កំហុស ៥យ៉ាងធ្វើឲ្យគូស្នេហ៍បែកបាក់ ទោះស្រឡាញ់គ្នាយូរប៉ុណ្ណាក៏ដោយ

2018-07-23 04:49:49
ចំនួនមតិ 0 | ចំនួនចែករំលែក 0

រយៈពេលនៃការស្រឡាញ់គ្នា គ្រាន់តែជាតួលេខតែប៉ុណ្ណោះ វាមិនអាចជាចំណងមួយអាចចងមនុស្ស២នាក់ឡើយ។ ទោះស្រឡាញ់គ្នាយូរប៉ុណ្ណាក៏ដោយបើរវាងអ្នក និងគេនៅតែមានកំហុស ៥ខាងក្រោមនេះ នោះវាអាចនឹងធ្វើឲ្យចំណងស្នេហ៍អ្នកដាច់យ៉ាងងាយ៖

១. ចាប់ផ្ដើមចេះកុហក និងលាក់បាំង

ឲ្យតែរវាងមនុស្ស ២នាក់ បើចាប់ផ្ដើមចេះកុហក ឬក៏លាក់បាំងគ្នាហើយ មិនយូរទេភាពរកាំរកូសនឹងមានឡើងមិនឈប់។ ការដែលចេះកុហកគ្នា គឺធ្វើឲ្យការជឿជាក់បាត់បង់ ហើយអារម្មណ៍មិនល្អក៏កើតឡើង រហូតធ្វើឲ្យម្នាក់ៗលែងចង់បន្តទៅមុខ រួចក៏សម្រេចចិត្តចែកផ្លូវគ្នាដោយមិនខ្វល់ថារយៈពេលយូរប៉ុណ្ណាទេ។

២. ឆាប់ប៉ះទង្គិចផ្លូវចិត្តពេក

អាចនេះមកពីខាងស្រីភាគច្រើនព្រោះមនុស្សស្រីឆាប់ប៉ះទង្គិចចិត្តណាស់ ដូច្នេះពេលខ្លះមកពីការឆាប់អន់ចិត្ត ឆាប់ខឹង ឆាប់ប្រចណ្ឌ ឬក៏គ្មានហេតុផល ក៏ជាកំហុសមួយដែលបណ្ដាលឲ្យគូសង្សារភាគច្រើនបែកគ្នាដែរ។ រឿងខ្លះតូចសោះ ក៏ទៅជារឿងធំ ឬរឿងខ្លះអភ័យទោសបានសោះ បែរជាម្នាក់ៗចង់ឈ្នះ ចង់ចាញ់រករឿងគ្នា រហូតដល់តែបែករហែកខ្ទេចខ្ទី។

៣. មិនសូវបង្ហាញអារម្មណ៍ត្រង់ៗ

ការដែលចូលចិត្តលាក់បាំងនូវអារម្មណ៍រៀងខ្លួនគឺធ្វើឲ្យមនុស្ស២នាក់មិនសូវយល់ពីគ្នាឡើយ ទោះអ្នកទាក់ទងគ្នាយូរហើយក៏ដោយ តែបើអ្នកនៅតែមានអារម្មណ៍ទើសទាល់គ្នា នោះជាការបរាជ័យមួយហើយ។ បើស្រឡាញ់គ្នាយូរហើយ គួរតែនិយាយអីត្រង់ទៅត្រង់មកទៅ ព្រោះធ្វើឲ្យម្នាក់ៗមានអារម្មណ៍ស្និទ្ធស្នាល និងកក់ក្ដៅជាងការដែរប្រឹងសម្ដែង។

រូបតំណាង

៤. ក្បត់គ្នា

បើគិតថានៅជាមួយគ្នាលែងមានក្ដីសុខហើយ ចាកចេញទៅ កុំក្បត់អី ព្រោះយូរនឹងឆាប់គង់តែបែកគ្នាទេ។ លើសពីនេះការដែលក្បត់ឲ្យអ្នកកាន់តែអន់ និងអាក្រក់ ហើយពិបាកក្នុងការមើលមុខគ្នាទៀតផង។ បែកចែកអារម្មណ៍ខ្លួនឯងឲ្យច្បាស់ កុំអ្នកនេះផងអ្នកនោះផង ព្រោះចុងក្រោយអ្នកនឹងគ្មានសល់អ្នកណាក្បែរខ្លួនឡើយ។

៥. សោះកក្រោះដាក់គ្នា

គូស្នេហ៍ខ្លះគិតថាស្រឡាញ់គ្នាហើយ មិនបាច់គិតអីច្រើនក៏បានដែរ។ ពីមួយថ្ងៃហីទៅៗ លែងសូវខ្វល់ពីម្ខាងទៀត រហូតធ្វើឲ្យម្ខាងទៀត ឆ្អែត លែងចង់បន្ត ទើបត្រឡប់ដឹងខ្លួនវិញ។ ត្រូវចាំណា អ្នកមិនអាចចេះតែមានឱកាសទទួលបានរបស់នោះទេ ដូច្នេះបើអ្នកមិនចេះថែកុំស្ដាយពេលបាត់បង់។ មានឱកាសស្រឡាញ់គ្នាឲ្យបានច្រើនទៅ ខ្វល់ពីគ្នាឲ្យបានល្អទៅ កុំគិតថាគ្រប់យ៉ាងសុទ្ធតែមិនអីនោះ៕