អ្នកកំពុងគិតច្រើនមែនទេ? អានឃ្លាទាំងនេះ អាចបញ្ឈប់ការគិត ដោយមិនបាច់លេបថ្នាំ

2018-05-22 10:00:00
ចំនួនមតិ 0 | ចំនួនចែករំលែក 0

ពេលខ្លះខ្លួនប្រាណនៅនឹងថ្កល់មួយកន្លែងមែន ប៉ុន្តែចិត្តវិញរសាត់អណ្តែតទៅឆ្ងាយ ខំទប់យ៉ាងណាក៏ទប់មិនឈ្នះ ប៉ុន្តែត្រូវជឿជាក់ខ្លួនឯងថា អ្នកមានសមត្ថភាពគ្រប់គ្រាន់ក្នុងការគ្រប់គ្រង ខួរក្បាលកុំឲ្យគិតអ្វីផ្ដេសផ្ដាស ប្រៀបបានដូចជាអ្នកទប់ស្កាត់ ជាតិពុលកុំឲ្យសាយភាយ ចូលទៅសម្លាប់ខ្លួនប្រាណអីចឹងដែរ។

ការគិតច្រើនហាក់បីដូចជាឃុំខ្លួនឯងនៅក្នុងគុកងងឹត អ្នកអាចដោះលែងខ្លួនឯងបានដរាបណាឈប់គិតរវើរវាយពីរឿងអត់ប្រយោជន៍តទៅទៀត។
ស្តាប់ឲ្យជាក់មុនហាស្តី គិតឲ្យច្បាស់មុនតបត ចាំមើលបន្តិចសិនមុនរិះគន់គេ ចេះអន់អោនមុនបួងសួងចង់បានសុខ ព្យាយាមសិនមុនបោះបង់ចោល។
ឈប់បារម្ភភ័យខ្លាចជួបរឿងមិនល្អ សប្បាយចិត្តហើយគិតថានឹងមានរឿងល្អកើតឡើង គិតច្រើន មិនចំណេញ ថែមទាំងធ្វើឲ្យមានទុក្ខកាន់តែធំ។
លើលោកនេះគ្មានបញ្ហាអ្វីធំដែលមិនអាចដោះស្រាយ ដូចជាការគិតរបស់អ្នកទេ។
គិតផ្តេសផ្តាសច្រើន អ្នកមិនអាចគ្រប់គ្រងអ្វីៗផ្សេងបានឡើយ អីចឹងប្រលែងចោលខ្លះទៅ។
គិតច្រើនប្រៀបបានដូចខ្យល់ វិលវល់គ្មានទិសដៅ។
កុំធ្វើឲ្យថ្ងៃថ្មីមិនស្រឡះ ព្រោះខ្វាយខ្វល់គិតដល់រឿងពីម្សិលមិញ។
ចិត្តដែលស្ងប់គឺជាចិត្តដែលមិនឲ្យភាពភ័យខ្លាចមកគ្របដណ្តប់បាន។

*៣ វិធីដោះស្រាយកុំឲ្យគិតច្រើន

១. ផ្សារភ្ជាប់ខ្លួនឯងទៅនឹងធម្មជាតិ

អ្នកគួរទៅកន្លែងដែលមានសួនផ្កា ឬកន្លែងកំសាន្តណាបែបធម្មជាតិ មានភ្នំ ទឹកធ្លាក់ ទេសភាពស្អាត ដើម្បីបន្ធូរអារម្មណ៍ និងបំភ្លេចរឿងរ៉ាវឥតបានការចោលឲ្យអស់។

២. ទន្ទិញពាក្យល្អៗនៅក្នុងចិត្ត

បើពិបាកខ្លាំងក្នុងការទប់ចិត្តមិនឲ្យគិត អ្នកអាចទន្ទិញពាក្យល្អៗដូចជា មិនអីទេៗ ធ្វើបានៗ... ព្រោះពាក្យប៉ុន្មានម៉ាត់ក៏ដោយ វាមានឥទ្ធិពលខ្លាំងណាស់ក្នុងការគ្រប់គ្រងចិត្ត។

៣. សមាធិ

អ្នកដឹងទេថាការសមាធិ ពិតជាល្អខ្លាំងណាស់សម្រាប់ធ្វើឲ្យចិត្តស្ងប់ អ្នកមិនចាំបាច់អង្គុយតាំងសមាធិដូចអ្នកកាន់សីលក៏បានដែរ សំខាន់ព្យាយាមទប់ចិត្តឲ្យបាននឹងន កុំចេះតែរវើរវាយ គ្មានព្រំដែន។