បើ​ឮពាក្យ​​ ៥​ឃ្លា​នេះ​ចេញ​ពី​មាត់​គេ មាន​ន័យ​ថា​គេ​ចង់​បែក​ពី​អ្នកហើយ

  • 2018-06-22 05:00:00
  • ចំនួនមតិ 0 | ចំនួនចែករំលែក 0

ចន្លោះមិនឃើញ

ពេល​ខ្លះ​មិន​បាច់​ទាល់​តែ​និយាយ​ពាក្យ​បែក​ចំៗ​ទេ ព្រោះ​មនុស្ស​ធំ​ៗ​អស់​ទៅ​ហើយ​អាច​នឹង​យល់​ហើយ​បើ​គេ​ចង់​បែក​គ្នា​នោះ។ ភាគ​ច្រើន​បើ​គេ​ចង់​បែក​ពី​អ្នក គេ​តែង​ជំនួស​ពាក្យ​ប៉ុន្មាន​ឃ្លា​នេះ​មក​វិញ ព្រោះ​មិន​ចង់​និយាយ​ឲ្យ​អាក្រក់​ស្ដាប់​ពាក្យ ហើយ​បើ​អ្នក​បាន​លឺ​ពាក្យ​ដូច​ខាង​ក្រោម​នេះ​ហើយ អ្នក​គួរ​តែ​ត្រៀម​ចិត្ត​ហើយ​ដើរចេញ​ទៅ៖

១. ខ្ញុំ​ហត់​ណាស់ ខ្ញុំ​ចង់​សម្រាក

គេ​មិន​ប្រើ​ពាក្យ​ចំៗ​ថា​បែក​គ្នា​ទេ តែ​បើ​អ្នក​លឺ​ពាក្យ​នេះ​ចេញ​ពី​មាត់​គេ​ហើយ នោះ​មានន័យ​ថា​គេ​លែង​ចង់​នៅ​ជាមួយ​អ្នក​ទៀត​ហើយ។ គិត​ថា​អ្នក​ក៏​មាន​អារម្មណ៍​បែប​នេះ​ដែរ តែ​អាច​នឹង​ចាំ​មើល​គេ​ថា​គេ​មក​វិញ​ឬ​ក៏​អត់​បន្ទាប់​ពី​អ្នក​ឲ្យ​គេ​សម្រាក​ហើយ តែ​ជឿ​ទៅ​គេ​ពិត​ជា​អស់អារម្មណ៍​ហើយ។

២. ខ្ញុំ​គ្រាន់​ចង់​នៅ​ម្នាក់​ឯង​មួយ​រយៈ

ពាក្យ​នេះ​មិន​មែន​មួយ​រយៈ​ទេ ព្រោះ​គេ​និយាយ​បែប​នេះ​គ្រាន់​តែ​ឲ្យ​ល្អ​ស្ដាប់​តែ​ប៉ុណ្ណោះ។ ពាក្យ​នេះ​ស្ដាប់​ហើយ​ដូច​យក​អី​មក​ចាក់​ដើមទ្រូង​អីចឹង ព្រោះ​មនុស្ស​ស្រឡាញ់​គ្នា​សុខៗ គេ​ក៏​និយាយ​ថា​គេ​ចង់​នៅ​ម្នាក់​ឯង នេះ​មាន​ន័យ​ថា​គេ​អត់​ចង់​មាន​អ្នក​ក្នុង​ជីវិត​ទៀត​ទេ។

៣. អត់​ចង់​ឃើញ​អ្នក​ពិបាក​ចិត្ត​ដោយសារ​ខ្ញុំ​ទៀត

ការ​ពិត​ពាក្យ​នេះ​ស្ដាប់​ទៅ​គឺ​គេ​ចិត្ត​ល្អ​ណាស់ តែ​ការ​ពិត​គេ​គ្រាន់​តែ​ចង់​ឲ្យ​អ្នក​ដើរ​ចេញ​ដោយ​ខ្លួន​ឯង​ប៉ុណ្ណោះ។ គេ​និយាយ​ក៏​ត្រូវ​ដែរ ព្រោះ​គេ​អស់​អារម្មណ៍​ទៅ​ហើយ បើ​នៅ​ជាមួយ​អ្នក​ទៀត​ក៏​គ្មាន​អារម្មណ៍​ស្រឡាញ់​អី​ដែរ ដូច្នេះ​បើ​គេ​និយាយ​ពាក្យ​នេះ​ហើយ អ្នក​គួរ​តែ​យល់។

រូបតំណាង

៤. គ្រាន់​តែ​ឥឡូវ​ចង់​យក​ពេល​រៀន ឬ​ធ្វើ​ការ​ឲ្យ​បាន​ល្អ អត់​ចង់​គិត​អី​ច្រើន​ទៀត​ទេ

ស្ដាប់​ហើយ​អាច​អស់​សំណើច ព្រោះ​ពេល​នេះ​គេ​ក្លាយ​ជា​សិស្ស​ល្អ និង​បុគ្គលិក​គំរូ។ មនុស្ស​បើ​នៅ​ស្រឡាញ់​គេ​រវល់​យ៉ាង​ណា​ក៏​គេ​ឆ្លៀត​បាន​ដែរ ហើយ​ក៏​អត់​មាន​អី​ត្រូវ​ប៉ះពាល់​លើ​រឿង​ទាំង​នោះ​ដែរ ព្រោះ​មិន​មែន​គេច​ម៉ោង​រៀន ឬ​ឈប់​ធ្វើ​ការ​ដើម្បី​ជួប​គ្នា​ឯណា។ និយាយ​បែប​នេះ​គ្រាន់​តែ​ឲ្យ​ស្រួល​ស្ដាប់​ប៉ុណ្ណោះ ការ​ពិត​ដូច​តែ​បែក​គ្នា​ដែរ​ទេ។

៥. គ្រាន់​តែ​ចង់​នៅ​ស្ងាត់ អត់ចង់​ជួប​ អត់​ចង់​និយាយ​អី​ជាមួយ​ណា​គេ​ទាំង​អស់

ស្ដាប់​មើល​ទៅ​មិន​មែន​គេ​មិន​ចង់​ជួប​តែ​អ្នក​ម្នាក់​ទេ គឺ​ទាំង​អស់ តែ​អ្នក​ត្រូវ​ដឹង​ថា​គ្មាន​ពី​ណា​ទៀត​ទេ​ដែល​គេ​មិន​ចង់​ជួប​ក្រៅ​ពី​អ្នក​នោះ។ គេ​និយាយ​បែប​ហ្នឹង​គ្រាន់​កុំ​ឲ្យ​អ្នក​អន់​ចិត្ត ឬ​គិត​ច្រើន​តែ​ប៉ុណ្ណោះ ទាំង​ការ​ពិត​គេ​អត់​ចង់​សូម្បី​ឮសំឡេង​អ្នក។

រូបតំណាង

ជឿ​ណា​បើ​មនុស្ស​ស្រឡាញ់​គ្នា​មែន គេ​គ្មាន​ថ្ងៃ​យក​លេស​ទាំង​នេះ​មក​ដាក់​មុខ​ឡើយ៕

ចុចអាន៖ស្រឡាញ់​ប៉ះ​ចំ​មនុស្ស​ប្រុសខុស ជាតិនេះមនុស្ស​ស្រីគ្មាន​ថ្ងៃ​ស្គាល់​សុភមង្គល​ឡើយ


អត្ថបទ៖ ផេង ផលធិតា