ចង់ផាត់មុខឲ្យរលោងចែងចាំង មិនកក ត្រូវដឹងពីគន្លឹះទាំងនេះ

2018-06-01 08:00:00
ចំនួនមតិ 0 | ចំនួនចែករំលែក 0

ការផាត់មុខមានច្រើនរបៀបខុសៗគ្នា ទៅតាមចំណង់ចំណូលចិត្ត ការពេញនិយម និងតាមកាល តាមវេលា។ យ៉ាងណាមិញ ការផាត់មុខឲ្យចូលសព្វសាច់ល្អ គឺជាអ្វីដែលមិត្តៗនារី គួរដឹង ទោះបីជាត្រូវផាត់មុខតាមស្ទីលបែបណាក៏ដោយ ដើម្បីជៀសវាងការកក និងមើលទៅគ្មានលក្ខណៈជាធម្មជាតិ។ អ្វីដែលសំខាន់ដំបូង ដើម្បីជៀសវាងនូវរាល់បញ្ហាទាំងអស់នោះ គឺការជ្រើសរើសប្រើប្រាស់ម្សៅទ្រនាប់ឲ្យបានត្រឹមត្រូវ។

១. ជ្រើសរើសម្សៅទ្រនាប់ដែលត្រូវនឹងពណ៌ស្បែក

បើអ្នកមានសម្បុរស្បែកស អ្នកត្រូវជ្រើសរើសម្សៅទ្រនាប់ ដែលមានពណ៌ភ្លឺស្រាល ប៉ុន្តែអ្នកដែលមានសម្បុរខ្មៅស្រអែម មិនគួរជ្រើសរើសពណ៌ឲ្យសជាងមុខពេកនោះទេ ព្រោះអាចមើលទៅខុសពីពណ៌ដងខ្លួន មើលទៅមិនសមនោះឡើយ។ ដើម្បីជ្រើសរើសពណ៌ឲ្យបានត្រឹមត្រូវ ពេលទិញគួរសាកនៅលើកជិតថ្គាម។

២. មិនត្រូវលាបម្សៅទ្រនាប់ច្រើនពេក

ត្រូវលាបស្តើងៗដោយប្រើដៃអូសថ្នមៗ ពីក្នុងចេញមកក្រៅ ទើបម្សៅទ្រនាប់ជ្រាបចូលសាច់មុខល្អ និងមិនកកនៅផ្នែកកៀនជើងសក់ ពេលដែលបែកញើស។

៣. រៀបចំថែរក្សាស្បែក

ចង់ឲ្យពេលផាត់មុខទៅបានស្អាតបែបធម្មជាតិ អ្វីដែលត្រូវធ្វើមិនមែនផ្តោតសំខាន់តែលើការតុបតែងតែមួយមុខនោះទេ គឺនៅពេលយប់ត្រូវលាងសម្អាតមុខឲ្យបានស្អាតល្អ និងលាបឡេណាដែលផ្តល់ជីវជាតិ ផ្ដល់សំណើមដល់ស្បែក។ បន្ទាប់មកពេលពេលព្រឹក មុនធ្វើការផាត់មុខជាមួយម្សៅទ្រនាប់ អ្នកត្រូវលាបសេរ៉ូម ឬគ្រីមផ្តល់សំណើមជាមុនសិន ទើបស្បែកមើលទៅរលោងស្អាត។

៤. លាប Primer

Primer គឺជាប្រភេទគ្រីមម្យ៉ាងសម្រាប់លាបមុនម្សៅទ្រនាប់ វាមានពណ៌ភ្លឺជាងស្បែកតែបន្តិចប៉ុណ្ណោះ ប៉ុន្តែវាជាជំនួយការដ៏សំខាន់ ក្នុងការទប់ជាតិខ្លាញ់ និងគ្រឿងសម្អាងឲ្យជាប់បានយូរល្អ ថែមទាំងមានភាពស្រស់ថ្លាទៀតផង។

៥. ជ្រើសរើសជក់ផាត់ឲ្យបានត្រឹមត្រូវ

ម្សៅទ្រនាប់ខ្លះ គឺស៊ីគ្នាជាមួយនឹងការផាត់ដោយជក់ វាអាចជ្រាបចូលលឿនជាងការប្រើជាមួយប៉ុងផាត់មុខ។ យ៉ាងណាក៏ដោយ កុំភ្លេចប្រើដៃតប់ថ្នមៗពីលើ បន្ទាប់ពីប្រើជក់ហើយ។

៦. ជ្រើសរើសម្សៅទ្រនាប់ឲ្យត្រូវនឹងប្រភេទស្បែក

បើអ្នកមានស្បែកមុខស្ងួត គួរប្រើម្សៅទ្រនាប់ដែលរាវ និងអាចផ្តល់សំណើមដល់ស្បែក ប៉ុន្តែបើអ្នកមានស្បែកដែលមានជាតិខ្លាញ់ច្រើន ត្រូវប្រើម្សៅទ្រនាប់ណា ធន់នឹងទឹកហើយមានសារធាតុដែលអាចទប់ជាតិខ្លាញ់បានពេញមួយថ្ងៃ។

៧. មិនត្រូវប្រើ Concealer មុនម្សៅទ្រនាប់

Concealer ដែលប្រើសម្រាប់បិទបាំង ស្នាមស្លក់ខ្មៅក្រោមភ្នែក ឬស្នាមមុននៅលើមុខ អ្នកត្រូវប្រើបន្ទាប់ពីលាបម្សៅទ្រនាប់ហើយ ជាពិសេសលាបនៅកន្លែងឆាប់ចេញជាតិខ្លាញ់ ដែលហៅថា T-Zone មានដូចជានៅត្រង់កណ្តាលថ្ងាស ខ្ទង់ច្រមុះ និងចង្កា ហើយត្រូវធ្វើការតប់ឲ្យចូលដោយប្រើជាមួយប៉ុងផាត់។