ឥរិយាបថថ្លៃថ្នូរទាំង៦ស្ថានភាពដែលនារីទាន់សម័យគួរប្រកាន់ខ្ជាប់

2018-06-20 06:22:38
ចំនួនមតិ 0 | ចំនួនចែករំលែក 0

ការរៀបឥរិយាបថគឺជារឿងសំខាន់សម្រាប់នារី ព្រោះនាងនឹងត្រូវបានគេវាយតម្លៃយ៉ាងឆាប់រហ័ស។ ដូច្នេះបើមិនចង់ឱ្យមើលទៅឆ្គាំឆ្គងភ្នែកអ្នកជុំវិញខ្លួន នារីគួរតែប្រកាន់ខ្ជាប់នូវអាកប្បកិរិយាដូចខាងក្រោមនេះ ដើម្បីក្លាយជានារីទាន់សម័យ និងទទួលបានការឱ្យតម្លៃ។

១. ពេលនិយាយស្ដី

ការនិយាយស្រែកឮៗគឺជាអាកប្បកិរិយាមិនទន់ភ្លន់ឡើយសម្រាប់នារី។ ដូច្នេះរាល់ពេលនិយាយស្ដី អ្នកគួរដឹងពីទម្ងន់សំឡេងដែលត្រូវប្រើ មិនគួរសើចឮៗ ឬនិយាយឮៗខ្លាំងដូចឈ្លោះគ្នានោះទេ។
ពេលនិយាយស្ដីជាមួយមិត្តភ័ក្ដិ ឬមនុស្សជិតស្និទ្ធ អ្នកមិនត្រូវនិយាយអ្វីមិនល្អពីមនុស្សដែលអ្នកស្រលាញ់ ឬប្ដីប្រាប់អ្នកណាឡើយ ទោះបីជិតស្និទ្ធយ៉ាងណាក៏ដោយ។
ម្យ៉ាងទៀត កុំចូលរួមក្នុងការនិយាយដើមអ្នកណាម្នាក់ ព្រោះបើអ្នកចូលរួមសូម្បីមួយម៉ាត់ អ្នកនឹងត្រូវទទួលរងគ្រប់លទ្ធផលនៃការនិយាយដើមនេះ។

ចុចអាន៖ រឿងតូចៗងាយៗដែលអ្នកគួរទម្លាប់ធ្វើដើម្បីឲ្យជីវិតកាន់តែរីករាយ និងស្រស់ស្រាយ

២. ពេលបើកបរ

ពេលចូលក្នុងរថយន្ត នារីគួរតែប្រុងប្រយ័ត្នចំពោះកាយវិការរបស់ខ្លួន។ គួរអង្គុយលើគែមកៅអី រួចសឹមលើកជើងដាក់ចូលរថយន្ត។ សម្រាប់នារី ពេលស្លៀកខោគឺងាយស្រួលក្នុងការធ្វើដំណើរ មិនថាក្នុងរថយន្ត ឬម៉ូតូទេ ព្រោះអ្នកនឹងមិនបាច់ភ័យខ្លាចចំពោះការវាយតម្លៃរបស់អ្នកដទៃ ឬបញ្ហាដូចពេលស្លៀកសំពត់ឡើយ។
បើស្លៀកសំពត់ជិះម៉ូតូ គួររកសំពត់ ឬក្រណាត់រុំពីក្រៅ ដើម្បីកុំឱ្យលេចលើលេចក្រោម ឬពិបាកក្នុងការដាក់ជើង។ ចំណែកពេលជិះរថយន្តក៏គួរប្រុងប្រយ័ត្ននៅពេលដាក់ជើងចុះ។

៣. ពេលរួមតុអាហារ

បើត្រូវការលាបក្រែម អ្នកអាចលាបនៅនឹងតុបាន ប៉ុន្តែបើត្រូវការសិតសក់ លាបម៉ាស្ការ៉ា គួរតែងើបទៅបន្ទប់ទឹក។
កុំដាក់សំញែងរបស់របរក្នុងកាបូប ឬដាក់កាបូបលុយរាយលើតុអាហារនៅទីសាធារណៈ។ វាអាចមានគ្រោះថ្នាក់ដោយប្រការណាមួយ។ កាបូបស្ពាយ អ្នកអាចព្យួរលើបង្អែកកៅអី ឬដាក់លើកម្រាលដែលនៅក្បែរជើង។
ពេលញ៉ាំអាហាររួច កុំដាក់សមឬស្លាបព្រានៅលើតុ គួរដាក់លើចាន ដើម្បីឱ្យគេដឹងអ្នកបញ្ឈប់ការញ៉ាំ និងកុំឱ្យប្រឡាក់តុបាយ។

៤. ពេលភ្ញៀវមកលេងផ្ទះ

បើមានអ្នកណាម្នាក់ទើបមកលេងផ្ទះអ្នកលើកទីមួយ គួរណែនាំពួកគេឱ្យស្គាល់បន្ទប់ទឹកឱ្យហើយ ដើម្បីជៀសវាងភាពខ្មាសអៀននៅពេលសួរម្ចាស់ផ្ទះរកបន្ទប់ទឹក។
បើអ្នកមកលេងផ្ទះអ្នកមានយកផ្លែឈើឬរបស់ញ៉ាំមកជាមួយ គួរដាក់របស់ទាំងនោះជារួមដើម្បីបានញ៉ាំទាំងអស់គ្នាតែម្ដង។

៥. ពេលទៅលេងផ្ទះអ្នកដទៃ

គួរប្រាប់ដំណឹងដល់ម្ចាស់ផ្ទះជាមុន ដើម្បីបានត្រៀមខ្លួន និងរៀបចំរបស់ឱ្យបានស្រេច។ សាកស្រមៃទៅមើលថា បើមានអ្នកមកលេងផ្ទះអ្នកដោយមិនបានប្រាប់ដំណឹងមុន អ្នកអាចនឹងពិបាកក្នុងការរកម្ហូប និងរបស់ទទួល។
គួរចូលចង្ក្រានដើម្បីជួយរៀបចំអាហារ ទោះបីម្ចាស់ផ្ទះនិយាយថា "មិនបាច់" ក៏ដោយ ដើម្បីបង្ហាញពីការគោរព និងឱ្យតម្លៃដល់ម្ចាស់ផ្ទះ ហើយមនុស្សស្រីទៅណាក៏មិនអាចចោលការងារផ្ទះនេះបានដែរ។

ចុចអាន៖ ៥ហេតុផលដែលមនុស្សស្រីត្រូវចេះការងារផ្ទះ ទោះសម័យកាលដើរដល់ណាក៏ដោយ

៦. ពេលអង្គុយ

បើអង្គុយលើកៅអីទាប អ្នកមិនគួរអង្គុយខ្វែងជើង ឬគងអន្ទាក់ខ្លានោះទេ ព្រោះវាមើលទៅមិនសមរម្យ។ គួរអង្គុយដោយដាក់ជើងស្របគ្នាទៅចំហៀងតាមស្រួលខ្លួន។ បើអង្គុយយូរចុកជើង អាចប្ដូរទៅចំហៀងម្ខាងទៀត ឬគងកែងជើងបន្តិចបាន។

ប្រភព៖ Womanitely ប្រែសម្រួល៖ សរ សុគន្ធី