បើស្រឡាញ់គ្នាពិត ហើយមិនចង់បែកគ្នាគួរតែព្យាយាមយល់ពីគ្នានូវរឿងទាំងនេះ

2018-06-26 01:00:00
ចំនួនមតិ 0 | ចំនួនចែករំលែក 0

ស្រឡាញ់គ្នាមិនមែនស្រួលប៉ុន្មានទេ ព្រោះទោះចង់ ឬមិនចង់យូរទៅមានរឿងទាស់ទែងគ្នា។ យ៉ាងនេះហើយបើសិនជាអ្នកចង់ឲ្យស្នេហាទៅមុខ មិនបែកបាក់គ្នានោះ ម្នាក់ៗត្រូវព្យាយាមយល់ពីគ្នា អធ្យាស្រ័យគ្នានូវចំណុចដូចខាងក្រោមនេះ ៖

១. ពេលវេលា

រឿងពេលវេលានេះមួយគឺនៅតែជាដើមហេតុឲ្យមនុស្សពីរនាក់ឈ្លោះគ្នា ព្រោះម្នាក់ទាមទារខ្លាំង ម្នាក់ទៀតចាប់ផ្ដើមមានសម្ពាធខ្លាំង ហើយក៏កើតជាបញ្ហាជាមួយគ្នា។ អ្នកទាំងពីរគួរព្យាយាមយល់ពីគ្នា ហើយបែកចែកពេលឲ្យគ្នាឲ្យបានសមល្មម ដើម្បីកុំឲ្យមានអ្នកណាម្នាក់គិតថាម្នាក់ទៀតទុកគេចោល។ លើសពីនេះការអធ្យាស្រ័យក៏ត្រូវមានដែរ ព្រោះពេលខ្លះគេពិតជារវល់មែន ហើយពេលខ្លះគេក៏ចង់បានពេលផ្ទាល់ខ្លួនដែរ។

រូបតំណាង

**២. សេរីភាព**

ពេលមានស្នេហាគឺត្រូវតែបាត់បង់ខ្លះហើយ គ្រាន់តែតិច ឬច្រើនតែប៉ុណ្ណោះ ព្រោះអ្នកមិនអាចធ្វើខ្លួនដូចនៅតែឯងបានទេ ប៉ុន្តែកុំដល់ថ្នាក់ហាមឃាត់ ឬធ្វើឲ្យម្នាក់ៗមានសម្ពាធនោះ។ គួរតែផ្ដល់សេរីភាពឲ្យគេបានគ្រប់គ្រាន់ ព្រោះអ្នកទាំងពីរក៏មិនទាន់មានសិទ្ធិអីលើគ្នាដែរ។ ការប្រាប់ដំណឹង ការសួរយោបល់ ការផ្ដល់ជាគំនិត គឺត្រូវតែមាន ប៉ុន្តែមិនមែនបញ្ជា ឬហាមប្រាមគេឡើយ។

៣. ការហួងហែង

កុំបណ្ដោយខ្លួនឲ្យទៅជាមនុស្សដែលងប់នឹងការស្រឡាញ់ខ្លាំងពេក រហូតភ្លេចអស់ហេតុផល។ ការប្រចណ្ឌហួងហែងត្រូវតែមាន ប៉ុន្តែកុំខ្លាំងជ្រុលពេក ព្រោះអាចធ្វើឲ្យទំនាក់ទំនងមានភាពប្រេះឆា។ រកហេតុផល ស្ដាប់ម្នាក់ៗពន្យល់ ជឿជាក់គ្នា អធ្យាស្រ័យគ្នានោះទើបអាចជួយឲ្យស្នេហារស់បានយូរ។

៤. ការរំពឹងហួសហេតុ

ម្នាក់ៗពេលមានស្នេហាគឺតែងរំពឹងចង់បានស្នេហាឥតខ្ចោះ ប៉ុន្តែការរំពឹងខ្ពស់លើសពីការពិតបែបនេះ នឹងបង្កឲ្យម្នាក់ៗខកចិត្ត អស់សង្ឃឹម និងមិនចង់បន្ត។ ត្រូវចាំថាមនុស្សយើងគ្មានអ្នកណាអាចល្អគ្រប់ដប់ឡើយ ហើយក៏មិនអាចរំពឹងចង់បានស្នេហាដូចក្នុងរឿងភាគដែរ ព្រោះក្នុងតថភាពពិតគឺមិនអាចមាន ដូច្នេះមានតែការទទួលយក ការអត់ឱនប៉ុណ្ណោះទើបម្នាក់ៗសប្បាយចិត្ត។

៥. ការតាំងចិត្ត

ពេលខ្លះស្រឡាញ់គ្នាបើខ្វះការតាំងចិត្តក៏ពិបាកកាន់ដៃគ្នាទៅមុខដែរ ព្រោះពេលមានបញ្ហាត្រូវការឲ្យម្នាក់ៗតស៊ូ និងដោះស្រាយវាមិនមែនរត់ចោលគ្នានោះទេ។ បែបនេះហើយអ្នកទាំងពីរត្រូវចេះអត់ធ្មត់ជាមួយគ្នា លើកលែងឲ្យគ្នានូវរឿងដែលអាចលើកលែងបាន កុំនាំគ្នានាំរឿងមកឈ្លោះគ្នាអី៕