ចំណាយ ៣នាទីមុនពេលគេងក៏អាចជើងតូចបានដែរជាមួយក្បាច់ហាត់ប្រាណទាំងនេះ

2018-07-06 06:17:02
ចំនួនមតិ 0 | ចំនួនចែករំលែក 0

បញ្ហាភ្លៅធំធ្វើឱ្យស្លៀកពាក់យ៉ាងណាក៏មើលទៅមិនស្អាត ជាពិសេសពេលស្លៀកខោខ្លីសំពត់ខ្លី។ ពេលដែលការហាត់ប្រាណប្រើរយៈពេលយូរហើយពិបាកនោះ អ្នកនឹងខ្ជិលមិនសូវហាត់នោះទេ។ តែពេលនេះកញ្ញាសូមណែនាំវិធីហាត់ប្រាណដែលងាយបំផុត ហើយចំណាយពេលត្រឹមតែ៣នាទីប៉ុណ្ណោះមុនចូលគេង៖

១. កម្តៅសាច់ដុំនៅផ្នែកខាងមុខ

ហាត់កម្តៅសាច់ដុំផ្នែកខាងមុខនៃពោះ ជង្គង់ និងក្បាលពោះ។

របៀបហាត់៖ គេងដាក់ខ្លួនឱ្យត្រង់ ដៃទាំងពីរស្របនឹងដងខ្លួន។ លើកជើងនិងប្រអប់ជើងឡើងលើឱ្យត្រង់ កុំបន្ទន់ជង្គង់ បន្ទាប់មកបត់ជើងមួយម្ខាងចុះ ឯជើងម្ខាងទៀតបញ្ឈរដដែលហើយលើកចុះលើកឡើង។ ធ្វើបែបនេះឱ្យបានម្ខាង១០ម្តង។ ប្រសិនបើអ្នកមានអារម្មណ៍ថារាងក្តៅនៅក្នុងសាច់ដុំ នោះបានន័យថាវាមានប្រសិទ្ធភាព។

២. កម្តៅសាច់ដុំផ្នែកខាងក្រោយ

ជំហានទី១៖ គេងដាក់ខ្លួនឱ្យត្រង់ ដៃទាំងពីរស្របនឹងដងខ្លួនហើយលើកជើងឡើងឱ្យត្រង់។ រីឯប្រអប់ជើងត្រូវដាក់ស្របនឹងដងខ្លួន។ បត់ជើងដូចការណែនាំខាងលើដែរប៉ុន្តែប្រអប់ជើងត្រូវបត់ជានិច្ច។ ធ្វើបែបនេះឱ្យបានម្ខាង១០ម្តង។

ជំហានទី២៖ គេងដាក់ខ្លួនឱ្យត្រង់ ដៃទាំងពីរស្របនឹងដងខ្លួន លើកជើងឡើងលើតែហើបគូទបន្តិច។ បន្ទាប់មកទម្លាក់ជើងទាំង២ចុះបន្តិច ហើយយោលទៅយោលមកឱ្យបាន២០ដង។

៣. កម្តៅសាច់ដុំផ្នែកខាងក្នុង

របៀបហាត់៖ គេងដាក់ខ្លួនឱ្យត្រង់ ដៃទាំងពីរស្របនឹងដងខ្លួនរួចលើកជើងម្ខាងគងលើជើងម្ខាងទៀត។ បន្ទាប់មកបត់ជើងទាំង២កន្ធែកចេញពីគ្នាចុះឡើង។ ផ្លាស់ប្តូរជើងម្ខាងនៅលើម្ខាងនៅក្រោមឱ្យបាន២០ដង។ ប្រសិនបើមានប្រសិទ្ធភាពអ្នកនឹងមានអារម្មណ៍ថាតឹងជើង និងជង្គង់៕