ដឹង ៦វិធីនេះទើបរស់នៅមានក្ដីសុខ ក្នុងសង្គមដែលសម្បូរតែអ្នករិះគន់
- 2018-07-03 07:16:44
- ចំនួនមតិ 0 | ចំនួនចែករំលែក 0
ដឹង ៦វិធីនេះទើបរស់នៅមានក្ដីសុខ ក្នុងសង្គមដែលសម្បូរតែអ្នករិះគន់
ត្បិតតែសម័យកាលកាន់តែទំនើប ប៉ុន្តែទម្លាប់រិះគន់គ្នារបស់មនុស្សក៏មិនបានថមថយដែរ។ ផ្ទុយទៅវិញដោយសារតែការវិវត្តនៃបច្ចេកវិទ្យានេះហើយដែលធ្វើឲ្យមនុស្សរិះគន់គ្នាកាន់តែច្រើនឡើង កាន់តែងាយស្រួល កាន់តែឆាប់រហ័ស ជាក់ស្ដែងគឺតាមរយៈបណ្ដាញសង្គម។ ជួនកាលវាមិនមែនជាបញ្ហារបស់យើង ប៉ុន្តែពេលបានស្ដាប់ ពេលបានអានពាក្យរិះគន់ទាំងនោះ វាក៏ធ្វើឲ្យអារម្មណ៍របស់យើងមិនល្អ និងភ័យខ្លាចដូចគ្នាដែរ។ យ៉ាងណាក៏ដោយកញ្ញាសូមផ្ដល់យោបល់ឲ្យប្រិយមិត្តទន្ទេញវិធី ៦ឃ្លាខាងក្រោមនេះទុកប្រើនៅពេលអ្នកជួបបញ្ហាការរិះគន់ ឬបញ្ហាជីវិតផ្សេងៗ៖
១. នៅជាមួយខ្លួនឯង ឲ្យគិតបូក
២. នៅជាមួយបក្សពួក ឲ្យមេត្តា
៣. នៅជាមួយបញ្ហា ឲ្យខំដោះស្រាយ
៤. នៅជាមួយឪពុកម្ដាយ ឲ្យកតញ្ញូ
៥. នៅជាមួយគ្រូ ឲ្យដាក់ខ្លួន
៦. នៅជាមួយមហាជន ឲ្យខន្តី
សូមកុំរវល់តែកើតទុក្ខជាមួយពាក្យសម្ដីរបស់មនុស្សមួយចំនួន។ បើទោះបីយើងខំធ្វើល្អយ៉ាងណា ក៏វាមិនអាចទៅរួចដែរ បើចង់ឲ្យអ្វីដែលយើងធ្វើនោះត្រូវតាមចិត្តមនុស្សគ្រប់គ្នា។ ត្រូវគិតថា គ្រប់បញ្ហាដែលចូលមកក្នុងជីវិត គឺជាវិញ្ញាសាដែលយើងត្រូវតែឆ្លងកាត់។ បើអត់មានបញ្ហា តើជីវិតយើងនឹងរឹងមាំបានដោយរបៀបណា?
យើងរស់នៅក្នុងសង្គមមនុស្សដែលចៀសមិនផុតពីការរិះគន់ ត្បិតម្នាក់ៗមានការគិតខុសៗគ្នា។ អ្វីដែលសំខាន់នោះគឺខ្លួនយើងដឹងថាខ្លួនឯងកំពុងធ្វើអ្វី ដើម្បីអ្វី ដើម្បីអ្នកណា ហើយមិនប៉ះពាល់ដល់អ្នកណា នោះគឺគ្រប់គ្រាន់ហើយ។ សម្រាប់មតិរិះគន់ យើងគួរត្រងយកនូវអ្វីដែលល្អ អ្វីដែលនាំឲ្យរីកចម្រើន ពាក្យណាមិនល្អ បំភ្លេចចោលទៅ ព្រោះពាក្យសម្ដីពីមាត់មនុស្សមិនមែនសុទ្ធតែមាសទេ ពេលខ្លះក៏អាចជាសំរាម ជាថ្នាំពុល បើយកមកទុកក្នុងខួរក្បាលវានឹងនាំឲ្យខូចខួរក្បាលទទេៗ ៕
ចុចអាន៖
មនុស្សរឹងមាំ និងពោរពេញដោយក្ដីសុខផ្លូវចិត្ត តែងចងចាំទុក ៧ចំណុចនេះ
ការពិត១០យ៉ាង ឆ្លុះបញ្ចាំងចំៗពីប្រភេទមនុស្សក្នុងសង្គម