៥សំណួរ​មនុស្ស​ស្រី​គួរ​សួរខ្លួនឯង​ថា​ត្រៀម​ខ្លួន​ហើយ​ឬ​នៅ មុន​ពេល​ក្លាយ​ជា​ប្រពន្ធ​គេ

  • 2018-08-01 01:00:00
  • ចំនួនមតិ 0 | ចំនួនចែករំលែក 0

ជីវិត​ប្ដី​ប្រពន្ធ​មិន​អាច​ដូច​ពេល​នៅ​ខ្លួន​មួយ ឬ​ពេល​នៅ​ជា​សង្សារ​គ្នា​ឡើយ ព្រោះ​នោះ​ជា​ភាព​ពិត​ប្រាកដ​មួយ ជា​ទំនួល​ខុស​ត្រូវ​មួយ។ មុន​អ្នក​សម្រេច​ចិត្ត​ចោល​ភាព​នៅ​លីវ អ្នក​គួរ​តែ​សួរ​ខ្លួន​ឯង​នៅ​សំណួរ​ប៉ុន្មាន​ដូច​ខាង​ក្រោម​នេះ​សិន ដើម្បី​ត្រៀម​ខ្លួន នឹង​ប្រឈម​ជាមួយ​បញ្ហា​ដែល​អាច​កើត​មាន​កើត​រៀប​ការ ៖

១. មាន​ភាព​អត់ធ្មត់​ខ្ពស់​ឬ​នៅ?

ជីវិត​គ្រួសារ​មិន​មែន​ដូច​កាល​នៅ​សង្សារ​គ្នា​ទេ រឿង​ខ្លះ​ត្រូវ​ឲ្យ​អ្នក​មាន​ការ​អត់ធ្មត់​ខ្ពស់ សង្កត់​ចិត្ត​ខ្លាំង ព្រោះ​បើ​ឆេវឆាវ​អាច​នឹង​មាន​ភាព​រង្គោះរង្គើ​ក្នុង​គ្រួសារ។ រឿង​ខ្លះ​អ្នក​ត្រូវ​អភ័យ​ទោស​ រឿង​ខ្លះ​អ្នក​ត្រូវ​បំភ្លេច​ចោល រឿង​ខ្លះ​អ្នក​មិន​ត្រូវ​រំលឹក នោះ​ទើប​ជីវិត​ប្ដី​ប្រពន្ធ​មិន​សូវ​មាន​ជម្លោះ។ បើ​អ្នក​គិត​ថា​អ្នក​មិន​ទាន់​មាន​ការ​អត់ធ្មត់​ដល់​កម្រិត​នោះ អ្នក​គួរ​តែ​បន្ត​ហាត់​ចិត្ត​ខ្លួន​ឯង​បន្តិច​ទៀត​សិន សឹម​សម្រេច​ចិត្ត​រៀប​ការ។

រូបតំណាង

២. ត្រៀម​ខ្លួន​ក្នុង​ការ​ចូល​ជា​គ្រួសារ​តែ​មួយ​ឬ​នៅ?

រៀបការ​ហើយ​ត្រូវ​មាន​ញាតិ​ទាំង​សង​ខាង មាន​ឪពុក​ម្ដាយ​ក្មេក មាន​បង​ប្អូន​ថ្លៃ ដូច្នេះ​តើ​អ្នក​ត្រៀម​ខ្លួន​ក្នុង​ការ​ចូល​ជា​គ្រួសារ​តែ​មួយ​ហើយ​ឬ​នៅ? ពេល​អ្នក​នៅ​ជាមួយ​ឪពុក​ម្ដាយ​បង្កើត​អ្នក ប្រហែល​ជា​គ្មាន​សម្ពាធ​អី​ប៉ុន្មាន​ទេ តែ​រៀប​ការ​ហើយ​អ្នក​ត្រូវ​គិត​គូរ​ច្រើន និង​ត្រូវ​មាន​ទំនាក់ទំនង​ល្អ​សម្រាប់​គ្រួសារ​ទាំង​សង​ខាង ដូច្នេះ​អ្នក​ត្រូវ​គិត​ពី​រឿង​នេះ​ឲ្យ​មែន​ទែន។

៣. តើ​អ្នក​អាច​ទ្រទ្រង់​គ្រួសារ​ទាំង​មូល​បាន​ទេ?

អ្នក​មាន​ចំណូល​គ្រប់គ្រាន់​ក្នុង​ការ​ចំណាយ​សម្រាប់​ជីវិត​ជា​គ្រួសារ​ឬ​នៅ? ពេល​នៅ​ខ្លួន​មួយ​អ្នក​អាច​គិត​សម្រាប់​តែ​ខ្លួន​អ្នក​ម្នាក់ តែ​ពេល​មាន​គ្រួសារ​បន្ទុក​ក៏​កាន់​តែ​កើន​ឡើង ដូច្នេះ​អ្នក​ត្រូវ​ត្រៀម​ខ្លួន​សម្រាប់​ការ​ផ្គត់ផ្គង់​ក្នុង​គ្រួសារ​ទាំង​មូល។ ជា​ការ​ល្អ​បំផុត​អ្នក​គួរ​តែ​មាន​របរ​ ឬ​ការងារ​មួយ​មាន​ស្ថិរភាព មិន​គួរ​ណា​រៀប​ការ​ទាំង​ខ្លួន​មិន​ទាន់​មាន​អី​សោះ​ឡើយ។

រូបតំណាង

៤. ត្រៀម​ខ្លួន​ក្នុង​ការ​​បាត់បង់​សេរីភាព​ឬ​នៅ?

មិន​មែន​មាន​ន័យ​ថា​រៀប​ការ​ខ្លួន​គ្មាន​សិទ្ធិ​ធ្វើ​អ្វី​នោះ​ទេ​ តែ​សេរីភាព​អ្នក​នឹង​ត្រូវ​បាត់បង់​សឹង​តែ​ពាក់កណ្ដាល ឬ​មួយ​ផ្នែក​ធំ។ អ្នក​មិន​អាច​ដើរ​លេង​​សប្បាយ​ដូច​ពេល​នៅ​ខ្លួន​មួយ​ឡើយ អ្នក​មិន​អាច​អង្គុយ​ផឹក​កាហ្វេ​ជាមួយ​មិត្តភក្តិ​រាល់​ថ្ងៃ ដូច​ពេល​អ្នក​មិន​ទាន់​រៀប​ការ​ឡើយ។ អ្នក​នឹង​ត្រូវ​រ៉ាប់រង​ការងារ​មួយ​ចំណែក​ធំ​ក្នុង​គ្រួសារ ដូច្នេះ​ទោះ​បី​ពេល​នោះ​អ្នក​មាន​សិទ្ធិ​ក៏​អ្នក​ពិបាក​នឹង​ដើរហើរ​ដោយ​ឯករាជ្យ​ដែរ។

៥. ត្រៀម​ខ្លួន​ក្នុង​ការ​ធ្វើ​ជា​ម្ដាយ​ឬ​នៅ?

រៀបការ​ហើយ​អ្នក​អាច​មាន​ពេល​ក្នុង​ការ​សម្រេច​ចិត្ត​រឿង​កូន តែ​វា​ក៏​មិន​មាន​ពេល​យូរ​ដែរ ដូច្នេះ​តើ​អ្នក​ត្រៀម​ខ្លួន​រួច​ហើយ​ឬ​នៅ? អ្នក​អាច​ថយ​សម្រស់ អ្នក​អាច​ឈឺក្បាល​ជាង​មុន​ជាមួយ​កូនៗ អ្នក​អាច​គ្មាន​ពេល​សម្រាប់​ខ្លួន​ឯង តើ​អ្នក​ទទួល​យក​បាន​ឬ​នៅ? អ្នក​មាន​លទ្ធភាព​ចិញ្ចឹម​កូន​អ្នក​ឲ្យ​បាន​ល្អ​ទេ? មាន​ពេល​សម្រាប់​កូន​អ្នក​គ្រប់គ្រាន់​ទេ?

រូបតំណាង

ចុចអាន៖មុនជ្រើស​រើស​បុរសណាម្នាក់ នារី​គំនិត​​ចាស់​ទុំ​ច្រើន​មាន​ទស្សនៈ​ ៤ នេះ​ក្នុង​រឿង​ស្នេហា​

​​

អត្ថបទ៖ ផេង ផលធិតា