ម្ចាស់ស្នាដៃម៉ូដសម្លៀកបំពាក់ខ្មែរ ២ រូប ប្រតិកម្មបែបណាពេលឃើញ Miss Grand ថៃ ចម្លងឈុតខ្លួន?

2018-07-16 09:43:11
ចំនួនមតិ 0 | ចំនួនចែករំលែក 0

នៅក្នុងកម្មវិធី Miss Grand Thailand 2018 ដែលទើបតែបញ្ចប់កាលពីថ្មីៗនេះ អ្នកទស្សនានៅខ្មែរបានកត់សម្គាល់ឃើញថា សម្លៀកបំពាក់ប៉ុន្មានម៉ូដបានស្លៀកដោយបវរកញ្ញាថៃនៅក្នុងកម្មវិធីនោះ មានភាពស្រដៀងគ្នាខ្លាំងទៅនឹងស្នាដៃ យុវជនខ្មែរ ២ រូបដែលបានបង្ហោះនៅក្នុងបណ្តាញសង្គម និងមានការគាំទ្រចូលចិត្តយ៉ាងច្រើន ជាហេតុនាំឲ្យសាធារណៈជន មានប្រតិកម្មនិងយល់ឃើញថា ថៃធ្វើការចម្លងម៉ូដពីខ្មែរ។

ដើម្បីស្រាយចម្ងល់ និងចង់ដឹងពីយោបល់ម្ចាស់ស្នាដៃឲ្យបានកាន់តែច្បាស់ កញ្ញា បានធ្វើបទសម្ភាសន៍ជាមួយនឹងលោក ធឿន សុជាតិ និងលោក ថៃ សាន ដែលជាម្ចាស់រូបគំនូរនៃម៉ូដសម្លៀកបំពាក់ទាំងអស់នោះផ្ទាល់។

*ចំណាប់អារម្មណ៍របស់លោក ធឿន សុជាតិ

លោក ធឿន សុជាតិ

លោក **ធឿន សុជាតិ** អាយុ ២២ ឆ្នាំ ជានិស្សិតផ្នែកស្ថាបត្យកម្មគូរប្លង់ នៅសាលាភូមិន្ទវិចិត្រសិល្បៈ។ និស្សិតមួយរូបនេះ បានចំណាយពេល ៥ ខែ ទម្រាំធ្វើការសិក្សាស្រាវជ្រាវពីខេត្តក្រុងទាំងអស់ នៅក្នុងប្រទេសកម្ពុជា ដើម្បីច្នៃម៉ូដឲ្យស៊ីគ្នានឹងតំណាងឲ្យខេត្តនីមួយៗ។

ពាក់ព័ន្ធទៅនឹង ម៉ូដសម្លៀកបំពាក់នៅក្នុងកម្មវិធី Miss Grand Thailand 2018 លោកបានបង្ហាញចំណាប់អារម្មណ៍ថា ម៉ូដទាំងអស់នោះបើមើលមួយភ្លែត គឺស្រដៀងគ្នា ៥០ ភាគរយទៅនឹងស្នាដៃរបស់ខ្លួន មែន គ្រាន់តែលោកមិនអាចចោទគេទាំងស្រុងបាននោះទេ ដោយហេតុថា រវាងប្រទេសខ្មែរ និងថៃគឺមានប្រពៃណីវប្បធម៌ស្រដៀងគ្នា ដូច្នេះវាក៏អាចជះឥទ្ធិពលដល់ការច្នៃម៉ូឌផងដែរ។

យ៉ាងណាមិញ ការសន្និដ្ឋានមួយទៀតរបស់ សុជាតិ បានបញ្ជាក់បន្តថា "មានម៉ូដខ្លះពិតជាចម្លងមែន គ្រាន់តែពួកគេបានធ្វើការច្នៃប្រឌិត កែតម្រូវបន្ថែម ប្រើសាច់ក្រណាត់ប្រភេទថ្មី ប៉ុន្តែនៅក្នុងផ្នត់គំនិតតែមួយ។ ជាក់ស្តែងដូចជាម៉ូដមួយ ខ្ញុំបានធ្វើការសិក្សាស្រាវជ្រាវ និងគូរចេញឡើងតំណាងឲ្យខេត្តបាត់ដំបង ដោយមានកាន់កួរស្រូវ និងកណ្ដៀវ ចំណែកឯម៉ូដដែលថៃបានស្លៀកវិញ គឺដូចទាំងកអាវ និងផ្នត់គំនិត" ។

ស្នាដៃ ធឿន សុជាតិ

*ចំណែកឯលោក ថៃ សាន វិញក៏មានចំណាប់អារម្មណ៍មិនខុសប៉ុន្មានពី ធឿន សុជាតិ ដែរ។ ដោយលោកបានរៀបរាប់ដូចខាងក្រោមនេះថា៖

លោក ថៃ សាន

"ទោះបីជាមិនអាចចោទគេបានទាំងស្រុងក៏ពិតមែន ប៉ុន្តែខ្ញុំអាចសន្និដ្ឋានបានថា ម៉ូដទាំងនោះគឺមានការចម្លងខ្លះៗ និងច្នៃថែមបន្តិចបន្តួច មើលទៅដូចសឹងតែ ៥០% ពីម៉ូដដែលខ្ញុំធ្លាប់បានគូរ និងបង្ហោះតាំងពីឆ្នាំមុនមកម្ល៉េះ។ ឈុតទាំងអស់ គឺសុទ្ធតែដកស្រង់ចេញពីទំនៀមទម្លាប់វប្បធម៌ខ្មែរ ដូចជាស្បែកធំ ខ្លែងឯកជាដើម ដែលបង្កើតឡើងក្នុងគោលបំណង ដើម្បីបំផុសគំនិតកូនខ្មែរឲ្យមានការគាំទ្រលើកស្ទួយ និងដើម្បីបង្ហាញគំនិតថ្មីប្លែកៗនៅលើឆាកអន្តរជាតិ" ។ លោក ថៃ សាន បញ្ជាក់។

វិចិត្រករដ៏មានទេពកោសល្យរូបនេះ បានបន្តទៀតថា ពេលខ្លះលោកក៏មានការអាក់អន់ស្រពន់ចិត្តខ្លះដែរ នៅពេលបានឃើញ អ្នកសិល្បៈមួយចំនួនមិនថាតែនៅក្រៅប្រទេសនោះទេ សូម្បីតែនៅក្នុងស្រុក គឺបានលួចយកស្នាដៃរបស់លោក ដោយពុំឆ្លងកាត់ការអនុញ្ញាតជាមុន។ នេះបង្ហាញថា ពួកគេខ្វះសុជីវធម៌ និងមិនមានការឲ្យតម្លៃទៅលើស្នាដៃរបស់លោក។

លោក ថៃ សាន អាយុ ៣៨ ឆ្នាំ ដែលជាវិចិត្រករគំនូរ និងជាបុគ្គិកបម្រើការងារនៅអង្គការគ្រួសារថ្មី តែងតែខំប្រឹងធ្វើការច្នៃម៉ូដខ្មែរផ្សេងៗ ទទួលបានការគាំទ្រជាច្រើន មានគំនិតមិនខុសពី លោក ធឿន សុជាតិ ប៉ុន្មានឡើយចំពោះការលួចចម្លងរបស់ Miss Grand ថៃ គឺមានត្រឹម ៥០ ភាគរយប៉ុណ្ណោះ។

សរុបជារួមមក យុវជនដែលពោរពេញទៅដោយសមត្ថភាពទាំង ២ រូបនេះ ពិតជាមានបំណងចង់ឲ្យស្នាដៃរបស់ខ្លួន លេចចេញជារូបរាងពិតៗយ៉ាងខ្លាំងក្រៃលែង ប៉ុន្តែដោយសារតែខ្វះការឧបត្ថម្ភលើកស្ទួយ ជួយជ្រោមជ្រែង និងត្រូវការចំណាយថវិកាច្រើន ដូច្នោះហើយទើបធ្វើឲ្យស្នាដៃរបស់អ្នកទាំងពីរ បានត្រឹមកប់នៅក្នុងរូបគំនូរ គ្មានឱកាសបានបង្ហាញចេញមកខាងក្រៅដូចជាប្រទេសដទៃទៀតដែលមានការឲ្យតម្លៃ និងស្ញប់ស្ញែងទៅលើនរណាដែលមានទេពកោសល្យបែបនេះណាស់៕