កុំគិតតែផ្សំថ្នាំលេប! អាការ ៦យ៉ាងដែលអ្នកគិតថាធម្មតា ប៉ុន្តែអាចជាសញ្ញាដ៏គ្រោះថ្នាក់

2018-06-06 06:19:17
ចំនួនមតិ 0 | ចំនួនចែករំលែក 0

អាការៈឈឺថ្កាត់ទូទៅ ដូចជាឈឺក្បាល ឈឺខ្លួនឈឺប្រាណ គេងមិនលក់ រាករូស ។ល។ ភាគច្រើនយើងប្រាកដជាគិតថាទៅផ្សំថ្នាំលេបតែពីរបីដងទៅវាបាត់ហើយ។ ប៉ុន្តែក្នុងករណីជំងឺ ឬអាការឈឺរបស់អ្នកមានភាពរ៉ាំរ៉ៃបន្តៗក្នុងរយៈពេលយូរនោះ គឺមានន័យថាវាអាចមានគ្រោះថ្នាក់លើសពីអ្វីដែលអ្នកគិត។ វេជ្ជបណ្ឌិតនៅមន្ទីរពេទ្យឈានមុខមួយនៅសហរដ្ឋអាមេរិក បានធ្វើការដាស់តឿនចំពោះការឈឺចាប់ ៦យ៉ាងដែលអាចជាសញ្ញានៃជំងឺធ្ងន់ៗដូចខាងក្រោម៖

១. គេងមិនលក់ > ជំងឺបេះដូង

មិនជឿក៏ត្រូវតែជឿដែរថា គ្រាន់តែគេងមិនលក់ ១យប់ វាក៏មានផលប៉ះពាល់ដល់បេះដូងយើងបាត់ទៅហើយ ដោយសារតែឈាមត្រូវបញ្ជូនទៅបេះដូងមិនគ្រាប់គ្រាន់។ មានន័យថា បើយើងគេងមិនលក់ច្រើនយប់ជាប់គ្នា មិនយូរទេបេះដូងនឹងខ្វះឈាម ដែលប្រឈមនឹងការកើតជំងឺបេះដូងយ៉ាងងាយ។ ដូច្នេះកុំរវល់តែលេបថ្នាំងងុយគេង ប៉ុន្តែត្រូវទៅរកគ្រូពេទ្យពិនិត្យមើលឲ្យបានច្បាស់។

២. ទល់លាមក > មហារីកពោះវៀនធំ

អាការទល់លាមកកើតឡើងដោយសារកាកសំណល់អាហារឆ្លងកាត់ពោះវៀនធំបានយឺត ព្រោះមានអ្វីម្យ៉ាងរាំងស្ទះដំណើរការរបស់ពោះវៀនធំ។ ក្នុងរយៈពេលមួយសប្ដាហ៍ ប្រសិនបើយើងបត់ជើងធំតិចជាង ៣ដង ហើយមានភាពរ៉ាំរ៉ៃបែបនេះលើសពី ៣សប្ដាហ៍ គួរតែទៅជួបគ្រូពេទ្យហើយ ព្រោះវាអាចប្រឈមនឹងជំងឺឫសដូងបាត និងជំងឺមហារីកពោះវៀនធំបាន។

៣. ឈឺក្បាល > រលាកស្រោមខួរ

អាការឈឺក្បាលកើតឡើងបានដោយសារហេតុផលច្រើន ហើយភាគច្រើនយើងក៏ប្រើថ្នាំប៉ារ៉ាសេតាម៉ុលដើម្បីដោះស្រាយបញ្ហានេះ។ ទោះយ៉ាងណា បើសិនជាមានអាការឈឺក្បាល រួមទាំងមានក្ដៅខ្លួន ចុករោយក ក្អួតចង្អោរជាប់គ្នាពីរបីថ្ងៃ គឺគួរតែទៅជួបគ្រូពេទ្យល្អជាង។ ជាពិសេសបើចេះតែឈឺក្បាលទៅៗ ដៃជើងចុះខ្សោយ មានបញ្ហាភ្នែក និងឈឺម្ដងៗពីរបីម៉ោងគឺរឹតតែត្រូវប្រញាប់ទៅពិនិត្យ ព្រោះវាអាចជាសញ្ញាបង្ហាញពីភាពមិនប្រក្រតីរបស់ខួរក្បាល និងប្រឈមនឹងជំងឺរលាកស្រោមខួរក្បាល។

៤. រាក > រលាកពោះវៀន

នៅពេលអ្នកមានអាការរាករូស ប៉ុន្តែបន្តជាប់គ្នាប្រមាណ ៣ថ្ងៃមិនធូរស្បើយ នោះជាសញ្ញាច្បាស់ណាស់ថាមានបញ្ហាមិនប្រក្រតីណាមួយ ដូចជាមានបរាសិតក្នុងពោះវៀន ស្ទះពោះវៀន ឬអាចជាបញ្ហាលំពែង ថង់ប្រមាត់។ កាន់តែធ្ងន់ធ្ងរជាងនេះ គឺអាចនឹងមានដុំមហារីកទៀតផង។ ដូច្នេះបើមានអាការបែបនេះ សូមប្រញាប់ទៅជួបគ្រូពេទ្យ។

៥. ភើ > មហារីកបំពង់អាហារ

ការភើអាចបណ្ដាលមកពីច្រើនមូលហេតុ ប៉ុន្តែមិនថាដោយសារមូលហេតុអ្វីក៏ដោយ ការភើហ្កាសឡើងមកដូច្នេះនឹងជះឥទ្ធិពលអាក្រក់ដល់បំពង់អាហារ បំពង់ក និងសួតរបស់យើងទាំងអស់។ បើឃើញថាខ្លួនឯងភើញឹកញាប់ គួរតែទៅជួបគ្រូពេទ្យហើយ ព្រោះការទុកបណ្ដោយបែបនេះនឹងអាចនាំឲ្យកើតជំងឺមហារីកបំពង់កបាន។

៦. ឈឺធ្មេញ > ងងឹតភ្នែក

បើដកធ្មេញរួចហើយប៉ុន្តែនៅតែមានអារម្មណ៍ថាឈឺធ្មេញ និងឈឺផ្ទៃមុខទៀត លើសពី ៧ថ្ងៃ នោះអាចមានន័យថាសរសៃប្រសាទនៅបរិវេណផ្ទៃមុខមានបញ្ហា។ ដូច្នេះត្រូវប្រញាប់ទៅរកគ្រូពេទ្យដើម្បីពិនិត្យមើលជាបន្ទាន់ ព្រោះការបណ្ដែតបណ្ដោយដោយគិតថាវានឹងបាត់ឈឺដោយឯកឯង អាចហុចផលអាក្រក់រហូតដល់ថ្នាក់ខ្វាក់ភ្នែក។

សុខភាពគឺជារឿងសំខាន់ ដូច្នេះហើយទើបអ្នកត្រូវត្រួតពិនិត្យវាឲ្យបានទៀងទាត់ ជាពិសេសនៅពេលមានបញ្ហាមិនប្រក្រតីផ្សេងៗ។ កុំទុកចិត្តថាវាមិនអីៗ ព្រោះអ្នកនឹងស្ដាយក្រោយខ្លាំងពេលគ្រូពេទ្យនិយាយថាយឺតពេលហើយ ៕

ប្រភព៖ vcharkarn ប្រែសម្រួល៖ ស្វាយ វ៉ាន់ថន