និស្សិតពេទ្យខ្មែរ ស៊ីម ច័ន្ទពន្លឺ រៀបរាប់ដំណើរដើមទងចូលប្រឡង The Voice វៀតណាម

2018-06-15 02:49:42
ចំនួនមតិ 0 | ចំនួនចែករំលែក 0

កាលពីឆ្នាំមុន កម្មវិធីប្រលងចម្រៀង “The Voice” វៀតណាមបានទៅរើសបេក្ខជនដល់ខេត្តដែល ស៊ីម ច័ន្ទពន្លឺរស់នៅ តែដោយសារតែនៅអៀនប្រៀនច្រើន ទើបប្រុសស្អាតរូបនេះមិនហ៊ានទៅប្រលង ទាំងមិត្តភ័ក្ដិរបស់លោកទៅដាក់ពាក្យភ្លូកទឹកភ្លូកដី។

មុននេះបន្តិច បេក្ខជន The Voice វៀតណាម ជនជាតិខ្មែរ ស៊ីម ច័ន្ទពន្លឺបានជួបជាមួយបណ្ដាញព័ត៌មានវៀតណាមដើម្បីចែករំលែកពីការដែលខ្លួនចុះឈ្មោះប្រលងក្នុងកម្មវិធី “The Voice” ឆ្នាំនេះ។ នៅក្នុងជំនួបនេះ និស្សិតពេទ្យឆ្នាំទី៥នៃសកលវិទ្យាល័យវេជ្ជសាស្ត្រ Thai Nguyen បានចែករំលែកថា ខ្លួនស្រលាញ់ការច្រៀងតាំងពីក្មេងម្ល៉េះ ហើយក៏មានបំណងដាក់ពាក្យទៅប្រលងច្រើនដងដែរហើយ។ មុនពេលទៅប្រលង លោកចាប់ផ្ដើមច្រៀងដោយការចូលរួមក្នុងក្លឹបចម្រៀងនៅសាលា។

ទោះបីជាស្រលាញ់សិល្បៈចម្រៀងខ្លាំងក្ដី តែដោយសារអត្តចរិតអៀនប្រៀនរបស់ខ្លួន លោកបានធ្វើឲ្យរបូតឱកាសជាច្រើន។ ជាក់ស្ដែង កាលពីឆ្នាំ២០១៧ កម្មវិធី “The Voice” វៀតណាមបានចុះមករើសបេក្ខជនដល់ខេត្ត Thai Nguyen ផ្ទាល់ដែលជាខេត្តដែលលោកកំពុងរស់នៅនិងសិក្សា។ មិត្តភ័ក្ដិរបស់ប្រុសក្មេងនេះបាននាំគ្នាទៅដាក់ពាក្យគ្រប់គ្នា អត់តែលោកដោយសារតែអៀនពេក។ ដូច្នេះនៅក្នុងឆ្នាំនេះ លោកបានតាំងចិត្តក្លាហានទៅប្រលងឲ្យទាល់តែបាន។ ពន្លឺក៏បន្ថែមផងដែរថា ការប្រលងនេះគឺជាអនុស្សាវរីយ៍មួយដែលលោកមិនអាចបំភ្លេចបាន។

គួរបញ្ជាក់ថាបេក្ខជនអាយុ ២៥ឆ្នាំរូបនេះ មានស្រុកកំណើតនៅខេត្តតាកែវ និងបានមកសិក្សានៅប្រទេសវៀតណាមរយៈពេលជាង ៥ឆ្នាំហើយ។ ក្នុងវគ្គ Blind Audition នៃកម្មវិធី The Voice វៀតណាមរដូវកាលទី៨ ដែលបានចាក់ផ្សាយកាលពីយប់ថ្ងៃទី៣ខែមិថុនាកន្លងទៅនេះ ពន្លឺ បានបកស្រាយបទ “Huong Oi” ធ្វើឲ្យ coach តារាចម្រៀង Thu Phuong រើសយកតាំងពីលោកបញ្ចេញឃ្លាដំបូង។ បន្ទាប់មក តារាចម្រៀង Toc Tien ក៏ចុចដណ្ដើមលោកដូចគ្នា។ នៅចុងបញ្ចប់ លោកបានជ្រើសចូលក្រុមរបស់តារាចម្រៀង Thu Phuong៕

ចុចទស្សនា ការបង្ហាញសមត្ថភាពរបស់ ពន្លឺ ក្នុងវគ្គ Blind Audition