អប្បិយជំនឿ និងត្រណមខ្មែរដែលមិនចេះសាបរលាប

2018-06-07 06:00:00
ចំនួនមតិ 0 | ចំនួនចែករំលែក 0

ទោះបីជាសព្វថ្ងៃនេះ ជាសម័យកាលនៃវិទ្យាសាស្ត្រ មានបច្ចេកវិទ្យាទំនើបជឿនលឿនយ៉ាងណាក៏ដោយ បងប្អូនប្រជាពលរដ្ឋខ្មែរនៅតែប្រកាន់ខ្ជាប់នូវអប្បិយជំនឿ ព្រមតាំងត្រណមទាំងឡាយ ដែលមានតាំងពីបរមបុរាណមក ដូចពាក្យចាស់ពោលថា "បើមិនជឿកុំប្រមាថ"។ ហេតុដូចច្នេះ បានជាខ្មែរមិនបោះបង់ចោល ហើយបន្តជំនឿទាំងអស់នោះ តកូនតចៅរហូតមកដល់សព្វថ្ងៃ។

១. កាត់ក្រចកពេលយប់ ធ្វើឲ្យអ្នកជួបសំណាងអាក្រក់។

២. ដើរលេង ជាពិសេសនៅក្នុងព្រៃ មុនញ៉ាំអីត្រូវ រំលែកសែនទៅឲ្យម្ចាស់ទឹកម្ចាស់ដីសិន ដើម្បីឲ្យគេតាមជួយថែរក្សាបានក្តីសុខ។

រូបតំណាង

**៣.** ពេលដើរក្នុងព្រៃហាមនិយាយពាក្យផ្ដេសផ្ដាស មិនពីរោះពិសា ព្រោះអាចធ្វើឲ្យអ្នកតាម្ចាស់ព្រៃខឹង ហើយអ្នកច្បាស់ជាជួបរឿងមិនល្អ។

៤. ពេលមានមនុស្សស្លាប់ ហាមឲ្យឆ្មាសម្បុរ ៣ ពណ៌រត់រំលង ព្រោះអាចទាញឲ្យសាកសពងើបឡើង។

រូបតំណាង

៥. សត្វអាចមើលឃើញខ្មោចបាន ជាពិសេសឆ្កែ និងឆ្មា។

៦. មុនចាប់ផ្តើមសាងសង់ផ្ទះ ឬចូលនៅផ្ទះថ្មី ត្រូវមានសំណែនសុំឲ្យបានត្រឹមត្រូវជាមុនសិន ព្រោះខ្មែរតែងជឿថា ទោះនៅទីណាក៏មានព្រលឹងអារក្ស អ្នកតា និងម្ចាស់ដែលជាអ្នកកាន់កាប់កន្លែងនោះដែរ។

៧. រាប់ចំនួនតុកកែយំ ជាពិសេសនារីនៅលីវ ចង់ដឹងថាបានប្តីកំលោះឬពោះម៉ាយ ពេលឮតុកកែយំលើកដំបូងត្រូវនិយាយថាកំលោះ លើកទី២និយាយថាពោះម៉ាយ បើតុកកែឈប់យំ ត្រង់ពាក្យណាមានន័យថា នោះហើយជាគូព្រេងអ្នក។

៨. មិនញ៉ាំត្រីដំរី ព្រោះគិតថាត្រីដំរី ធ្លាប់ជាមនុស្សស្រីដែលប្តីសម្លាប់ធាក់ទម្លាក់ទឹក ហើយក្លាយជាត្រីដំរីនេះឯង។

៩. ពេលញ៉ាំត្រី អស់មួយចំហៀង កុំក្រឡាប់ទៅម្ខាងទៀត ព្រោះអាចធ្វើឲ្យអ្នករកត្រី ក្រឡាប់ទូកពេលនេសាទ។

១០. ការចាក់សាក់នៅលើដងខ្លួន ពិសេសលើទ្រូងនិងខ្នង ពេញនិយមបំផុតសម្រាប់ប៉ូលិស ទាហាន ដើម្បីការពារខ្លួនពីគ្រាប់កាំភ្លើង និងគ្រោះថ្នាក់ផ្សេងៗដែលអាចកើតឡើង។

១១. ក្រៅពីការចាក់សាក់ អ្នកខ្លះជ្រើសរើសខ្សែកថាដើម្បីការពារខ្លួន ដោយឲ្យព្រះសង្ឃ ឬគ្រូមន្តអាគមគាថាសូត្របាលីជាមុនសិន។