ហេតុផលបែបនេះហើយ បានមនុស្សប្រុសទោះមានប្រពន្ធហើយក៏នៅតែមានស្រីក្រៅ
- 2018-05-16 07:59:50
- ចំនួនមតិ 0 | ចំនួនចែករំលែក 0
ហេតុផលបែបនេះហើយ បានមនុស្សប្រុសទោះមានប្រពន្ធហើយក៏នៅតែមានស្រីក្រៅ
រឿងប្ដីមានស្រីគឺជាបញ្ហាចោទមួយដែលមនុស្សស្រីស្អប់បំផុត តែវានៅតែកើតមានឡើងរវាងប្ដីប្រពន្ធ។ ខាងក្រោមនេះជាហេតុផលមួយចំណែកដែលធ្វើឲ្យមនុស្សប្រុសទោះមានប្រពន្ធកូនហើយ ក៏នៅតែឆ្លៀតមានស្រីក្រៅទៀត ៖
១. ប្រពន្ធរអ៊ូច្រើន
រៀបការហើយបញ្ហាក៏មានច្រើនដែរ ជាពិសេសមនុស្សស្រីក៏ចាប់ផ្ដើមប្រែប្រួលទៅជារអ៊ូច្រើននេះក៏មកពីនាងហត់។ មនុស្សប្រុសខ្លះមិនបានយល់ហើយក៏ធុញនឹងប្រពន្ធ និងចំណងអាពាហ៍ពិពាហ៍ថាមិនផ្អែមល្ហែមដូចមុន រួចក៏បែកចិត្តចង់ទៅភ្លក់រសជាតិស្រីក្រៅ។
**២. ការរួមខ្នើយជាមួយគ្នាមិនសូវមានភាពរ៉ូមែនទិច**
ជីវិតប្ដីប្រពន្ធត្រូវការចំណុចនេះខ្វះមិនបានទេ បើការរួមខ្នើយអ្នកមិនចុះសម្រុងគ្នាហើយនោះក៏ពិបាកដែរ។ ពេលខ្លះអាចមកពីប្រពន្ធមិនយល់ប្ដី ឬអាចមកពីប្ដីមិនយល់ប្រពន្ធតែបើរឿងនេះមិនអាចដោះស្រាយបានទេ ភាពរកាំរកូសនឹងមាន ហើយភាគរយនៃការដែលប្ដីទៅមានស្រីក៏កើនឡើងដូចគ្នា។
៣. ទំនាក់ទំនងរវាងប្ដីប្រពន្ធមានភាពសោះកក្រោះ
ភាពហត់នឿនរៀងខ្លួនបានធ្វើឲ្យជីវិតប្ដីប្រពន្ធ កាន់តែឆ្ងាយគ្នាទៅ មិនសូវមានភាពផ្អែមល្ហែមដាក់គ្នា នៅផ្ទះមិនដែលជុំគ្នា ហើយពេលជុំគ្នាឈ្លោះនេះ ឈ្លោះនោះមិនចេះចប់។ ភាពព្រងើយកន្តើយក៏ចេះតែកើនឡើង ហើយម្នាក់ៗមិនព្រមស្ដាប់គ្នា ដូច្នេះហើយទើបមានប្ដីមួយចំនួនទៅរកស្រីក្រៅដើម្បីបន្ធូរអារម្មណ៍ រហូតលែងចេះគិតពីគ្រួសារក៏មាន។
៤. លង់ភាពជោគជ័យរហូតភ្លេចខ្លួន
មនុស្សប្រុសកាន់តែឡើងធំ កាន់តែមានយស មានទ្រព្យកាន់តែចង់បានអ្វីដែលថ្មី អ្វីដែលស្អាត បែបនេះហើយទើបមានមនុស្សប្រុសខ្លះភ្លើតភ្លើនភ្លេចគ្រួសារនៅពេលគេមានបាន។ គេអាងគេមានលុយ ចង់បានមនុស្សស្រីបែបណាក៏បាន ហើយមើលឃើញប្រពន្ធឯមិនស្អាត មិនល្អ។
៥.ប្រពន្ធលែងស្អាត
រៀបការហើយមនុស្សស្រីអាចនឹងរ៉ាបរងការងារជាច្រើន ហើយក៏ត្រូវមានកូន ដូច្នេះសម្រស់នាងក៏លែងស្អាតដូចពេលនៅក្រមុំ តែមនុស្សប្រុសមិនយល់ហើយថែមទាំងក្បត់ចិត្តទៀត។ ត្រូវហើយស្រីនៅក្រៅគេស្អាតៗណាស់ ព្រោះមួយថ្ងៃនាងមានពេលច្រើនថែទាំសម្រស់ដែលជាអាវុធទាក់ចិត្តមនុស្សប្រុស។ បែបនេះហើយទើបយើងជាប្រពន្ធក៏ត្រូវមើលថែរក្សាខ្លួនដែរ កុំឲ្យធ្លាក់ខ្លួនខ្លាំងពេក។
៦. កំដរអារម្មណ៍
មនុស្សប្រុសខ្លះមិនភ្លេចប្រពន្ធទេ តែក៏មិនអាចខ្វះស្រីបានដែរ ព្រោះពេលឈ្លោះគ្នាជាមួយប្រពន្ធគឺមានតែទៅរកស្រីហ្នឹងហើយឲ្យធូរអារម្មណ៍។ ពេលខ្លះស្មុគស្មាញ ពេលខ្លះអារម្មណ៍មិនល្អគឺដឹងតែទៅរកស្រីហើយ ព្រោះនាងស្អាត ក្មេង សម្ដីពីរោះ ចេះលួងលោម មិនមែនដូចប្រពន្ធទេ៕
ចុចអាន៖រៀបការនឹងបុរសបែបណាទើបមិនខកខ្លួន? ៧ចំណុចដែលត្រូវមើល មុនជ្រើសគេជាគូជីវិត