ផ្លែឈើ៦មុខ ញ៉ាំឆ្ងាញ់ហើយជួយឱ្យធ្មេញសភ្លឺចែងចាំងទៀត

2018-06-23 04:37:16
ចំនួនមតិ 0 | ចំនួនចែករំលែក 0

ធ្មេញសគឺជាមន្តស្នេហ៍របស់មនុស្សគ្រប់រូប ព្រោះវាអាចឱ្យអ្នកបញ្ចេញស្នាមញញឹមបានយ៉ាងមានទំនុកចិត្ត ហើយទាក់ទាញ។ ប៉ុន្តែដើម្បីបានធ្មេញសស្អាត អ្នកមិនចាំបាច់ពិបាកទៅរកថ្នាំដុសធ្មេញច្រើនក៏បាន ត្រឹមតែញ៉ាំផ្លែឈើ៦មុខនេះជាប្រចាំក៏អាចបានស្នាមញញឹមដ៏ស្រស់ប្រិមប្រិយបានដែរ។

ចុចអាន៖ ចង់បានធ្មេញស អ្នកមានធ្មេញលឿងគួរបញ្ឈប់ទម្លាប់ទាំងនេះចេញសិន

១. ឪឡឹក៖

នៅក្នុងផ្លែឪឡឹកមានផ្ទុកវីតាមីន C យ៉ាងច្រើនសន្ធឹកសន្ធាប់ ដែលល្អបំផុតសម្រាប់ធ្មេញនិងអញ្ចាញ។ វាមានសមត្ថភាពប្រឆាំងអុកស៊ីតកម្មដែលជំនួយដល់ការការពារការបែកសម្បកធ្មេញ និងជួយឱ្យអញ្ចាញមានសុខភាពល្អ។

២. ប៉ោម៖

អាស៊ីត Malic ដែលមានក្នុងផ្លែប៉ោមគឺជាសារធាតុដ៏សកម្ម ហើយត្រូវបានប្រើប្រាស់ជាគ្រឿងផ្សំរបស់ថ្នាំដុសធ្មេញ។ វាមានតួនាទីយ៉ាងពូកែក្នុងការបង្កើនសកម្មភាពក្នុងការបញ្ចេញទឹកមាត់ សម្អាតធ្មេញ និងកម្ចាត់កំណក និងកាកសំណល់។ ការញ៉ាំផ្លែប៉ោមមួយផ្លែក្រោយអាហាររាល់ថ្ងៃ អ្នកនឹងអាចបានធ្មេញសភ្លឺ និងក្លិនមាត់ប្រហើរ។

៣. ស្ត្រូបឺរី៖

ដូចគ្នានឹងផ្លែប៉ោមដែរ ស្ត្រូបឺរីសម្បូរទៅដោយអាស៊ីត Malic និងសមាសធាតុ Ellagitannin ប្រឆាំងអុកស៊ីតកម្ម ជួយសម្លាប់បាក់តេរីដែលបណ្ដាលឱ្យអញ្ចាញទៅជាហើម ឬរលាក។ បន្ថែមពីនេះ នៅក្នុងផ្លែស្ត្រូបឺរីក៏មានវីតាមីន C ដែលមានសារសំខាន់ក្នុងការជួយការពារអញ្ចាញផងដែរ។

៤. ក្រូច៖

សមាសភាពអាស៊ីតជាច្រើនដែលមាននៅក្នុងផ្លែក្រូចនឹងជួយឱ្យធ្មេញសស្អាត និងភ្លឺបាន។ វាមានផ្ទុកអង់ហ្ស៊ីមដែលអាចសម្លាប់បាក់តេរីដែលបណ្ដាលឱ្យធ្មេញពុកផុយ និងមានក្លិនមិនល្អ។ ក្រៅពីនេះ អ្នកអាចប្រើក្រូចឆ្មារដើម្បីសម្អាតធ្មេញ ដោយដាក់អំបិលបន្តិចរោយពីលើចំណិតក្រូចឆ្មារ ហើយយកមកដុសលើធ្មេញ នោះអ្នកនឹងបានរូបមន្តមួយដ៏មានប្រសិទ្ធភាព មិនចាំបាច់ប្រើថ្នាំដុសធ្មេញក៏បាន។

ចុចអាន៖ ធ្មេញលឿងអាចមកជាសវិញ ចាំបាច់អស់លុយអីច្រើន!

៥. ម្នាស់៖

សារធាតុ Bromelain ដែលមាននៅក្នុងផ្លែម្នាស់ដើរតួនាទីយ៉ាងសកម្មក្នុងការប្រឆាំងការរលាក និងជួយសម្អាតធ្មេញបានយ៉ាងល្អ។ ការញ៉ាំផ្លែម្នាស់នឹងជួយឱ្យអ្នកអាចកម្ចាត់ស្និម និងកាកសំណល់នៅជាប់ធ្មេញ ហើយជួយឱ្យធ្មេញប្រែជាសភ្លឺក្នុងរយៈពេលដ៏ខ្លី។

៦. ត្របែក៖

ត្របែកគឺជាផ្លែឈើមួយប្រភេទដែលមានសារធាតុចិញ្ចឹម និងព្យាបាលរោគបានច្រើនមុខ។ នៅក្នុងត្របែកមួយផ្លែមានជាតិកាល់ស្យូម និងជាតិដែកខ្ពស់ ដែលអាចជួយឱ្យធ្មេញរឹងមាំ។ ការញ៉ាំផ្លែត្របែកជាប្រចាំ អ្នកនឹងទទួលបានធ្មេញសស្អាត បំបាត់អាការៈហើមអញ្ចាញធ្មេញ ឈាមធ្មេញ ឬតាមអញ្ចាញធ្មេញជាដើម៕

ប្រភព៖ redbookmag ប្រែសម្រួល៖ សរ សុគន្ធី