសង្សារចាស់អ្នកទេ អ្នកមិនគួរទទួលយកស្នេហាថ្មីនោះទេ ព្រោះវាធ្វើឲ្យមនុស្សម្នាក់ដែលមិនដឹងអីសោះឈឺចាប់ជាមួយអ្នក។ ចំណាយពេលបំភ្លេចគេសិនទៅ កុំនៅជាមួយអ្នកថ្មីហើយទៅនឹកអ្នកចាស់នោះ។

រូបតំណាង

៥. អាចបណ្ដោយឲ្យរឿងតិចតួចទៅផុតបានទេ ?

ពេលខ្លះអ្នកអាចលើកលែងទោសពេលដែលគេធ្វើអីខុសតិចតួចបានទេ? ហើយអាចដោះស្រាយបញ្ហាជាមួយគ្នាបានទេ? បើអ្នកអាចនោះមានន័យថាអ្នកអាចរស់នៅជាមួយគ្នាបានដោយមានក្ដីសុខហើយ។ ប្រហែលការបែកបាក់ពីមុនអាចឲ្យអ្នកយល់បានច្រើន និងដឹងពីកំហុសអ្នក និងកំហុសគេ។ បែបនេះមានស្នេហាក្រោយអ្នកក៏គួរតែយល់ និងអាចធ្វើឲ្យល្អជាងមុនដែរ។

៦. មានចិត្តស្រឡាញ់គេ ឬក៏គ្រាន់តែត្រូវការគេ?

ស្រឡាញ់ និងត្រូវការគឺខុសគ្នា ព្រោះបើអ្នកស្រឡាញ់នោះទើបនៅជាមួយគ្នាបានសប្បាយចិត្ត តែបើអ្នកគ្រាន់តែត្រូវការគេ នោះអ្នកគ្មានអារម្មណ៍ឡើយ គឺគ្រាន់យកគេមកបំពេញតម្រូវការអ្នកប៉ុណ្ណោះ។ គួរសួរខ្លួនឯងថា តើអ្នកទទួលយកគេគ្រាន់តែចង់ឲ្យគេនៅក្បែរអ្នក? ឬក៏គ្រាន់តែយកគេមកដើម្បីជួយអ្នកឲ្យបំភ្លេចអ្នកចាស់? អ្នកគួរតែច្បាស់លាស់ក្នុងរឿងនេះ ដើម្បីកុំឲ្យឈឺចាប់ទៅថ្ងៃក្រោយ។