តិចនិកដ៏សាមញ្ញៗ ដែលប្រពន្ធគ្រប់រូបគួរមានដើម្បីកុំប្ដីឲ្យបែកចិត្ត និងធុញទ្រាន់

2018-05-25 07:31:21
ចំនួនមតិ 0 | ចំនួនចែករំលែក 0

រឿងប្ដីបែកចិត្ត ប្ដីលួចមានក្រៅនេះ គឺមានច្រើនរួចមកហើយ។ យ៉ាងណាក៏ដោយយើងគួរតែគិតថាបើប្រពន្ធយើងល្អហើយ មនុស្សប្រុសមិនទៅយកភ្នែកមើលស្រីដែលអន់ជាងប្រពន្ធទេ។ ដើម្បីថែរក្សាចំណងគ្រួសារឲ្យបានគង់វង្ស ប្រពន្ធគ្រប់គ្នាគួរតែមានវិធីសាស្ត្រសម្រាប់រក្សាប្ដីឲ្យនៅតែស្រឡាញ់ ៖

១. កុំខឹងគាត់ច្រើនពេក

ជ្រុលជាចាប់ដៃគ្នាជាគ្រួសារទៅហើយ គួរតែចេះអត់ឱនឲ្យគ្នាឲ្យបានច្រើន។ រឿងខ្លះអត់ខឹងគាត់បានក៏អត់ទៅ ហើយរឿងខ្លះទៀតបើអត់ស្ដីបន្ទោសបានក៏គួរតែអត់ដែរ ព្រោះពេលខ្លះការខឹងច្រើន ការរអ៊ូ ការស្ដីថាឲ្យគាត់ច្រើនពេកក៏ជាមូលហេតុដែលធ្វើឲ្យគាត់ចាប់ផ្ដើមធុញទ្រាន់ដែរ។ ពេលខ្លះគួរតែចេះស្ដាប់ហេតុផលគាត់ខ្លះ មិនគួរស្ដីថាឲ្យទាំងមិនយល់ពីស្ថានភាពគាត់នោះទេ។

២. កុំហាមឃាត់គាត់ច្រើនពេក

យើងជាប្រពន្ធក៏មានចំណូលចិត្តខ្លួនឯងដែរ គាត់ក៏ដូចគ្នា។ ពេលខ្លះឲ្យគាត់ធ្វើអីដែលគាត់ចង់ធ្វើខ្លះទៅ អ្វីដែលសំខាន់រឿងនោះមិនបំផ្លាញគ្រួសារទៅបានហើយ។ បើគាត់ចូលចិត្តលេង Game ឲ្យគាត់លេងទៅ កុំឲ្យតែលេងលែងធ្វើអីទាំងអស់នោះ។ បើគាត់ចូលចិត្តជុំគ្នានិយាយលេងជាមួយមិត្តភក្តិគាត់ ក៏មិនគួរហាមអីពេកដែរ ព្រោះពេលខ្លះគាត់ក៏ចង់បានពេលវេលានោះដូចគ្នា។

៣. កុំបណ្ដោយខ្លួនឲ្យក្លាយជាមនុស្សស្រីចាស់មុនអាយុ

ទោះរៀបការហើយក៏ដោយក៏អ្នកមិនត្រូវបណ្ដោយខ្លួនឲ្យបាត់បង់សម្រស់ដែរ។ ត្រូវចេះរៀបចំខ្លួន និងដែររក្សាខ្លួនឲ្យបានស្អាត ព្រោះពេលដែលមានប្រពន្ធស្អាត តើមនុស្សប្រុសណាមិនសប្បាយចិត្ត? ចេញទៅណាមកណាក៏មិនភ្លេចយកអ្នកទៅដែរ។ ម្យ៉ាងទៀតបើអ្នកលែងស្អាតវាក៏ជាផ្នែកមួយដែលគាត់ចង់ផ្លាស់ប្ដូរអារម្មណ៍ទៅកាន់ស្រីដែលស្អាតហើយក្មេងដែរ។

៤. មានពេលវេលាល្អៗឲ្យគ្នា

ទោះជាប្ដីប្រពន្ធហើយក៏មិនត្រូវចោលភាពផ្អែមល្ហែមឲ្យគ្នាដែរ។ ការដែលលែងមានរឿងអីល្អៗជាមួយគ្នា ព្រងើយកន្តើយ នឹងគ្នានឹងហើយដែលធ្វើឲ្យជីវិតប្ដីប្រពន្ធសោះកក្រោះ លែងមានក្ដីសុខ។ អ្នកគួរតែរកតិចនិច និងបង្កើតឱកាសថ្មីៗដើម្បីរក្សាចំណងស្នេហ៍នេះឲ្យគង់វង្ស មិនមានអ្នកណាជ្រៀតជ្រែកបាន។

៥. ធ្វើឲ្យគាត់ដឹងថាអ្នករឹងមាំ

កុំរំពឹងការមើលថែពីគាត់ខ្លាំងពេកអី រឿងខ្លះអ្នកគួរតែធ្វើដោយខ្លួនឯងបាន។ ពេលដែលអ្នកចាប់ផ្ដើមលែងពឹងពាក់គាត់ច្រើនពេក គាត់នឹងគិតថាអ្នកគ្មានគាត់ក៏អាចរស់បាន ដូច្នេះគាត់នឹងចាប់ផ្ដើមខ្វល់ខ្វាយពីអ្នកវិញ ព្រោះគាត់ខ្លាចអ្នកលែងត្រូវការគាត់។ ពេលខ្លះគាត់ក៏សប្បាយចិត្តដែរ ពេលដែលដឹងថាប្រពន្ធគាត់ជាមនុស្សស្រីពូកែម្នាក់ ហើយគាត់ពិតជាមិនចង់បាត់បង់អ្នកនោះទេ។

៦. សរសើរ និងលើកទឹកចិត្ត

ពេលជោគជ័យអ្នកដែលគាត់ចង់បានពាក្យស្ញប់ស្ញែងជាងគេគឺអ្នកហ្នឹងហើយ ហើយបើសូម្បីតែពាក្យសរសើរក៏អ្នកគ្មានដែរ គាត់ក៏មានអារម្មណ៍ថាអន់ចិត្តដែរ។ ជាប្រពន្ធល្អត្រូវចេះលើកសរសើរស្វាមី ហើយបើពេលគាត់មានបញ្ហាវិញ ត្រូវចេះលួងគាត់ លើកទឹកចិត្តគាត់មិនមែនបន្ទោសថែមនោះទេ៕

ចុចអាន៖នារីឲ្យតែមានប៉ុន្មានចំណុចនេះ ដឹងតែបុរសដណ្ដើមគ្នាចង់បានជាប្រពន្ធហើយ

ប្រភព៖ Guu ប្រែសម្រួល៖ ផេង ផលធិតា