មើលត្រៀម! សំណួររសើបៗដែលកូនកំលោះកូនក្រមុំគេចមិនសូវផុតក្នុងថ្ងៃរៀបការ

2018-06-12 08:41:02
ចំនួនមតិ 0 | ចំនួនចែករំលែក 0

អាចនិយាយបានថា ការសម្ភាសកូនកំលោះកូនក្រមុំ គឺជាពេលវេលាដ៏រំភើប រីករាយមួយសម្រាប់ទាំងម្ចាស់កម្មវិធី និងភ្ញៀវកិត្តិយស។ ដើម្បីបង្កបរិយាកាសឲ្យកាន់តែរីករាយ ពិធីករតែងលើកយកសំណួរដែលគួរឲ្យចាប់អារម្មណ៍ និងរសើបៗមួយចំនួន ដែលសំណួរខ្លះបើសាមីខ្លួនអាចត្រៀមចម្លើយទុក ឬនិយាយគ្នាមុនជាមួយពិធីករ នោះវានឹងធ្វើឲ្យបរិយាកាសកម្មវិធីកាន់តែប្រសើរ។ ដូច្នេះ ដើម្បីជាការត្រៀមខ្លួន កញ្ញា សូមបង្ហាញជូននូវសំណួរពិសេសៗដូចខាងក្រោម៖

១. ជួបគ្នាដំបូងនៅឯណា?

គឺជាសំណួរដំបូងដែលពិធីករក្នុងពិធីមង្គលការនិយមសួរឲ្យសាមីខ្លួនឆ្លើយ ថាតើពួកគេជួបគ្នាដំបូងនោះនៅទីណា ដោយរបៀបណា អ្នកណាជាអ្នកនាំឲ្យជួប ដើម្បីជាការបើកឲ្យអ្នកទាំងពីរបានរៀបរាប់ពីដំណើរដើមទងស្នេហារបស់ពួកគេឲ្យភ្ញៀវកិត្តិយសបានដឹង។

២. ស្គាល់គ្នាដំបូងដោយរបៀបណា?

ពេលដឹងថាជួបគ្នានៅឯណាហើយ គេនឹងបន្តសួរថាយ៉ាងម៉េចបានស្គាល់គ្នា? តើធ្វើការរួមគ្នា មិត្តភ័ក្ដិណែនាំ ទៅដើរលេងជាមួយគ្នា ឬអ្វីផ្សេងៗ? ហើយមានអារម្មណ៍បែបណាដែរពេលស្គាល់គ្នាដំបូង?

៣. ហេតុអ្វីក៏ស្រលាញ់គាត់?

ជាសំណួរដែលចង់ឲ្យអ្នកទាំងពីរនិយាយពីមូលហេតុ និងអារម្មណ៍ពិតរៀងៗខ្លួន ថាតើហេតុអ្វីបានជាចាប់ផ្ដើមស្រលាញ់គ្នា ហេតុអ្វីបានជាជ្រើសរើសគ្នាជាដៃគូ។ សំណួរនេះច្រើនធ្វើឲ្យកូនកំលោះ និងកូនក្រមុំរំជួលចិត្តស្រក់ទឹកភ្នែក បើសិនជាចម្លើយចាក់ដោតដល់អារម្មណ៍របស់ពួកគេ។

៤. ស្រលាញ់កូនក្រមុំ/កូនកំលោះត្រង់ចំណុចណា?

ពេលឮសំណួរនេះ ប្រាកដណាស់ថាភ្ញៀវកិត្តិយសជាច្រើននឹងចាំស្ដាប់ចម្លើយពីកូនកំលោះកូនក្រមុំដូចគ្នាថាតើអ្នកទាំងពីរចូលចិត្តអ្វី ហើយមានចំណុចអ្វីដូចគ្នា។ ជួនកាលដើម្បីឲ្យកាន់តែសប្បាយ ពិធីករអាចឈ្លេចសួរដល់ផ្នែកផ្សេងៗនៃរាងកាយឲ្យអ្នកទាំងពីរតប ដូចជាចូលចិត្ត ភ្នែក ច្រមុះ មាត់ ឬអ្វីផ្សេងៗជាដើម។

៥. ពាក្យសន្យាចំពោះគ្នា

នេះជាសំណួរមួយដែលផ្ដល់ឱកាសឲ្យភាគីទាំងពីរនិយាយអំពីការតាំងចិត្តរបស់ខ្លួនទៅវិញទៅមក ដើម្បីជីវិតគូក្នុងថ្ងៃអនាគត។ នៅពេលឆ្លើយចប់ កុំភ្លេចសម្លឹងមើលភ្នែកគ្នា ហើយថើបថ្ពាល់គ្នាផងណា ដើម្បីឲ្យជាងថតបានផ្ដិតយករូបភាពដែលបង្ហាញពីក្ដីស្រលាញ់របស់អ្នកទាំងពីរ។

៦. គម្រោង Honeymoon

ភ្ញៀវកិត្តិយសទាំងអស់ក៏ប្រហែលចង់ដឹងដែរថាកូនកំលោះកូនក្រមុំមានគម្រោងដំណើរកម្សាន្តក្រេបទឹកឃ្មុំនៅឯណា។ បើមិនទាន់មានគម្រោងទេ អាចនិយាយថាកំពុងរកមើលកន្លែងក៏បាន ប៉ុន្តែបើមានគម្រោងរួចហើយ ក៏ប្រាប់តែម្ដងទៅថានៅឯណា។

៧. មានគម្រោងយកបុត្រប៉ុន្មាននាក់?

បន្ទាប់ពីសំណួរ Honeymoon ហើយនោះក៏ត្រូវដល់គម្រោងបុត្រធីតា។

៨. ចប់កម្មវិធីយប់នេះ តើនឹងធ្វើអ្វីបន្ត?

នៅពេលពិធីករសួរសំណួរបែបនេះ ច្បាស់ណាគ្រប់គ្នាក្នុងកម្មវិធីនឹងគិតដល់រឿងវែងឆ្ងាយ ដូច្នេះបើកូនកំលោះកូនក្រមុំអាចឆ្លើយបែបកំប្លែងៗទៅវិញ នោះបរិយាកាសនឹងកាន់តែរីករាយ ៕

ចុចអាន៖

ប្រភព៖ Sanook ប្រែសម្រួល៖ ស្វាយ វ៉ាន់ថន