៥ហេតុផលដែលមនុស្សស្រីត្រូវចេះការងារផ្ទះ ទោះសម័យកាលដើរដល់ណាក៏ដោយ

2018-06-15 01:00:00
ចំនួនមតិ 0 | ចំនួនចែករំលែក 0

បច្ចុប្បន្នយើងឃើញថាមានមនុស្សស្រីមួយចំនួនលែងសូវខ្វល់ខ្វាយជារឿងការងារផ្ទះទៀតហើយ ព្រោះពួកគេគិតថាគេត្រូវធ្វើការងារច្រើននៅខាងក្រៅ ឬគិតថាមិនសូវជាសំខាន់។ យ៉ាងណាក៏ដោយ កូនស្រីត្រូវចាំថាទោះមានឋានៈខ្ពង់ខ្ពស់ មានការងារធំដុំប៉ុណ្ណាក៏ដោយក៏មិនត្រូវបំភ្លេចចោលការងារផ្ទះទាំងស្រុងដែរ។ ខាងក្រោមនេះជាហេតុផលសំខាន់ ៥យ៉ាងដែលមនុស្សស្រីត្រូវតែចេះការងារផ្ទះ ទោះបីសម័យកាលជឿនលឿនដល់ណាក៏ដោយ ៖

១. ដើម្បីខ្លួនឯង

បើអ្នកមិនចេះបែបនេះ តើអ្នករស់នៅដោយខ្លួនឯងបានទេ? ពេលអ្នកមានលុយអ្នកអាចញ៉ាំរបស់គេបាន ប៉ុន្តែធ្លាប់ស្រមៃអត់អ្នកអាចញ៉ាំបានរាល់ថ្ងៃ? ចុះបើថ្ងៃ ណាមួយតម្រូវឲ្យអ្នកធ្វើវាដោយខ្លួនឯង អ្នកគិតយ៉ាងម៉េច? លើសពីនេះអ្នកការរៀបចំផ្ទះ បោក គក់ ទាំងនេះសុទ្ធតែអ្នកត្រូវធ្វើវាដោយខ្លួនឯង ចុះបើអ្នកមិនចេះផង តើអ្នកសង្ឃឹមអី?

២. ភាពកក់ក្ដៅសម្រាប់គ្រួសារ

សួរថាទៅញ៉ាំនៅក្រៅរាល់ថ្ងៃគ្រួសារគ្មានក្ដីសុខមែនទេ? ឬជួលអ្នកនៅជាមួយមកគ្រួសារគ្មានក្ដីសុខមែនទេ? នេះប្រហែលអាចមានមនុស្សស្រីជាច្រើនចោទសួរ តែកូនស្រីទាំងឡាយត្រូវចាំណា ទោះអ្នកមានលុយច្រើនអាចទៅញ៉ាំបាយក្រៅរាល់ថ្ងៃ អាចជួលឈ្នួលមក ក៏មិនអាចប្ដូរនៅការធ្វើម្ហូបដោយផ្ទាល់ដៃឲ្យកូនៗញ៉ាំ ឲ្យប្ដីពិសាបានដែរ។ អ្នកប្រាកដអត់ថារបស់គេឆ្ងាញ់ ស្អាត ហើយមានអារម្មណ៍កក់ក្ដៅដូចម្ហូបដែលអ្នកធ្វើដោយខ្លួនឯង?

៣. ជាចំណងមួយដែលជួយចងចិត្តស្វាមី

ពេលត្រឡប់មកផ្ទះវិញ មានម្ហូបឆ្ងាញ់ ផ្ទះស្អាត បន្ទប់មានរបៀបរៀបរយ តើមនុស្សប្រុសណាចង់ទៅក្រៅនោះ? ប៉ុន្តែពេលមកស្អីក៏រញ៉េរញ៉ៃ បាយទឹកក៏មិនរៀបចំទៀត តើប្ដីអាចមានអារម្មណ៍បែបណា? ប៉ុន្តែបើសិនអ្នកជានារីដែលមានការងារក្រៅធ្វើដែរ តើមានកម្លាំងឯណា? អ្នកអាចជួលគេបាន តែអ្នកក៏ត្រូវចេះដែរ ព្រោះពេលខ្លះអ្នកផ្សេងអាចធ្វើមិនត្រូវមាត់អ្នក ដូច្នេះអ្នកអាចបង្រៀនគេបាន ម្យ៉ាងទៀតបើអ្នកបានស្វាមីដែលយល់នោះ គឺគាត់អាចជួយអ្នកបាន តែមិនមែនមានន័យថាឲ្យគាត់ធ្វើទាំងអស់នោះទេ។

៤. ធ្វើឲ្យប្ដីមានមោទនភាពដែលមានអ្នកជាប្រពន្ធ

បើអ្នកពូកែរឿងធ្វើម្ហូប ពេលមានមិត្តភក្តិ ឬបងប្អូនមកលេង ហើយគេសរសើរថាម្ហូបដែលអ្នកធ្វើឆ្ងាញ់នោះ គាត់ក៏សប្បាយចិត្ត និងមានមោទនភាពដែលបានអ្នកធ្វើប្រពន្ធដែរ។ ទៅណាមកណាក៏គាត់សប្បាយចិត្ត ហើយអ្នកក៏កាន់តែមានតម្លៃក្នុងភ្នែកគាត់។

៥. ម្ដាយក្មេកពេញចិត្ត

ស្ទើរតែទាំងអស់ទៅហើយដែលម្ដាយក្មេកត្រូវការកូនប្រសាដែលពូកែរឿងការងារផ្ទះ ប៉ុន្តែបើអ្នកមិនចេះសោះនោះ ច្បាស់ជាមិនសូវពេញចិត្តម្ដាយក្មេកនោះទេ។ ពេលគាត់មកលេងផ្ទះអ្នកត្រូវធ្វើម្ហូប រៀបចំផ្ទះឲ្យបានស្អាត មិនមែនឲ្យគាត់ធ្វើម្ហូប និងបោសជូតផ្ទះឲ្យអ្នកនោះទេ ដូច្នេះដើម្បីឲ្យមានទំនាក់ទំនងល្អជាមួយម្ដាយក្មេក កូនស្រីត្រូវពូកែ។

ការពិតការងារផ្ទះ មិនមែនជាសម្ពាធសម្រាប់មនុស្សស្រីនោះទេ អ្វីដែលសំខាន់គឺ ខ្លួនយើងចេះ អាចធ្វើបាន ព្រោះវាជាចំណុចសំខាន់មួយដែលមនុស្សស្រីមិនអាចខ្វះបាន៕

ចុចអាន៖ចំណុចទាក់ទាញខុសគ្នារវាងនារីដែលមានចរិតចាស់ទុំ និងនារីដែលមានចរិតកូនក្មេង

អត្ថបទ៖ ផេង ផលធិតា