មនុស្សប្រុសការហើយច្រើនផ្លាស់ប្ដូរ ៥យ៉ាងនេះ តែជាអ្វីដែលប្រពន្ធចង់បានបំផុត

2018-05-28 07:27:21
ចំនួនមតិ 0 | ចំនួនចែករំលែក 0

នៅពេលគូស្នេហ៍សម្រេចចិត្តរៀបការ វាមិនមែនមានន័យថាអ្នកទាំងពីរចាប់ផ្ដើមប្រើជីវិតគូរួមគ្នាតែម្យ៉ាងនោះទេ ប៉ុន្តែវាក៏ជាសញ្ញាចាប់ផ្ដើមនូវអ្វីជាច្រើនទៀត ហើយប្រាកដណាស់ថាជីវិតស្នេហាមុនរៀបការ និងក្រោយរៀបការតែងមានភាពខុសគ្នា។ បើនិយាយពីការផ្លាស់ប្ដូររបស់ភាគីបុរស កាលពីមុនរៀបការ គេអាចនឹងគិតធ្វើអ្វីក៏បានតាមចិត្ត ប៉ុន្តែក្រោយពីរៀបការហើយ គេមិនអាចធ្វើបែបហ្នឹងតទៀតឡើយ តែគេនឹងព្យាយាមផ្លាស់ប្ដូរទម្លាប់ជាច្រើន ដើម្បីធ្វើឲ្យនារីដែលមកធ្វើជាគូជីវិតរបស់គេមានក្ដីសុខ។ ថាតើការផ្លាស់ប្ដូរនោះមានអ្វីខ្លះ សូមតាមដានជាមួយ កញ្ញា ខាងក្រោមនេះ៖

១. ខ្វល់ខ្វាយពីអារម្មណ៍ប្រពន្ធកាន់តែច្រើន

កាលនៅជាសង្សារ គេអាចនឹងមិនសូវចាប់អារម្មណ៍ប៉ុន្មានទេ ថាអ្នកធ្វើអ្វីខ្លះ ហើយក៏មិនសូវខ្វល់ខ្វាយពីអ្នកច្រើនដែរ ប៉ុន្តែក្រោយរៀបការ ស្វាមីល្អនឹងងាកមកចាប់អារម្មណ៍លើអ្វីដែលពាក់ព័ន្ធភរិយារបស់ខ្លួនកាន់តែច្រើន និងមានការបារម្ភ ខ្វល់ខ្វាយពីអារម្មណ៍របស់ភរិយាខ្លួនឯងជាងនារីៗដទៃ។

២. បញ្ឈប់ទម្លាប់ផ្ដេសផ្ដាសដែលអាចនាំឲ្យមានការបែកបាក់គ្នា

ក្រោយពីរៀបការ មនុស្សប្រុសនឹងមានភាពជាអ្នកដឹកនាំជាងមុន ហើយនឹងបញ្ឈប់រាល់ទង្វើដែលខ្លួនធ្លាប់ធ្វើមិនល្អកាលពីពេលនៅជាសង្សារចោល ដើម្បីក្លាយជាមេគ្រួសារល្អ។ គេនឹងដឹងថាអ្វីដែលអាចធ្វើបាន ហើយអ្វីដែលគួរតែឈប់ ជាពិសេសទង្វើផ្ដេសផ្ដាសដែលអាចឲ្យជីវិតគូរបស់គេឈានដល់បែកបាក់ ដូចជាការមានស្រីលួចលាក់ ការញៀនស្រាញៀនល្បែង ដើរលេងប៉ោឡែជាមួយមិត្តភ័ក្ដិជាដើម។ ក្រោយរៀបការរួច មនុស្សប្រុសដែលស្រលាញ់គ្រួសារនឹងបញ្ឈប់ទង្វើទាំងនេះបានដោយឯកឯង។

៣. ប្រញាប់ត្រលប់មកផ្ទះទៀងពេល

វាប្រៀបដូចជាតួនាទីសំខាន់មួយរបស់បុរសជាប្ដីក៏ថាបាន សម្រាប់ការប្រញាប់ត្រលប់ចូលផ្ទះវិញទៀងពេល។ មិនមែនមានន័យថារៀបការហើយមិនអាចចូលផ្ទះយឺតនោះទេ ជាទូទៅមនុស្សប្រុសអាចញែកដាច់បានរវាងការងារ និងគ្រួសារ គ្រាន់តែថាបុរសដែលទើបរៀបការថ្មីៗ ក៏តែងចង់ប្រញាប់មកផ្ទះយ៉ាងទៀងពេល ព្រោះគេដឹងថាមានមនុស្សសំខាន់កំពុងរង់ចាំឲ្យគេត្រលប់ទៅផ្ទះវិញ។

៤. មានគោលដៅជីវិត ចេះរៀបចំផែនការអនាគត

ព្រោះគេមិនមែនរស់នៅខ្លួនមួយតទៀតទេ ដូច្នេះហើយក្នុងនាមជាមេគ្រួសារ មនុស្សប្រុសត្រូវគិតគូរវែងឆ្ងាយ មានការរៀបចំផែនការជីវិតសម្រាប់មនុស្សក្នុងគ្រួសារ ដូចជាការគិតទិញផ្ទះ ទិញឡាន ឬទ្រព្យសម្បត្តិដែលធ្វើឲ្យមនុស្សជាទីស្រលាញ់របស់ខ្លួនមានភាពកក់ក្ដៅ និងប្រសើរឡើង។ គេនឹងមានភាពម៉ឺងម៉ាត់កាន់តែច្រើនចំពោះមុខរបរ និងការងារ និងមានការរៀបចំផែនការអនាគតសម្រាប់កូនៗដែរ។

៥. យល់ដឹងពីវិធីថែរក្សាជីវិតគូ

ក្រៅពីស្វែងយល់ពីការរស់នៅជីវិតគូហើយ ប្ដីប្រពន្ធក៏ត្រូវស្វែងយល់ពីវិធីថែរក្សាជីវិតគូដើម្បីអាចរស់នៅជាមួយគ្នាបានយូរអង្វែងដែរ ត្បិតការជីវិតរៀបការមិនមែនអាចធ្វើអ្វីតាមចិត្តដូចកាលជាសង្សារ ចង់ស្រលាញ់ក៏ស្រលាញ់ ចង់បែកក៏បែកនោះទេ។ ដូច្នេះហើយនៅពេលមានអ្វីមិនយល់ពីគ្នា គួរកុំទុក បណ្ដែតបណ្ដោយ ឬសន្និដ្ឋានតែម្នាក់ឯង ប៉ុន្តែគួរតែបើកចិត្ត និងដោះស្រាយបញ្ហានោះមុននឹងរឿងរាលដាលកាន់តែធំ ៕