រៀបការហើយតែជីវិតមិនដែលមានក្ដីសុខ ១០ហេតុផលនេះបង្ហាញថាអ្នកគួរចែកផ្លូវ ជាជាងបន្ត
- 2018-08-01 09:28:03
- ចំនួនមតិ 0 | ចំនួនចែករំលែក 0
រៀបការហើយតែជីវិតមិនដែលមានក្ដីសុខ ១០ហេតុផលនេះបង្ហាញថាអ្នកគួរចែកផ្លូវ ជាជាងបន្ត
អ្នកណាទៅដែលរៀបការហើយចង់លែងគ្នានោះ ប៉ុន្តែបើជីវិតគូពិបាកវេទនា រស់នៅជាមួយគ្នាមានតែទុក្ខគ្មានសុខនោះ វាប្រហែលជាល្អជាងបើអ្នកជ្រើសរើសការលែងលះ ដើម្បីត្រលប់មកស្រលាញ់ខ្លួនឯង និងប្រើជីវិតយ៉ាងមានក្ដីសុខសាជាថ្មី។ ថ្ងៃនេះ កញ្ញាសូមបង្ហាញគំនិតសម្រាប់ពិចារណាចំនួន ១០ចំណុចដែលបង្ហាញពីហេតុផលដែលអ្នកគួរជ្រើសរើសការលែងលះបើជីវិតអាពាហ៍ពិពាហ៍អ្នកគ្មានសុភមង្គល៖
១. បើទោះបីជីវិតអាពាហ៍ពិពាហ៍ផ្ដល់ឲ្យយើងនូវអារម្មណ៍ថាមានសុវត្ថិភាព ធ្វើឲ្យយើងដឹងថាជីវិតនេះយើងគួរធ្វើការដើម្បីអ្នកណា និងស្រលាញ់អ្នកណា ប៉ុន្តែក្នុងខណៈពេលតែមួយគ្នានោះ ការលែងលះនឹងអាចផ្ដល់ជីវិតថ្មីឲ្យយើងម្ដងទៀត។ អ្នកនឹងអាចត្រលប់មកជាខ្លួនឯងសាជាថ្មី រួមជាមួយក្ដីសុខដែលអាចនឹងកើនឡើងថែមទៀតក្រោយការលែងលះ។
២. ធ្វើជាឪពុកម្ដាយចិញ្ចឹមកូនតែម្ខាង ល្អជាងការរស់នៅក្នុងគ្រួសារដែលគ្មានភាពកក់ក្ដៅ។ បើកូនៗឃើញឪពុកម្ដាយឈ្លោះទាស់ទែងគ្នាញឹកញាប់ ឬមិនដែលបង្ហាញក្ដីស្រលាញ់ចំពោះគ្នា ពួកគេនឹងអាចយកគំរូរបស់អ្នកនៅពេលពួកគេមានគូស្រករ ឬមានទស្សនអគតិចំពោះជីវិតគូតែម្ដង ជាពិសេសសម្រាប់កូនៗតូចៗ។
៣. ការលែងលះ អាចជួយបើកឱកាសឲ្យអ្នកបានជួបជីវិតដែលប្រសើរជាង ទៅអនាគត។
៤. អ្នកនឹងបែរមកស្រលាញ់ខ្លួនឯងម្ដងទៀត និងមើលថែទាំខ្លួនឯងឲ្យកាន់តែស្រស់ថ្លា ក្រោយពីធ្វើជាប្រពន្ធដែលលះបង់សឹងតែថ្វាយជីវិតជូនអតីតស្វាមីដែលមិនធ្លាប់មើលឃើញតម្លៃរបស់អ្នក។
៥. ការលែងលះមិនមែនរឿងអាក្រក់បំផុតចំពោះកូនៗនោះទេ ព្រោះការរស់នៅក្រោមដំបូលផ្ទះដែលអ្នកទាំងពីរចាត់ទុកគ្នាជាសត្រូវ នឹងផ្ដល់ផលអាក្រក់ដល់សុខភាពផ្លូវចិត្តរបស់កូនជាងហ្នឹងទៅទៀត។ បើក្រោយលែងលះ អ្នកទាំងពីរនៅតែរក្សាភាពជាម្ដាយ និងឪពុក ដើម្បីកុំឲ្យកូនមានអារម្មណ៍ខ្វះភាពកក់ក្ដៅ នោះជារឿងប្រសើរជាង។
៦. ដំបូងៗអ្នកអាចនឹងមានអារម្មណ៍ឯកោ ប៉ុន្តែនៅពេលចាប់ផ្ដើមទម្លាប់ អ្នកនឹងចូលចិត្តភាពនេះលីវបែបនេះ។ អ្នកនឹងយល់ពីខ្លួនឯង និងយល់ថាវាជាក្ដីសុខ ព្រោះជីវិតមានឯករាជ្យដែលអ្នកទទួលបានមក គឺមានតម្លៃជាងកាលដែលអ្នកអង្គុយទ្រាំទុក្ខ ឬបង្ខាំងខ្លួនឯងជាមួយបញ្ហាផ្សេងៗ។
៧. អ្នកខ្លះរៀបការហើយ មិនគាំទ្រឲ្យអ្នកម្ខាងទៀតរីកចម្រើន ប៉ុន្តែបែរជាចង់ធ្វើជាម្ចាស់គ្រប់គ្រងជីវិតរបស់គេទៅតាមចិត្តខ្លួនទៅវិញ។ ក្នុងករណីនេះ ការលែងលះគឺជាជម្រើសល្អបំផុត បើអ្នកចង់បានភាពរីកចម្រើន និងជីវិតតាមបែបដែលខ្លួនត្រូវការ។
៨. ឪពុកម្ដាយដែលមានក្ដីសុខ តែងចិញ្ចឹមអប់រំកូនបានល្អ។ ម្ល៉ោះហើយ ការលែងលះអាចជាការពិសោធន៍ឲ្យដឹងថាអ្នកមានភាពក្លាហានគ្រប់គ្រាន់ក្នុងការមើលថែកូន និងអ្នកនៅជុំវិញខ្លួនឲ្យកាន់តែមានក្ដីសុខជាងមុន។
៩. បើអ្នកព្យាយាមធ្វើគ្រប់យ៉ាងដើម្បីឲ្យជីវិតគូប្រសើរឡើងហើយ ប៉ុន្តែក៏គ្មានអ្វីផ្លាស់ប្ដូរ នៅពេលលែងលះរួចហើយ អ្នកនឹងមានពេលវេលាលះបង់កម្លាំងកាយ កម្លាំងចិត្តជាមួយការងារ និងជីវិតថ្មីដែលអ្នកប៉ងប្រាថ្នាបានយ៉ាងពេញទំហឹង ដោយគ្មានបញ្ហាគ្រួសារមករំខានដូចមុនឡើយ។
១០. អ្នកបាត់បង់ស្វាមីពិតមែន ប៉ុន្តែអ្នកនឹងទទួលបានក្ដីសុខត្រលប់មកវិញ។ មានមនុស្សស្រីច្រើននាក់ហើយដែលលែងលះហើយ ក៏រកឃើញថាជីវិតក្រោយការលែងលះធ្វើឲ្យខ្លួនអាចមានក្ដីសុខលើសដើម និងយល់ថាជីវិតរបស់មនុស្សខ្លីណាស់សម្រាប់ការអង្គុយឱបទុក្ខត្រាំត្រែងនឹងអាពាហ៍ពិពាហ៍ដែលគ្មានក្ដីសុខ។
បើទោះបីការលែងលះ គឺជារឿងពិបាកសម្រេចចិត្ត និងអាចធ្វើឲ្យជីវិតអ្នកលំបាកនៅពេលដំបូង ប៉ុន្តែបើវាពិតជាសំខាន់សម្រាប់អ្នកទាំងពីរពិតមែន អ្នកគួរដោះលែងខ្លួនឯងដើរចេញពីទំនាក់ទំនងនោះទៅ។ និយាយពាក្យលាទៅគាត់ និងអរគុណសម្រាប់គ្រប់យ៉ាងដែលធ្លាប់មានជាមួយគ្នា បើទោះបីអ្នកមានអារម្មណ៍ឈឺចាប់ក៏ដោយ រួចហើយត្រូវដើរបន្តទៅមុខ ប្រើជីវិតខ្លួនឲ្យមានតម្លៃ និងមានក្ដីសុខជាមួយអ្វីៗជុំវិញខ្លួន។ ថាមិនត្រូវ មិនយូរមិនឆាប់ អ្នកអាចនឹងជួបនរណាម្នាក់ដែលអ្នកអាចរស់នៅជាមួយយ៉ាងមានក្ដីសុខរៀងរហូតក៏ថាបាន ៕
ចុចអាន៖
៦ចំណុចមនុស្សស្រីអាចសង្កេតលើមនុស្សប្រុសដែលគួររៀបការជាមួយបាន
ភរិយាវៃឆ្លាត ស្វាមីស្រលាញ់ទ្វេដងបើចេះនិយាយពាក្យទាំងនេះដាក់គាត់