យុវតីកម្ពុជា ២ រូបចែករំលែកបទពិសោធន៍ និងបញ្ហាប្រឈម ពេលទៅរៀននៅថៃ

2018-07-13 02:20:00
ចំនួនមតិ 0 | ចំនួនចែករំលែក 0

សម័យឥឡូវមនុស្សស្រីតែងចង់ក្រេបយកចំណេះដឹងឲ្យបានខ្ពង់ខ្ពស់ មិនចាញ់បុរសឡើយ។ ហេតុនេះហើយក្រៅពីការសិក្សានៅក្នុងស្រុក ស្រ្តីជាច្រើនក៏មានបំណងប្រាថ្នាទៅរៀននៅឯបរទេសផងដែរ។ ថ្ងៃនេះ កញ្ញា អ៊ុង រ័ត្នបញ្ញា ដែលជានិស្សិតអាហារូបករណ៍ កំពុងបន្តការសិក្សាផ្នែកប្រព័ន្ធផ្សព្វផ្សាយ និងរចនាក្រាហ្វិកនៅប្រទេសថៃ បានចូលរួមចែករំលែក បទពិសោធន៍ និងបញ្ហាជាក់ស្តែងខ្លះៗដែលនាងកំពុងតែជួបប្រទះពេលសិក្សានៅបរទេស។

អ៊ុង រ័ត្នបញ្ញា

**១. ភាសា**

ភាសាគឺសំខាន់ខ្លាំងណាស់ ព្រោះនៅក្នុងទំនាក់ទំនងប្រចាំថ្ងៃគឺត្រូវការប្រើប្រាស់ជាចាំបាច់។ ទោះបីជាអ្នកចេះស្រាប់ខ្លះៗហើយក៏ដោយ ប៉ុន្តែរបៀបនៃការនិយាយសន្ទនា គឺវាមិនដូចទាំងស្រុងទៅនឹងអ្វីដែលអ្នកបានរៀននៅសាលាទេ ដូច្នេះភាសាជាឧបសគ្គចម្បងទី១ សម្រាប់ពេលដំបូងដែលនាងទៅដល់បរទេស។

អ៊ុង រ័ត្នបញ្ញា និងមិត្តភ័ក្ដិ

២. ទំនៀមទម្លាប់

ប្រទេសនីមួយៗតែងតែមានច្បាប់ និងទំនៀមទម្លាប់ខុសៗគ្នា ដូចជាការបើកបរប្រកាន់ឆ្វេង ស្ដាំ របៀបរស់នៅ និងការនិយាយស្តីជាមួយចាស់ទុំជាដើម។ នាងត្រូវសម្របខ្លួនពីមួយថ្ងៃទៅមួយថ្ងៃ និងសិក្សាស្វែងយល់ឲ្យបានកាន់តែច្បាស់ ជៀសវាងការភាន់ច្រឡំផ្សេងៗ។

៣. ការហូបចុក

សម្រាប់អ្នកដែលញ៉ាំមិនសូវរើស គឺគ្មានបញ្ហាអីធំដុំអីនោះទេ ប៉ុន្តែចំពោះអ្នកដែលទម្លាប់ញ៉ាំតែម្ហូបណាដែលខ្លួនចូលចិត្ត គឺអាចមានផលលំបាកច្រើន ព្រោះម្ហូបនៅក្នុងប្រទេសនីមួយៗ មានរបៀបធ្វើ និងរសជាតិខុសៗពីគ្នា។

៤. ការរស់នៅ

ចំពោះអ្នកដែលធ្លាប់តែរស់នៅជួបជុំជាមួយគ្រួសារ និងមានមិត្តភ័ក្តនៅជុំវិញខ្លួនច្រើន អ្នកនឹងមានអារម្មណ៍ថាឯកា ដោយសារតែមិនទាន់ស៊ាំទៅនឹងបរិយាកាសថ្មីនៅឡើយ។ យ៉ាងណាមិញ បើអ្នកជាមនុស្សធ្លាប់រស់នៅម្នាក់ឯងពីមុនមក មានភាពស្ងប់ស្ងាត់ នេះមិនមែនជាឧបសគ្គធំដុំសម្រាប់អ្នកនោះទេ។

៥. ការមើលថែទាំខ្លួនឯង

ការមើលថែទាំខ្លួនជាអ្វីដែលត្រូវយកចិត្តទុកដាក់បំផុត ព្រោះអំឡុងពេលដែលអ្នកប្រើជីវិតរស់នៅម្នាក់ឯង អ្នកអាចទទួលរងនូវសម្ពាធបានយ៉ាងងាយ ដូច្នោះអ្នកត្រូវចេះបែងចែកពេលវេលាឲ្យបានច្បាស់លាស់ រវាងការសិក្សានិងការសម្រាកលំហែ។ អ្វីៗអាចនឹងទៅរលូនបាន លុះត្រាតែអ្នកចេះពង្រឹង និងថែទាំ ទាំងសុខភាពផ្លូវកាយ និងផ្លូវចិត្តឲ្យបានល្អ៕