បើមិនបានស្រឡាញ់គេ កុំផ្ដល់ក្ដីសង្ឃឹមឲ្យគេព្រោះវាដូចជាការសម្លាប់មួយយ៉ាងស្ងៀមស្ងាត់

2018-05-02 09:08:23
ចំនួនមតិ 0 | ចំនួនចែករំលែក 0

មានមនុស្សជាច្រើនបានស្លាប់ចិត្តដោយសារទង្វើនៃការផ្ដល់សង្ឃឹមរបស់ម្ខាងទៀតទាំងគេមិនដែលនឹងមានបំណងដើររួមផ្លូវជាមួយគ្នា។

រូបតំណាង

នៅពេលដែលអ្នកធ្វើល្អ និងបង្ហាញទង្វើបែបស្នេហាឲ្យគេឃើញ ចិត្តរបស់គេកាន់តែពុះកញ្ជ្រោល និងមានសង្ឃឹមខ្លាំង ប៉ុន្តែបើបន្ទាប់មកទៀតអ្នកដើរចេញដោយបន្សល់ពាក្យថា «មិត្តភាព» ឬ «រាប់អានគ្នា» នោះពិតជាធ្វើបានគេពេកហើយ។

បើអ្នកមិនបានតាំងចិត្តថាស្រឡាញ់គេ ឬទទួលយកគេជាគូជីវិតនោះទេ សូមកុំបង្ហាញទង្វើដែលធ្វើឲ្យគេយល់ច្រឡំអី។ មនុស្សយើងមិនថាស្រី ឬក៏ប្រុសនោះទេគឺស្លាប់ចិត្តជាមួយអ្វីដែលយើងបានបង្ហាញទៅ ដូច្នេះអាណិតចិត្តគេ អាណិតបេះដូងគេផង។ ដឹងអត់នៅពេលគេគិតថាអ្នកក៏ស្រឡាញ់គេដែរនោះ គេនឹងដាក់ចិត្ត ដាក់បេះដូង ដាក់ក្ដីសង្ឃឹមទាំងអស់ទៅលើអ្នក តែបើគេដឹងថាអ្នកមិនបានស្រឡាញ់នោះ បេះដូងគេនឹងខ្ទេចខ្ទី ហើយចាប់ផ្ដើមមានអារម្មណ៍ថាអ្វីគ្រប់យ៉ាងក្នុងលោកនេះសុទ្ធតែជាការបោកប្រាស។ មនុស្សធ្លាប់តែរីករាយ មនុស្សធ្លាប់តែជឿជាក់ ក៏ប្រែទៅជាមនុស្សម្នាក់ដែលសោះកក្រោះ លែងចេះជឿជាក់លើអ្នកណាទៀត។ នេះក៏ដោយសារទង្វើបោកប្រាស់របស់អ្នកដែរ។

រូបតំណាង

នៅពេលមនុស្សម្នាក់ចាប់ផ្ដើមមានសង្ឃឹមពិភពលោកគេនឹងចាប់ផ្ដើមស្រស់បំព្រង តែបើបន្ទាប់មកអ្នកទាញពួកគេចុះមកវិញនោះ ពិភពលោករបស់ពួកគេគឺប្រៀបដូចនរកអីចឹង។ ភាពឈឺចាប់ ការខកចិត្ត ការបាក់ទឹកចិត្ត និងភាពខ្មៅងងឹតក៏ចាប់ផ្ដើមហ៊ុមព័ទ្ធពួកគេដោយមិនឲ្យឃើញពន្លឺនៃជីវិតបាន។

បើសិនជាអ្នកបានអានអត្ថបទនេះហើយ សង្ឃឹមថាអ្នកនឹងឈប់ប្រើវិធីនេះទៅលើអ្នកណាទៀត ព្រោះវាអាចសម្លាប់ទឹកចិត្តមនុស្សម្នាក់ដែលខំស្រឡាញ់អ្នកបានយ៉ាងឃោរឃៅបំផុត៕