បើសង្សារសុំ ៥យ៉ាងនេះ ហាមធ្វើឲ្យគេដាច់ខាត ទោះស្រលាញ់យ៉ាងណាក៏ដោយ

2018-06-06 09:51:51
ចំនួនមតិ 0 | ចំនួនចែករំលែក 0

ពេលខ្លះ មនុស្សស្រលាញ់គ្នាក៏មិនមែនមានន័យថា គេឲ្យធ្វើអ្វី ឬសុំអ្វី អ្នកក៏ព្រមធ្វើឲ្យគេទាំងអស់នោះទេ។ ស្នេហាគឺជាការសម្របខ្លួនឲ្យចុះសម្រុងនឹងគ្នា តែមិនមែនដើម្បីឲ្យភាគីណាមួយត្រូវតែផ្លាស់ប្ដូរតាមតែអ្នកម្ខាងទៀតឡើយ។ ដូច្នេះហើយថ្ងៃនេះ កញ្ញា សូមលើកយករឿង ៥យ៉ាងដែលសង្សាររបស់អ្នកអាចនឹងសុំឲ្យអ្នកធ្វើ ប៉ុន្តែអ្នកមិនគួរធ្វើដាច់ខាត៖

១. សុំឲ្យផ្លាស់ប្ដូរខ្លួនឯងទៅជាប្រភេទមនុស្សដែលគេចូលចិត្ត

នៅពេលក្លាយជាមនុស្សជាទីស្រលាញ់របស់នរណាម្នាក់ ច្បាស់ណាស់ អ្នកត្រូវការឲ្យគេស្រលាញ់នូវអ្វីដែលជាអ្នក មែនអត់? ប៉ុន្តែបើគេសុំឲ្យអ្នកផ្លាស់ប្ដូរខ្លួនឯងឲ្យក្លាយជាប្រភេទមនុស្សស្រីដែលគេចូលចិត្ត បែបនេះមានន័យថាគេមិនបានស្រលាញ់អ្នកពិតប្រាកដ ឬស្រលាញ់អ្នកជាអ្នកនោះទេ ទើបចង់ឲ្យអ្នកផ្លាស់ប្ដូរ។

២. ឲ្យមើលរំលងរឿងប្រើកម្លាំងបាយរបស់គេ

នៅក្នុងទំនាក់ទំនងស្នេហា អ្វីដែលមិនគួរឲ្យកើតឡើងបំផុតគឺការប្រើកម្លាំងដើម្បីដោះស្រាយបញ្ហា ប៉ុន្តែបើសង្សាររបស់អ្នកគឺជាមនុស្សដែលចូលចិត្តប្រើកម្លាំងបាយដោះស្រាយបញ្ហា ថែមទាំងសុំឲ្យអ្នកមើលរំលង និងទទួលយកវានោះ គឺមិនអាចទទួលយកបានឡើយ។ យកល្អគួរចាកចេញទៅ ព្រោះអ្នកមិនត្រូវយកជីវិតខ្លួនឯងទៅប្រថុយនឹងអារម្មណ៍ហិង្សារបស់គេនោះទេ។

៣. ឲ្យអ្នកលាឈប់ពីការងារ

រឿងការងារគឺជារឿងមួយទៀតដែលគួរយកចិត្តទុកដាក់។ សម័យនេះ មនុស្សស្រីចេញធ្វើការខាងក្រៅស្ទើរតែទាំងអស់ហ្នឹង។ វាគ្មានហេតុផលអ្វីឡើយដែលគេត្រូវហាមអ្នកមិនឲ្យធ្វើការ ឬសុំឲ្យអ្នកលាឈប់ពីការងារ ក្នុងខណៈដែលអ្នកមានសមត្ថភាព មានពេលគ្រប់គ្រាន់ក្នុងការធ្វើការរកលុយដោយខ្លួនឯងបាន។

៤. សុំឲ្យអ្នកទទួលយកចរិតមិនល្អរបស់មិត្តភ័ក្ដិគេ

ជាសង្សារនឹងគ្នា ច្បាស់ណាស់នឹងអាចមានពេលជួបមិត្តភ័ក្ដិគេ និងមនុស្សជុំវិញខ្លួនគេ ប៉ុន្តែពួកគេមានទាំងអ្នកដែលចូលចិត្តអ្នក និងអ្នកដែលមិនចូលចិត្តអ្នក ហើយខ្លះក៏បញ្ចេញអាកប្បកិរិយាមើលងាយអ្នកតែម្ដង។ ជំនួសឲ្យការជួយការពារអ្នក ប៉ុន្តែសង្សាររបស់អ្នកបែរជាសុំឲ្យអ្នកកុំខ្វល់ និងយោគយល់មិត្តរបស់គេ ទាំងមិនយល់ពីអារម្មណ៍របស់អ្នក គិតទៅថាវាមានន័យយ៉ាងណាវិញ?

៥. សុំឲ្យអ្នកចាត់ទុកគេសំខាន់ជាង គ្រួសារនិងមិត្តភ័ក្ដិរបស់អ្នក

សម្រាប់ចំណុចនេះ បើគេសុំឲ្យអ្នកធ្វើ អ្នកត្រូវគិតគូរឲ្យបានល្អសិនមុននឹងឆ្លើយយល់ព្រមជាមួយគេ។ ការដែលគេចង់ឲ្យអ្នកយកចិត្តទុកដាក់នឹងគេច្រើន គឺជារឿងល្អទេ ប៉ុន្តែមិនមែនឲ្យអ្នកបោះបង់មនុស្សគ្រប់គ្នាដើម្បីទៅនៅជាមួយគេទេ។ បែបនេះ មានន័យថាគេអាត្មានិយមពេកហើយ ហើយបើសិនថ្ងៃណាមួយត្រូវបែកគ្នា តើអ្នកនឹងត្រូវរស់នៅយ៉ាងម៉េចវិញ?